Luis Adaro y Magro

Luis Adaro y Magro
Direutor del Institutu Xeolóxicu y Mineru d'España 1910 - 1915
Vida
Nacimientu	Madrid[1], 17 d'abril de 1849[2]
Nacionalidá	España
Muerte	Madrid, 21 d'ochobre de 1915[2] (66 años)
Estudios
Llingües falaes	castellanu
Oficiu	empresariu, inxenieru de mines
Emplegadores	Duro Felguera

Luis Adaro y Magro (17 d'abril de 1849, Madrid – 21 d'ochobre de 1915, Madrid) foi un inxenieru y empresariu asturianu, bien importante nel puxu algamáu pola minería nel Principáu y nel desarrollu xeneral d'Asturies. Foi calificáu de verdaderu empresariu schumpeterianu.^[3]

Cursó estudios na Escuela de Mines dende los dieciséis años, algamando'l títulu d'inxenieru de mines en 1872. Tres les sos práutiques nes mines d'Almadén pasa al distritu mineru d'Asturies. Dirixe la Sociéte D`Eichthal et Comp (Mina Mosquitera, onde instaló'l primer llavaderu mecánicu, a partir del que se divulgó la innovación), y les mines pozu María Luisa y La Xusta.

Llevó a cabu un intensu llabor políticu y empresarial en defensa de los intereses hulleros (tarifes de los ferrocarriles de Llangréu, publicación de Los carbones asturianos y la Marina de Guerra, 1878), impulsando la creación de diverses instituciones: el Créditu Industrial Xixonés (llueu Sociedá Anónima Adaro), la Fábrica de Productos Químicos d'Aboño, la Caxa d'Aforros y la Caxa de Socorros pa enfermos, la Cámara de Comerciu de Xixón (cola que celebró una esposición internacional, considerada como'l guañu de la actual FIDMA), el Sindicatu del Puertu d'Avilés, la Unión Minera y Metalúrxica d'Asturies (1883), la Comisión d'estudiu de la riqueza hullera nacional, etc.

Ente otros trabayos, xestionó la construcción del ramal Soto Rei - Ciañu Santa Ana, del Ferrocarril del Norte; propunxo, con Alejandro Pidal y Mon, la llocalización d'El Musel pal puertu de Xixón, (1900); y dende 1909 dirixó los trabayos de realización del Mapa Xeolóxicu d'España.^[4] En Sama llevantóse un monumentu nel so honor conocíu popularmente como "La Carbonera".

• Wikimedia Commons acueye conteníu multimedia sobre Luis Adaro y Magro.