Sylvia Sidney

Sylvia Sidney
Vida
Nacimientu	The Bronx, 8 d'agostu de 1910[1]
Nacionalidá	Estaos Xuníos
Llingua materna	inglés
Muerte	Nueva York, 1 de xunetu de 1999[1] (88 años)
Causa de la muerte	cáncer d'esófagu
Familia
Casada con	Bennett Cerf (es) (1935 – 1936) Luther Adler (1938 – 1946)
Fíos/es	1
Estudios
Estudios	Washington Irving High School (es)
Llingües falaes	inglés[2]
Oficiu	actriz, actriz de teatru, actriz de televisión, actriz de cine
Premios	ver Estrella del Paséu de la Fama de Hollywood Globu d'Oru a la meyor actriz de repartu de serie, miniserie o telefilme  (1986) : Invierno en primavera (es)
Nominaciones	ver Óscar a la meyor actriz de repartu (19 febreru 1974): Summer Wishes, Winter Dreams
Creencies
Relixón	xudaísmu
Partíu políticu	Partido Republicano de California (es)
IMDb	nm0796662

Sophia Kosow (8 d'agostu de 1910, The Bronx – 1 de xunetu de 1999, Nueva York), meyor conocida como Sylvia Sidney foi una actriz d'Estaos Xuníos nomada a los Premiu Óscar y ganadora d'un Globu d'Oru.

Sidney, que'l so verdaderu nome yera Sophia Kosow, nació nel Bronx, Nueva York. La so madre yera Rebecca, una xudía rumana, y el so padre yera Victor Kosow, un inmigrante rusu xudíu. Sidney fíxose actriz a los 15 años como una manera de superar la so gran cobardura, usando l'apellíu del so padrastru como nome profesional. Como estudiante de la Theater Guild's School for Acting, Sidney apaeció en delles de les sos producciones a lo llargo de los años venti, y consiguió crítiques teatrales emponderadores. En 1926 foi afayada por un cazatalentos de Hollywood, y debutó nel cine esi mesmu añu.

Mientres la Depresión, Sidney intervieno en numberoses películes, de cutiu nel papel de l'amiga o la hermana d'un gánster. Trabayó xunto a estrelles de la categoría de Gary Cooper, Spencer Tracy, Henry Fonda, Joel McCrea, Fredric March, George Raft —un compañeru frecuente nes sos películes—, y Cary Grant. Ente les sos películes d'esti periodu pueden mentase An American Tragedy, City Streets y Street Scene, toes de 1931; Sabotage (Sabotaxe), d'Alfred Hitchcock, y Fury, de Fritz Lang, dambes de 1936; You and Me, You Only Live Once y Dead End (Caleyón ensin salida), los dos de 1937.

La so carrera menguó daqué mientres los años cuarenta. En 1952, fixo'l papel de Fantine en Les Misérables (Los miserables), rexistru que foi bien allabáu y que-y dio la oportunidá de desenvolvese como una actriz de calter. Recibió una nominación al Óscar a la meyor actriz de repartu pol so papel en Summer Wishes, Winter Dreams (Deseos de branu, suaños d'iviernu) de 1973, premiu que se llevó l'actriz de 10 años Tatum O'Neal.

Yá mayor siguió interpretando papeles secundarios, y yera identificable pola so voz ronca, resultáu del so tabaquismu. Foi la terrible Miss Coral na versión filmada de I Never Promised You a Rose Garden (Nunca te prometí un xardín de roses). Interpretó a la güela d'Aidan Quinn na producción televisiva An Early Frost, pola cual ganó un Globu d'Oru. Tamién tuvo papeles importantes en Beetlejuice, dirixida por Tim Burton —fan de Sidney—, y en Used People (Romance serondiegu), xunto a Jessica Tandy, Marcello Mastroianni, Marcia Gay Harden, Kathy Bates y Shirley MacLaine. Tamién trabayó en Damien Omen 2 (La profecía II).

La so última interpretación foi n'otra película de Burton, Mars Attacks!, na cual interpretaba a una vieya senil que la so música —de Slim Whitman— frena una invasión alienígena de Marte.

En televisión, interpretó a la imperiosa madre de Gordon Jump nel episodiu piloto de WKRP in Cincinnati, a la solmenada güela de Melanie Mayron na serie Treintaytantos y, finalmente, a la malhumorada axente de viaxes de la reposición de 1998 de la serie Fantasy Island, con Malcolm McDowell, Fyvush Finkel y Madchen Amick.

Sidney tuvo casada tres veces: con Bennett Cerf de 1935 a 1936, col actor Luther Adler dende 1938 hasta 1947 —y col que tuvo'l so únicu fíu, Jacob, que finó primero que ella— y finalmente tuvo casada col productor de radio Carlton Alsop dende 1947 hasta 1951. Finó en Nueva York a los 88 años, tres una carrera de más de 70 años.

Sidney tien una estrella nel Paséu de la Fama de Hollywood, nel 6245 de Hollywood Boulevard, pola so contribución al cine.

• 1996 - Mars attacks!
• 1988 - Beetlejuice (Bitelchús)
• 1978 - Damien: Omen II
• 1945 - Sangre sobre'l sol
• 1937 - You Only Live Once
• 1938 - You and Me
• 1936 - Fury
• 1931 - City Streets

• Esta obra remanez de la traducción de Sylvia Sidney de Wikipedia - inglés, espublizada polos sos editores baxo la Llicencia de documentación llibre de GNU y la Llicencia Creative Commons Atribución-CompartirIgual 3.0 Unported.

• Wikimedia Commons acueye conteníu multimedia sobre Sylvia Sidney.
• Sylvia Sidney - Fotografíes.