David Carradine

David Carradine
Vida
Nacimientu	Hollywood[1], 8 d'avientu de 1936[2]
Nacionalidá	Estaos Xuníos
Muerte	Bangkok[3], 3 de xunu de 2009[4] (72 años)
Sepultura	Forest Lawn Memorial Park
Causa de la muerte	asfixia erótica (es)
Familia
Padre	John Carradine
Madre	Ardanelle McCool
Casáu con	valor desconocíu (1960 – div. 1968) valor desconocíu (1977 – div. 1983) valor desconocíu (1986 – div. 1997) valor desconocíu (1998 – div. 2001) valor desconocíu (2004 – m. 2009)
Pareyes	Barbara Hershey
Fíos/es	Calista Carradine[5]
Hermanos/es	Bruce Carradine Keith Carradine Robert Carradine
Familia	ver Mariah Carradine (nieta)[6]
Pueblu	Carradine family (en)
Estudios
Estudios	Universidá Estatal de San Francisco Bayard Rustin Educational Complex (en) Oakland High School (en) Laney College (en)
Llingües falaes	inglés[7]
Oficiu	actor de cine, direutor de cine, productor de cine, actor de voz, actor de xéneru, actor de televisión, guionista, productor de televisión, actor
Altor	181 cm
Premios	ver Estrella del Paséu de la Fama de Hollywood Theatre World Award  (1966) [8] Premios Saturn  (2005)
Xéneru artísticu	western
Discográfica	Polydor Records
Creencies
Partíu políticu	Partíu Demócrata
IMDb	nm0001016
david-carradine.com

David Carradine (8 d'avientu de 1936, Hollywood – 3 de xunu de 2009, Bangkok), nacíu John Arthur Carradine, foi un actor americanu, perconocíu pol so papel de Kwai Chang Caine na serie de televisión de los años 1970 Kung Fu, y la so derivación de los años 1990, Kung Fu: La Lleenda Sigue, arriendes del telefilme de 1986 Kung Fu: La Película. Foi miembru d'una granible dinastía familiar d'actores qu'entamó con so padre, John Carradine. La so carrera como actor, qu'incluyó tanto papeles importantes como menores na escena, na televisión y nel cine, duró cuatro décades. Foi un productible actor de “serie B”, qu'apaeció en más de 100 llargumetraxes y foi nomáu cuatro veces al Premiu Golden Globe. L'últimu nomamientu foi pol so papel central en Kill Bill, de Quentin Tarantino.

Carradine yera fíu del actor John Carradine, hermanu de Bruce, hermanascu de Keith y Robert Carradine y de Michael Bowe, y tíu de les actrices Ever Carradine y Martha Plimpton. Estudió arte dramáticu na Universidá Estatal de San Francisco enantes de trabayar como actor de cine y televisión.

El 4 de xunu de 2009, Carradine foi alcontráu muertu nun cuartu del hotel Park Nai Lert en Bangkok (Tailandia). Anque los medios llocales informaron de mano que Carradine se suicidara aforcándose nel escusáu del so cuartu nel hotel, el so axente afirmó llueu que la muerte del actor produxérase por causes naturales. Informaciones posteriores indicaron que la muerte nun foi por causes naturales nin tampoco un suicidiu, sinón una muerte accidental por asfixa autocausada al envís d'aumentar la so escitación demientres se masturbaba.

Aparte del so renomáu papel como Kwai Chang Caine en bien dellos episodios, Carradine algamó nomadía como 'Big' Bill Shelly nel filme Boxcar Bertha (Martin Scorsese, 1972), como'l cantante folk Woody Guthrie n'Esta tierra ye mio tierra (Hal Ashby, 1976, como Abel Rosenberg nel filme El güevu de la culiebra (Ingmar Bergman, 1977), como Cole Younger en Foraxíos de lleenda (Walter Hill, 1980), como Bryant en Ríu abaxo (José Luis Borau, 1984), o como Bill en Kill Bill vol. 1 (2003) y Kill Bill vol. 2 (2004), dambos dirixíos por Quentin Tarantino.

Apaeció tamién en numberosos telefilmes, como en Tú y Yo (1975) o Americana (presentáu al Festival de Cannes en 1981), dambos dirixíos por él mesmu; o Norte y Sur (1985).

Carradine ye tamién conocíu por producir y interpretar dellos videos nos qu'enseñaba les artes marciales del Tai chi y Qi Gong.

Carradine nun sabía un res de la práutica del kung fu cuando lu escoyeron pal papel de Kwai Chang Caine, pero enfotóse empara na so esperiencia como baillarín. Tamién tenía dalguna esperiencia n'esgrima, en boxéu y en llucha caleyera. Pa la primer temporada de la serie orixinal, David Chow facilitó-y asistencia téunica en kung fu. Dempués foi Kam Yuen el que-y aportó los sos conocimientos. Solo cuando quitaron la serie empecipió Carradine a estudiar artes marciales, primero con Kam Yuen y más tarde con Rob Moses, un estudiante de Yuen. Nunca se consideró a sí mesmu como un maestru del arte, sinón más bien como un divulgador del kung fu. Pal 2003 yá algamara abonda esperiencia nes artes marciales como pa producir y protagonizar dellos videos instructivos sobre Tai chi y Qi Gong. Nel 2005, Carradine visitó'l Monesteriu Shaolin d'Henan, China, como parte de los conteníos estra de la tercer temporada de los DVD de Kung Fu. Nesta visita l'abá, Shi Yongxin, dixo que reconocía la importante contribución de Carradine al espardimientu del Monesteriu Shaolin y la cultura del kung fu, a lo qu'él retrucó "Toi encantáu de ser útil."^[9]

Arriendes de la so carrera como actor, David Carradine foi un músicu talentosu. Cantaba y tocaba'l piano, la guitarra y la flauta, ente otros instrumentos.^[10] Los sos talentos musicales integrólos de cutiu nes sos actuaciones tres la pantalla. Fixo delles canciones de Woody Guthrie pa la película Esta tierra ye mio tierra. Pa la serie Kung Fu fixo flautes de bambú qu'incluyó ente los preseos que salíen en pantalla. Dempués fixo delles flautes pa la película El círculu de fierro, y una d'elles había sacala más tarde en Kill Bill. Carradine escribió y cantó los temes principales de polo menos dos películes nes que participó, Americana y Sonny Boy. La primer llinia del tema de Sonny Boy, Paint, qu'escribió cuando facía Americana en Drury, Kansas, en 1973, ta grabada na so sepultura.^[11] Escribió y cantó delles canciones p'American Reel (2003) y fixo la partitura de Tú y Yo. Xunto col so hermanu Robert tocaba tamién con una banda, el Cosmic Rescue Team Archiváu 2011-02-01 en Wayback Machine (tamién conocíos como Soul Dogs), qu'actuaba sobre too en pequeños llocales.

• Carradine apaez nun episodiu de la serie de Disney, Lizzie McGuire. Nesti episodiu, nuna película de Jet Li tán buscando rapacinos de la edá del hermanu de Lizzie, Matt, pal papel coprotagonista. Carradine interpreta a un vieyu collaciu del padre de Lizzie, Sam McGuire, qu'apriende a Matt dellos movimientos d'Kung fu pal so videu de l'audición. Cuando-y entruguen cómo conoz al personax de Carradine, el señor McGuire respuende crípticamente: "Ye como un hermanu pa mi." Ye una broma del actor qu'interpreta a Sam McGuire (Robert Carradine), que ye hermanastru de David Carradine na vida real. Amás, una gran parte del episodiu ta ocupada pol asonsañamientu de Kung Fu (el proyeutu más famosu de Carradine dempués de Kill Bill).

• David Carradine participa tamién nel videu Burning'Up colos Jonas Brothers. Equí interpreta tamién a un profesor de Kung fu qu'aida a Kevin a salvar a la guapa mocina en peligru.

• David Carradine, Endless Highway, Boston, Journey Editions, 1995.
• Herbie J. Pilato, The Kung Fu Book of Caine: The Complete Guide to TV's First Mystical Eastern Western, Boston, Charles A. Tuttle, 1993.

• Wikimedia Commons acueye conteníu multimedia sobre David Carradine.
  • Páxina web oficial (n'inglés)
• David Carradine na Internet Movie Database (n'inglés)
• David Carradine na Internet Broadway Database (n'inglés)
• David Carradine n'AllMovie (n'inglés)
• «David Carradine». en Find a Grave. (n'inglés)
• Sitiu oficial de David Carradine
• David Carradine Family Tree