Galaxa con biltu estelar

Galaxa con biltu estelar
tipu d'oxetu astronómicu

Les galaxes con biltu estelar son aquelles galaxes nes que tien llugar una tasa de nacencia d'estrelles bien cimera a la d'una galaxa normal, en súper cúmulos estelares. Estos biltos estelares pueden detectase con telescopios d'infrarroxos o rayos X ente otros.

NGC 6946, M 82, y NGC 253 son bonos exemplos de galaxes con biltos estelares. Na galaxa NGC 4303, una galaxa activa de tipu Seyfert 2 de poca lluminosidá, reparóse la formación estelar gracies al Chandra y el STIS, coles sos téuniques d'ultravioleta. Na Gran Nube de Magallanes tamién s'alcontró col satélite xaponés/européu AKARI estrelles en formación.

Esisten delles definiciones del términu galaxa de biltu estelar y nun hai una definición exacta na que los astrónomos tean d'alcuerdu. Sicasí, munchos d'ellos concuerden en que la so definición tien de dir acompañada por dalgún d'estos trés factores:

1. el ritmu nel que la galaxa ta convirtiendo'l gas n'estrelles (la tasa de formación estelar, o TFE)
2. la cantidá disponible de gas del que les estrelles pueden tar formaes
3. la comparanza del plazu de la formación de la estrella col añu p el periodu de rotación de la galaxa.

La clasificación de la categoría del biltu estelar nun ye fácil una y bones les galaxes con biltu estelar nun representen un tipu específicu en sí mesmes. Los biltos estelares pueden ser de galaxes espirales, y galaxes irregulares de cutiu presenten nuedos de biltu estelar, de cutiu en toa ella. Sicasí, dellos subtipos de biltu estelar son anguaño oxetu de bancia ente los astrónomos:

• Galaxes Compactes Azules (GCA). Estes galaxes tienen comúnmente una masa pequeño, metalicidá baxa, y pocu polvu interestelar. Esto últimu y contener un gran númberu d'estrelles templaes y nueves, fai que tengan de cutiu colores azules y ultravioletes.

• Galaxes Infrarroxes Ultraluminosas (GIUL). Tas galaxes son oxetos bien ricos en polvu, qu'amazcara'l biltu estelar. La radiación ultravioleta producida pola formación d'estrelles ye absorbida pol polvu y reirradiada nel espectru infrarroxu en llargores d'ondes alredor de 100 micrometros. Esto esplica los colores coloraos estremos acomuñaos a les GIUL. Nun se sabe a ciencia cierta si la radiación UV ye puramente producida pola formación estelar, dellos astrónomos creen que les GIUL son alimentaes por galaxes actives. Les observaciones de rayos X de munches GIUL que trespasen el polvu danos a entender que munchos biltos estelares son sistemes de nucleu doble, sosteniendo la hipótesis de que les GIUL son alimentaes por formaciones estelares disparaes por grandes fusiones ente galaxes. Exemplos d'ésta clase son Arp 220 y NGC 6240.

• Galaxes de Wolf-Rayet, onde gran parte d'estrelles brilloses son estrelles de Wolf-Rayet cómo por casu NGC 4214.

• Galaxes Baby Boom, onde, inclusive según los estándares de les galaxes de biltu estelar, fórmense un gran númberu d'estrelles. [1]

Esencialmente por que se produza'l biltu estelar, ye necesaria una gran concentración d'hidróxenu nun área pequeña, que puede causase de distintes maneres cómo por casu la presencia d'una barra que conduza'l gas al centru galácticu ónde s'estrúi y empecipia el biltu (el casu de por casu NGC 253) ya interacciones ente galaxes tantu si topeten ente sigo (por casu lo qu'asocede na Galaxes de les Antenes), cómo si non, provocándose nesti postreru caso inestabilidaes nel discu de la(s) galaxa(s) implicaes qu'acaben per concentrar y estruyir el gas dando asina llugar al biltu (por casu la galaxa M82)-

L'interior d'un biltu estelar ye un mediu estremu. Tien gran cantidá d'hidróxenu molecular que forma estrelles masives bien lluminoses tremaes en cúmulos estelares, asociaciones OB, ya inclusive en super cúmulos estelares, que son la fonte de potentes vientos estelares y ionizan el gas (principalmente hidróxenu) creando grandes región HII alredor d'elles. El tiempu de vida d'ésos astros ye astronómicamente curtiu y acaben per españar cómo supernoves ó inclusive cómo hipernoves nel casu de les más masives. Los remanentes de supernova d'éstes interaccionan col mediu interestelar del biltu pudiendo producir másers naturales amás de -xunto a los mentaos vientos estelares- espulsar material fora de la galaxa (un fenómenu vistu en por casu les yá mentaes galaxes NGC 253 y M82)

L'estudiu de galaxes con biltu estelar cercanos puede ayudar a descifrar la formación y evolución galáctiques. Numberoses galaxes distantes reparaes nel Campu Fondo del Hubble son d'ésti tipu, pero la so gran distancia fai que nun puedan estudiase en detalle. Desafortunadamente, los exemplos cercanos son bastante raros y la so bayura va aumentando cuánto más lloñe tean de la nuesa galaxa, lo que s'esplica considerando que nel pasáu, fai dellos miles de millones d'años, taben más cercanes ente sigo y con ello los choques ya interacciones gravitatories ente elles yeren muncho más comunes que güei.

Amás de les yá mentaes, otros exemplos de galaxes con biltu estelar son NGC 2903 y NGC 4449, y nel Catálogu Messier M83, M90, M95, y M100.

• Starburst

• Wikimedia Commons tien conteníu multimedia tocante a Galaxa con biltu estelar.