Bushido

Bushido (“el camín del guerreru”) ye un estrictu códigu de principios morales que los samuráis xaponeses taben obligaos a siguir tola so vida, y al que teníen que s’axustar inclusive nel momentu de la muerte.

El términu Bushido (武士道, bushidō) ye’l resultáu de lleer en xaponés los caráuteres chinos 武士道 (wu shi dao), que lliteralmente signifiquen “la via del guerreru”, d'esta miente: bu refierse a les “téuniques de guerra”, shi a “guerreru”, y dō a “la vía”.

La primer mención d'esta pallabra alcuéntrase nel Kōyō Gunkan, escritu alredor del 1616, anque l'apaición del conceutu vencéyase al feudalismu xaponés y a los primeros shogun de la dómina de Minamoto no Yoritomo, nel sieglu XII.

Esti códigu éticu recibe del Budismu la resistencia estoica y el respetu pol peligru y pola muerte; del Sintoísmu, la veneración pola patria y pol emperador; del Confucionismu (per aciu sobre too de Confucio y de Mencio), daqué cultura lliteraria y artística, asina como la ética de les rellaciones sociales ente padre y fíu, amu y sirviente, cola muyer, colos hermanos, colos amigos…

La mayoría de los samuráis dedicaben les sos vides al bushido, un códigu estrictu qu'esixía llealtá y honor hasta la muerte. Si un samurái nun yera quien a caltener l'honor de so, podía recobralu cometiendo seppuku (suicidiu ritual), más conocíu n’Occidente pol términu harakiri o "actu de cortase’l vientre" (hara: "el vientre", sede del ki, potencia o enerxía; y kiri: "cortar").

Hai que tener en cuenta ensin embargu una diferencia significativa ente l'harakiri y el seppuku. El seppuku permitía a un guerreru derrotáu suicidase y poder asina morrer con honor, mientres que l'harakiri yera una manera de suicidase onde la persona quedaba tres el xestu ensin l'honor perdíu. Nel Xapón feudal falábase d'harakiri d'una persona que se daba muerte llueu por exemplu d'una vergoña (adulteriu por casu), y de seppuku cuando se daba la muerte tres asumir una derrota (un guerreru que perdía una batalla). Esta diferencia ye sutil, pero importante pa pescanciar el bushido.

Na so forma más pura, el bushido esixe a los sos siguidores que xulguen eficazmente’l momentu presente a respeutive de la so propia muerte, como si yá nun fueren d'esti mundu. Esto ye sobre too cierto pa les primeres formes de bushido o de budo. Per otra parte los tradicionalistes critiquen les formes más serondes qu'impliquen un espíritu de siguir con vida.

• 義, Gi: Honestidá y xusticia. Ser mui honestu nel tratu colos demás; creyer na xusticia que vien non de los demás, sinón d'unu mesmu. El verdaderu samurái nun tien duldes sobro la cuestión de la honestidá y de la xusticia. Trátase solamente de lo que ta bien y lo que ta mal.
• 勇, Yu: Valor heroicu. Tar perriba les mases que tienen medrana d'actuar. Escondese como una tortuga nel cascu nun ye vivir. Un samurái tien que posiar un valor heroicu, lo que ye enforma arriesgao y peligroso, y significa vivir d'una manera completa, plena y maraviyosa. El corax heroicu nun ye ciegu, sinón intelixente y fuerte.
• 仁, Jin: Compasión. L’intensu entrenamientu fai al samurái rápidu y fuerte. Ye diferente de los demás, algama un poder que tien que s’utilizar pal bien común. Tien compasión, aprovecha cada oportunidá p'aidar a los demás, y si esa oportunidá nun se presenta fai tolo posible p'atopar una.
• 礼, Rei: Educación cortés. Los samuráis nun tienen motivos pa comportase de manera cruel, nun ye necesario qu'amuesen la so fuercia. Un samurái ye cortés, incluso colos sos enemigos. Sin esta muestra de respetu esterior un home ye poco más qu'un animal. El samurái ye respetáu non sólo pola so fuercia na batalla sinón tamién por cómo se rellaciona con otros homes.
• 誠, Makoto o 信, Shin: Sinceridá total. Cuando un samurái espresa la so intención d'actuar, esto yá ta práuticamente fecho, nada va torga-y llevar a cabu la so intención. Nun tien necesidá nin de dar la so pallabra nin de prometer. Falar y actuar son la mesma cosa.
• 名誉, Meiyo: Honor. Sólo hai un tribunal d'honor pal samurái: él mesmu. Les decisiones que tome y les aiciones resultantes son un reflexu de quién ye en realidá. Unu nun pue afuxir de sí mesmu.
• 忠義, Chugi: Deber y llealtá. Pal samurái facer o espresar daqué equival a ser el responsable. Responsabilízase dafechu de los resultaos. El samurái ye dafechamente lleal a les persones a les que curia. Permanez intensamente fiel a les persones de les que ye responsable.

Cola modernización radical del Xapón a resultes de la Restauración Meiji (1868), desanicióse la esistencia de les castres y los samuráis perdieron el so estatutu particular como una especie de policíes feudales, los únicos autorizaos pa llevar espaes.

Subordinaos al emperador, munchos samuráis aceutaron la reforma y convirtiéronse principalmente en cabezaleros del exércitu imperial xaponés que taba formándose, asina como en políticos y más tarde en líderes industriales.

D’esta miente, pa finales del sieglu XIX munchos miembros de les grandes familiaes de la nobleza recibieron del gobiernu les riendes de lo qu'habíen ser los zaibatsu, grandes conglomeraos industriales y comerciales, como Mitsui, Mitsubishi, Sumitomo, etc. Estes empreses foron les primeres estructures verdaderamente capitalistes de Xapón y la columna vertebral del espansionismu de la era Showa. Estos cabezaleros, antiguos samuráis, organizaron les sos empreses según los valores de la so propia ética: el bushido.

Esti conceutu, xunto colos fundamentos ideolóxicos del espansionismu xaponés (hakko ichiu), foi una de les causes de la xuba del militarismu a principios de la era Showa (1926-1989). Daquella’l gobiernu imperial impunxo’l bushido nes diferentes estayes del Estáu y de les fuercies armaes, al envís de dotar a les sos instituciones d'un espíritu corporativu de carís vertical y enforma ríxidu, qu'esixía los mayores sacrificios a los sos subordinaos. Tamién, na Segunda Guerra Mundial, siguíen esti códigu los soldaos allistaos nes files de les unidaes especiales kamikaze. Toes estes razones llevaron a la prohibición poles autoridaes aliaes d'ocupación de munches de les artes marciales más arraigonaes nel bushido.

Pue considerase qu'anguaño’l bushido tovía ta presente na organización social y económica del Xapón, darréu que ye la forma de pensar qu'estructuró históricamente l'actividá capitalista nel sieglu XX. Les rellaciones empresariales, la estrecha rellación ente l'individuu y el grupu al que pertenez, les nociones de confianza, respetu y harmonía nel mundu xaponés de los negocios, básense direutamente nel bushido. Esti taría entós nel orixe de la ideoloxía de l'harmonía industrial del Xapón modernu, que permitió que’l país se convirtiera, tres el milagru económicu xaponés na posguerra de los años 1950-1960, nel líder de la economía asiática.

Antaño, al samurái nuevu aprendíen-y 18 artes marciales, de les que dos convirtiéronse en fundamentales: el Kenjutsu (antiguu arte de la esgrima del que procede’l Kendo) y les formes de llucha a manes vacíes, ente les que destacaben el sumai, antepasáu del sumo, y el Jujutsu. Falar de bushido implica facelo de la ética guerrera; poro añadíense a la formación del samurái’l tiru con arcu, la equitación, etc., arriendes de conocimientos de lliteratura, caligrafía y pintura.

Actualmente les artes marciales xaponeses antigües (Koryu Budo), y les modernes Gendai Budo, como l'aikido, kárate, yudu, kyudo, iaido o kendo, deben gran parte de la so base filosófica y moral a los conteníos filosóficos del bushido. Reflexen por casu’l bushido nos diferentes códigos de conducta, o dojo kun, qu'entá s’aprienden nes sales d'entrenamientu (dojo). Antiguamente talos códigos buscaben qu'en tiempos de paz el guerreru s’adautara sicolóxicamente a la sociedá civil. En cambéu anguaño busquen complementar con conteníos éticos la educación física del prauticante.

• Artes marciales de Xapón
• Budo
• Llibru de los Cinco Aniellos
• Hagakure
• Samurái
• Zen

• "Bushido: el código ético del samurái y el alma de Japón", Inazo Nitobe, Miraguano Ediciones, 2005, ISBN 978-84-7813-293-5
• "BUSHIDO. El camino del samurái" Yamamoto, Tsunetomo, ISBN 978-84-8019-843-1 2005
• "BUSHIDO. El código del Samurái", Inazo Nitobe, ISBN 978-970-732-134-2
• "Budo wo Shiru Tanaka, M. Todo, Y. Higashi, K. Murata, N., Fumaido Shuppan,2000.
• "Budo-Shi Shin Jumbasu Watanabe, I. (ed.) Shiryo Meiji, Oraisha, 1971.
• "Samurái Fighting Arts, The Spirit and the Practice, Fumon Tanaka, ISBN : 978-4-7700-2898-3 / 4-7700-2898-9, Kodansha Int. 2003
• "Martial Arts And Ways Of Japan" Vol I. Donn F. Draeger, Weatherhill, 2007 ISBN 0-8348-0233-3 ISBN 978-0-8348-0233-9
• "Martial Arts And Ways Of Japan" Vol II. Donn F. Draeger, Weatherhill, 2007 ISBN 0-8348-0234-1 ISBN 978-0-8348-0234-6
• "Martial Arts And Ways Of Japan" Vol III. Donn F. Draeger, Weatherhill, 1996 ISBN 0-8348-0351-8 ISBN 978-0-8348-0351-0
• "Comprehensive Asian Fighting Arts" Donn F. Draeger Kodansha International 1981ISBN 0-87011-436-0 ISBN 978-0-87011-436-6
• "Secrets of the Samurai: A Survey of the Martial Arts of Feudal Japan" Oscar Ratti, Adele Westbrook, Booksales 1999, ISBN 0-7858-1073-0 ISBN 978-0-7858-1073-5
• "The Code of the Samurai: A Modern Translation of the Bushido Shoshinshu of Taira Shigesuke" Yuzan Daidoji, Tuttle Publishing 1999 ISBN 0-8048-3190-4 ISBN 978-0-8048-3190-1
• "El Llibru de los Cinco Aniellos" de Miyamoto Musashi

• Bona definición del bushido
• Creu del Samurái Archiváu 2005-08-29 en Wayback Machine
• Sitiu web de William Scott Wilson
• Rellatu de Sakujiro Yokoyama sobre un duelu a espada de samuráis
• La muerte enantes que’l deshonor, por Masaru Fujimoto Archiváu 2003-12-31 en Wayback Machine