Systema

Systema
(Cистема)

Enfoque	LLucha cuerpu a cuerpu, y con armes blanques y de fueu. Defensa personal
Contautu/durez	Contautu plenu
País d'orixe	XRSS, Rusia
Paternidá	Artes marciales ruses, Samoz, Sambo
Deporte olímpicu	Non

Systema (Система: “sistema”) ye un arte marcial rusu basáu nel combate a mano vacía, téuniques d'agarre y llucha con cuchiellu, incluyendo tamién l'entrenamientu con armes de fueu. L’entrenamientu inclúi exercicios y práutica del combate, pero refuga los conxuntos de secuencies tipu kata. Céntrase sobre too en controlar los seis niveles del cuerpu (todiyos, rodiyes, cintura, coldos, costazos y pescuezu) per aciu de l'aplicación de puntos de presión, y d'aplicaciones de golpes y d'armes. El Systema preséntase davezu como arte marcial utilizáu por delles unidaes Spetsnaz ruses.

Estes artes nun tienen un nome históricu concretu, d'ehí que pueda dase dalgún tracamundiu al interpretales. En ciertu sentíu’l nome "Systema" pue atalantase como un términu xenéricu paecíu al de "Kung Fu" ("unu que ye mui habilidáu" o "tiempu" y "esfuerciu").^[1][2] La versión más acionada ye que’l nome Systema escoyóse del que-y daben en Rusia a un arte anterior asemeyáu, el Systema Rukopashnogo Boya (Sistema de combate a mano vacía).^[3]

Polo menos nel Systema de Mikhail Ryabko (ver más p'abaxo), "el Sistema" ye una referencia a los distintos sistemes del cuerpu (muscular, nerviosu, respiratoriu, etc.) asina como a elementos sicolóxicos y espirituales.^[4][2]

Como hubo y hai tovía un númberu d'estilos distintos de llucha comunes nes fuercies militares y especiales ruses (Alpha, GRU, Vympel…), hai dellos otros nomes y nomatos davezu tracamundiaos col de Systema. Por exemplu, delles tropes y personal de les fuercies especiales entrenen "bojewoje sambo" (combat sambo), que ye un arte estremáu. Amás, les tropes llamen a cualesquier métodu que-yos aprienden "rukopashka" (xíriga rusa pa "cuerpu a cuerpu"), o "machalka" o "boinia" (xíriga rusa pa "lluchar" y "cutir"). El nome "Combat Sambo Spetsnaz" inventólu’l gobiernu soviéticu, magar que se trate d'un estilu diferente.^[5]

Los guardies personales de Stalin yeren prauticantes de Systema.^[6][7] Mikhail Ryabko deprendió’l sistema d'ún d'estos guardies tando nel exércitu.^[6] Tres morrer Stalin, el Systema convirtióse nel estilu de llucha qu'usaben les Unidaes d'Operaciones Militares Especiales pa misiones d'altu riesgu nes Spetsnaz, GRU y otres dependencies del gobiernu. Había y hai otres artes de combate estremaes qu'entrenaben les fuercies especiales ruses amás del Systema. Débese a la torga estricta na Xunión Soviética sobre tradiciones non reconocíes, y a lo roceano del entrenamientu de les fuercies especiales, que’l Systema nun principiara a ser conocíu hasta que pasó la guerra fría. La herencia de la Rusia pre-soviética nel Systema ta asoleyándose de recién.

Los raigaños del Systema tan escurque perdíos n’artes familiares antigües, cambiaron poles necesidaes militares contemporánees y foron redescubiertos y adaptaos por cada instructor y prauticante.^[8]

Hai quien diz que la herencia de les artes marciales ruses nel Systema data del sieglu X y que foi prauticáu polos Bogatyr (guerreros heroicos rusos).^[1][9][8]

Según otra teoría, les distintes formes del Systema modernu son evoluciones d'un proyeutu intensivu d'investigación y desarrollu lleváu a cabu por delles xeneraciones d'instructores de combate cuerpu a cuerpu nes dependencies del Dynamo de 1920 a 1980 aproximao.^[9] De ser asina, esto pondría al Systema na mesma llinia d'entrenamientu militar cuerpu a cuerpu del Sambo de combate y estilos rellacionaos como’l Samoz desendolcáu por V.A. Spiridonov. Si esta teoría ye correuta, ente les influencies estilístiques del Systema modernu taríen mui bien d'estilos d'artes marciales nacionales, sistemes militares de llucha cuerpu a cuerpu y estilos indíxenes rusos de llucha, asina como aspeutos de la ciencia deportiva, la biomecánica y la sicoloxía deportiva, darréu qu'estes disciplines foron incorporaes al proyeutu d'investigación y desarrollu sobre la llucha cuerpu a cuerpu del Dynamo a lo llargo del sieglu XX.

Hai tamién otra teoría que suxer que'l Systema ye en realidá un sistema internu modernu, basáu n’artes marciales internes chines como’l Taiji qigong, Taijiquan y otros. Los rusos taben interesaos nes artes marciales internes chines muncho enantes de la Segunda Guerra Mundial, pero fixeron una investigación a fondu nos años 1950 y 1960. Per otru llau, dellos maestros de China visitaron Rusia daquella y participaron "n’esperimentos y enseñando a soldaos"^[10]. Ensin embargu, anque hai delles semeyances nel enfoque, los métodos d'entrenamientu y principios básicos de les artes ruses y de les chines tienen munches diferencies. En realidá, el que muncha xente de China (sobre too de Shanghai) emplegara guardies rusos xuega más a favor del argumentu de que les artes ruses influyeren nes chines.

El Systema considérase al llau de delles tradiciones pre-soviétiques que tán siendo activamente cautivaes pol gobiernu rusu. Nel 2004 el Centru de Deportes Dynamo agospió una demostración y celebración de tradiciones marciales.

Magar qu'inda relativamente desconocíu, el Systema o los estilos rellacionaos tán siendo enseñaos por dellos prauticantes dientro y fuera de Rusia. Tien un interés especial que distintes persones de distinta formación tuvieren enseñando variaciones perpequeñes del Systema.

Amás, pola mor de que los prauticantes entrenen a la so manera y colos sos puntos de vista particulares, l'estilu particular qu'espresen nel so arte ye únicu. Esto apréciase sobre too nos estudiantes veteranos y otros artistes marciales de nivel altu.

El Systema defínese como un arte onde la economía de movimientos y la relaxación son los elementos principales nel combate. Pue tener delles semeyances coles téuniques del Aikido, del Taijiquan y de les artes marciales llamaes "internes" en xeneral.

El so diseñu ta pensáu pa ser mui bien adautable y práuticu. L’entrenamientu faise per mediu d'exercicios basaos na biomecánica del cuerpu humanu, d'exercicios de respiración y d'entrenamientu en pareya, en vez de los kates tradicionales predefiníos. Céntrase principalmente nos seis niveles de palanca del cuerpu (todiyos, rodiyes, cintura, coldos, pescuezu y costazos) asina como na enseñanza de los puntos de presión y les sos aplicaciones, y tamién nos retorciones y nes proyeiciones. Falando acordies, nel Systema nun s’enseñen “téuniques”, sinón que la enseñanza básase más en principios de deprendimientu rellacionaos cola llucha y que favorecen la improvisación en cualesquier circunstancia.

Gólpiase de forma relativamente llibre, a diferencia de la mayoría de les artes marciales orientales; nun hai postures nin secuencies predifiníes. El prauticante ye llibre de desendolcar la so imaxinación. L’aspeutu téunicu refierse más bien a cómo dar los golpes. Nos combates, los golpes solménense de contino; el xestu llévase ensembre a términu. Ye la velocidá del exerciciu la que varia según el nivel de los combatientes, lo que permite descomponer los ataques reales y dir pasu ente pasu aumentando la velocidá. Nel Systema nun hai graos nin vistimienta concreta. Les clases desendólquense al rodiu de dellos exercicios:

• Exerciciu d'ún contra ún.
• Exerciciu en situaciones particulares (sentáu nuna siella, nun corredor, contra armes blanques o de fueu, etc.)
• Exerciciu de munchos contra ún (2, 3, etc.)
• Exerciciu de toos contra toos, o de toos contra ún, llamáu “ataque masivu”:

1) Un grupu ataca a un solu participante arrodiándolu; el defensor tien qu'aprender a movese, a esquitar, a protexese y a escapar.

2) El casu de caún pa sigo: los participantes tienen que ser pa caltenese de contino en movimientu, y nun tentar de controlar l'absorción de golpes, lo que ye imposible. Tienen que tratar de tar relaxaos. Esti exerciciu, como munchos otros, faise principalmente por educación física, pa tar relaxáu cuando ye abegoso.

• Etc.

La respiración ye’l pilpayu del Systema. El deprendimientu y el control d e la respiración van permitir dilir el dolor, solmenar los golpes y atacar con conciencia y eficacia, y tar en bones condiciones fisiolóxiques y sicolóxiques d'aptitú pal combate.

Al final de la clase tolos prauticantes aconceyen en círculu pa falar de los exercicios. Ye’l momentu del deprendimientu teóricu y coleutivu.

Como dellos prauticantes entrenen a los sos deleres y siguiendo’l so propiu métodu, l'estilu de so reflexa cada vez más les sos preferencies y una personalidá única. Esto nótase de manera ente los estudiantes veteranos y otros de nivel altu. D’esta miente creáronse munchos métodos de Systema^[11], siendo los siguientes los más populares:

Fundáu por Aleksey Alekseyevich Kadochnikov (padre) en 1962, y desendolcáu pol xeneral Arkady Alekseyevich Kadochnikov (fíu) y Valentina Aleksandrovna Kadochnikova (fía). El "Systema Kadochnikov"^[12] básase en parte nel Samoz (Sambo) de Spiridonov asina como en delles formes ruses de combate cuerpu a cuerpu de tiempos de la Segunda Guerra Mundial. Aleksey Alekseyevich Kadochnikov yera inxenieru mecánicu. Por esta razón la enseñanza d'esti sistema sofítase nes lleis de la física aplicaes al combate.

Fundáu pol xeneral Alexander Retuinskih en 1990. "ROSS"^[13] (rusu: РОСС) ye un acrónimu que provién de (rusu: Российская Отечественная Система Самозащиты) "Rossiyskaya Otechestvennaya Systema Samozashchity" ("Sistema de Defensa Personal d'Orixe Rusu". Este sistema atalantóse más como una metodoloxía p'agrandar el rindimientu en combate en cualesquier arte marcial, más qu'un sistema zarráu (hestoria del ROSS)^[14]. La esperiencia d'Alexander Retuinskih básase nel boxéu, el Boevoe Sambo y el Combat Sambo (Sambo de combate y militar), el yudu y el Systema Kadochnikov. Inclúi’l Samoz (Sambo) de Spirodonov, el Sambo d'Oshchepkov y de Kharlampiev, y delles variantes d'estilos de llucha como’l Tverian Buza y el Pskovan Skobar, asina como la sistematización d'artes marciales indíxenes eslaves y de los sos métodos d'entrenamientu. Alumnu direutu del xeneral Alexander Retuinskih, Scott Sonnon^[15] ye’l primer americanu n’enseñar y popularizar el sistema de combate ROSS^[16][17] fuera de Rusia.

Fundáu pol coronel Mikhail Ryabko^[18]. Antiguu oficial del Exércitu bermeyu, Mikhail Ryabko formóse como comandu nes fuercies especiales, los Spetsnaz. La influencia principal del so sistema de combate provién de la enseñanza d'ún de los miembros de los Sokoli Stalina, los "Ferres de Stalin": el padre o’l tíu de Mikhail Ryabko (afirmación del Sr. Ryabko non probada a día de güei), que yera ún de los guardies personales de Stalin. Neto que toles artes marciales ruses^[19], el Systema non solamente ye un métodu de combate sinón qu'inclúi tamién un métodu d'exercicios físicos en visu a ameyorar la salú. Esta práutica faise per mediu d'exercicios nel agua frío, masaxes, golpes “curativos” especiales, arriendes de dellos otros exercicios que tienen l'oxetivu d'agrandar drásticamente la fuercia y el tonu a traviés d'una retafila de movimientos naturales del cuerpu. "Poznai Sebia" tórnase del rusu a: “Conozte a ti mesmu”. Mikhail Vasilievich Ryabko ye coronel de los Spetsnaz, instructor xefe del entrenamientu táuticu del equipu de respuesta inmediata y conseyeru del ministru de Xusticia de la Federación Rusa. L'alumnu más conocíu de Ryabko ye Vladimir Vasiliev^[20], antiguu capitán del exércitu y miembru de los Spetsnaz. Xuntos (Ryabko y Vasiliev) reivindiquen la paternidá del sistema por tar basáu nes sos propies esperiencies personales.

Fundáu nel 2001 por Vadim Starov, un antiguu militar de les fuercies especiales (Spetsnaz) del exércitu del aire. Nació en Rusia, nuna familia de tradición militar; so padre yera oficial del exércitu rusu. Dende los once años Vadim entrenó en Sambo y a los catorce años apenzó nel boxéu occidental. A los 23 yera yá diplomáu de l'Academia Militar de les Fuercies Aérees, después de sirvir dos años nes unidaes especiales d'operaciones (los Spetsnaz). De 1994 a 2001 Vadim Starov ye miembru de l'asociación de los antiguos combatientes "Vympel"^[21]. Ye instructor de combate a mano vacía d'estilu rusu, oficial d'operaciones especiales y vicepresidente del serviciu de seguridá de l'asociación de los ciudadanos de Rusia. En 1997 Vadim Starov fíxose miembru de la Organización Internacional d'Antiguos Combatientes de les Fuercies Especiales, "Monolit". Dempués apenzó y participó nel estilu rusu de combate y métodu de defensa personal "Systema Kadochnikov".

Nel 2001 Vadim Starov abrió’l Centru Internacional de Combate a Mano Vacía d'Estilu Rusu na ciudá de Tver. Nel 2002 convidáronlu les fuercies militares ruses a enseñar el combate a mano vacía. Nomáronlu instructor de l'academia militar de Tver onde enseña’l so estilu de combate a mano vacía a más de métodos especiales de sobrevivencia en situaciones estremes. Dende’l 2006, Vadim Starov enseña les téuniques y métodos de combate cuerpu a cuerpu del "Systema Spetsnaz"^[22] a los axentes federales de llucha contra la droga. Tien escrito un llibru sobre l'entrenamientu militar de les fuercies especiales ruses, "La vía de la formación del guerreru", y produxo numberoses películes documentales sobre la formación de los Spetsnaz.

• Demostración de Systema
• Ballistic Striking - Systema Training DVDs
• Spetsnaz Systema Video - disclose.tv Archiváu 2011-10-04 en Wayback Machine
• Systema Bélxica
• Systema Reinu Xuníu
• Systema Francia
• ROSS Escocia
• Montreal Systema - Integrated Fighting Systems