Jean Paul Getty

Jean Paul Getty
Vida
Nacimientu	Minneapolis[1], 15 d'avientu de 1892[2]
Nacionalidá	Estaos Xuníos [3]
Muerte	Guildford, 6 de xunu de 1976 (83 años)
Sepultura	Pacific Palisades[4]
Causa de la muerte	insuficiencia cardiaca
Familia
Padre	George Getty
Madre	Sarah Catherine McPherson Risher
Casáu con	Jeannette Dumont (en) (1923 – div. 1926)[5] Allene Ashby (en) (1925 – )[5] Adolphine Helmle (en) (1928 – div. 1932)[5] Ann Rork Light (1932 – div. 1936)[6] Theodora Getty Gaston (1939 – div. 1958)[5]
Pareyes	Ursula d'Abo
Fíos/es	Gordon Getty[7] John Paul Getty, Jr. (es) Jean Ronald Getty[7] Timothy Getty (en) [7] George Franklin Getty II (en) [7]
Hermanos/es	Gertrude Lois Getty (en)
Pueblu	Getty (es)
Estudios
Estudios	Magdalen College (es) John H. Francis Polytechnic High School (en) Universidá del Sur de California Universidá de California en Berkeley Harvard-Westlake School (es)
Nivel d'estudios	economía ciencies polítiques
Llingües falaes	inglés[8]
Oficiu	coleicionista d'arte, autobiógrafu, entamador, industrial, mecenes
IMDb	nm1535011

Jean Paul Getty (15 d'avientu de 1892, Minneapolis – 6 de xunu de 1976, Guildford) foi un empresariu d'Estaos Xuníos y fundador de la compañía Getty Oil.

Nacíu en Minneapolis, Minnesota, nuna familia petrolero, foi unu de los primeros nel mundu con una fortuna superior a los 1.000 millones de dólares. Ávidu coleicionista d'arte y antigüedaes, la so coleición y la so casona de Malibú fueron la base del Muséu J. Paul Getty en California.

Pasó pola universidá del sur de California, y por Berkeley antes de graduase en 1914 pol Magdalen College, Oxford n'Económiques y Ciencies Polítiques. Trabayó mientres los branos nos campos petroleros de so padre n'Oklahoma. Consiguió'l so primer millón de dólares en 1916 cola so primer compañía petrolera en Tulsa. Al añu siguiente anunció la so retirada a Los Angeles pa convertise nun playboy. Anque más tarde volviera a los negocios, Getty perdiera'l respetu de so padre. Poco primero de que George Franklin Getty morriera en 1930, pensaba que Jean Paul llevaría la empresa familiar a la ruina, y asina lo comunicó.

Treslladóse a Inglaterra nos 50, onde vivió y trabayó, hasta la so muerte, en Sutton Place, una casona del sieglu XVII cerca de Guildford.

Getty casóse en cinco ocasiones: con Jeanette Tremont (1923–25), Allene Ashby (1926–28), Adolphine Hemle (1928–32), Ann Rork (1932–35), y Theodora Lynch. Tuvo cinco fíos: George Franklin Getty II (muertu en 1973) cola so primer muyer, Jean Ronald Getty cola tercera, John Paul Getty y Gordon Getty cola cuarta, y Timothy Getty (fináu con 12 años d'edá) cola so última esposa.

Getty escribió un llibru d'enforma ésitu tituláu How to be Rich (Cómo ser ricu). El so negociu petroleru foi heredáu de so padre, quien empezó'l negociu.

Getty reconoz dafechu esto na so autobiografía:

«Esfruté de la ventaya de nacer nuna familia rica, y cuando empecé la mio carrera empresarial taba subvencionáu por mio padre. Anque faía dineru —y abondo— pola mio cuenta, duldo que l'imperiu Getty esistiera güei si nun heredara'l negociu de mio padre tres la so muerte».

(Getty, 1976, pg.336).

«¿El mio secretu pa ser ricu? Llevantame ceo, trabayar hasta tarde y atopar petroleu».

J. Paul Getty

«Yo prefiero'l 1 % del esfuerciu de cien persones que'l 100 % del mio propiu esfuerciu».

Ye cierto que Getty tenía un teléfonu de monedes instaláu en Sutton Place. De toes formes, la razón d'esto ye desaxeradamente simple. Na so propia autobiografía (Getty, 1976, pg.319):

"Meses dempués d'adquirir Sutton Place, muncha xente entraba y salía de la casa. Dalgunos yeren homes de negocios de visita. Otros artesanos y trabayadores contrataos pa la renovación y restauración. Inclusive otros yeren comerciantes faciendo la repartida. De sópitu les factures telefóniques empezaron a aumentar. La razón taba clara. Cada teléfonu regular na casa tenía accesu direutu a llinies esternes y por tanto a llamaes de llarga distancia o inclusive operadores internacionales. Tou tipu de xente aprovechaba al máximu esta rara oportunidá. Utilizaben los teléfonos de Sutton Place pa faer llamaes a novies en Xinebra o Xeorxa y a tíes, tíos o primos terceros en Caracas o Ciudá del Cabu. Los costos de les sos llamaes, yeren, poques gracies, cargaos a la factura de Sutton Place. Asina, la única solución foi bloquiar les llamaes nos teléfonos regulares, llindando'l so usu a personal autorizáu, ya instalóse una cabina pal restu."

En 1973, el so nietu, John Paul Getty III, foi secuestráu. Son comunes les informaciones qu'indiquen que Getty refugó pagar el rescate hasta que recibió la oreya derecha del neñu. A la fin el so nietu foi lliberáu. Pero esta hestoria simplifica demasiao los fechos del casu.

Getty defende'l so refugu inicial a pagar el rescate con dos razones. Primero, argumenta que tenía otros 14 nietos, y que sometese a les demandes de los secuestradores pondríalos en riesgu frente a répliques d'esti secuestru.

Segundu:

"La segunda razón del mio refugu tien una base muncho más amplia. Entiendo qu'aportar a les demandes de criminales y terroristes namái garantiza l'aumentu y dispersión de la illegalidá, violencia y otres amenaces como'l terrorismu, secuestros aéreos y a la cacería de rehenes que plaguen el nuesu mundu presente."

(Getty, 1976, pg.139)

• How to be Rich, Coleición d'ensayos.
• As I See It: The Autobiography of J. Paul Getty , Autobiografía, publicada poco primero de la so muerte.

• Esta obra remanez de la traducción parcial de Jean Paul Getty de Wikipedia - inglés, espublizada polos sos editores baxo la Llicencia de documentación llibre de GNU y la Llicencia Creative Commons Atribución-CompartirIgual 3.0 Unported.

• Wikiquote tien frases célebres suyes o que faen referencia a Jean Paul Getty.