Bé Guling
Be guling utawi babi guling inggih punika ajeng-ajengan sané kakaryanin saking be celeng sané basangnyane kadagingin basa genep miwah jukut sakadi jukut sela sawi. Be Guling kapanggang ngantos lebeng. Pinaka cihna Be guling sampun lebeng, warnan kulitnyane pastika mauwah dados soklat miwah renyah pesan. Be Guling ketah kaaturang ring upacara agama ring Bali. Mangkin, lianan ring upacara ring Bali, be guling dados ajeng-ajengan sané kesenengin miwah lais pisan ring Bali. Pangargan a piring be guling sampun madaging nasi, lawar miwah ajengan lianan pantaraning limolas tali ngantos satus tali, wénten makeh genah sané prasida kadadosang genah becik ngajengang be guling[1].
Ring makudang-kudang genah ring jagate, ajeng-ajengan marupa babi utawi ulam bawi sampun ketah kauningin. Wenten makeh pisan tata cara makarya ajeng-ajengan nganggén ulam bawi. Nenten ja ring Indonésia kemanten, babi guling dados ajeng-ajengan sané lais taler ring panegara lianan minakadi ring Miami miwah genah lianan minakadi Kuba, Puerto Riko, Karibia. Ajeng-ajengan marupa babi guling puniki sering kaajeng ri kala Natal sareng kulawarga utawi timpal.[2][3]
Ring Indonésia, babi guling ketah kapanggihin ring genah-genah krama non-muslim, sakadi Hindu Bali ring tanah Batak Kristen ring Sumatra Utara, ring Minahasa Sulawesi Utara, Toraja ring Sulawesi Selatan miwah genah sané lianan. Ring Bali, babi guling ketah kaadol ring restaurant utawi warung.
- ↑ Times, I. D. N.; Arofani, Prila. "10 Tempat Makan Babi Guling Terenak di Bali yang Wajib Kamu Coba". IDN Times (ring Indonesia). Kaaksés 2022-06-12.
- ↑ Cuban Christmas Traditions
- ↑ In Miami, Christmas Eve Means Roast Pig