ويكيبيديا:طريقة الكتابه

الصفحه دى صفحه سياسه رسميه فى ويكيبيديا مصرى.

السياسه بتشرح القواعد و الشروط اللى لازم كل اللى بيضيف أو يعدل فى ويكيبيديا مصرى يتبعها, السياسات بتبقى رسميه بعد نقاش و اتفاق عليها و ممكن تتعدل أو تتلغى بنفس الطريقه. لو عايز تقترح تعديل, لو سمحت اقترحه فى صفحة المناقشه.

طريقة الكتابه فى ويكيپيديا مصرى النسخه المصريه Wikipedia مكتوبه باللغه المصريه الحديثه اللى بيتكلمها المصريين و مكتوبه زى ما بيكتبوها فى جواباتهم لبعضيهم و فى حياتهم اليوميه. المصريين بيكتبو المصرى فى الروايات, و المسرحيات, و القصايد الشعبيه و كمان فى المجلات الكوميدى و الاعلانات و شوية جرانين.

ممكن يتكتب المصرى بأى طريقة طالما أى مصرى ممكن يفهمها. ما دام تعرف تكتب بالمصرى اكتب اللى تعرفه فى ويكيپيديا مصرى.

1. خد راحتك فى الكتابه طالما مش بتتحيز.
2. حاول تحط المصادر اللى جبت منها كلامك.
3. اكتب, عدّل, ترجم, حول المقالات بس ما تهينش حد.
4. اكتب بالشكل اللى يعجبك, بس القاهريه هيه الطريقه المشهوره لكتابة الكلام المصرى, المهم يفهمها المصريين.
5. حاول تكون محايد.
6. ما تشهّرش بحد.
7. ما تنقلش مواد ليها حقوق نشر محفوظه.
8. حاول تسجل دخولك علشان مساهماتك تتسجل باسمك مش باسم عنوان الIP بتاعك, و ماتنساش تمضى بـ~~~~ فى صفح المناقشه.
9. الغلطات الاملائيه هاتحصل هاتحصل, مافيش مشكله, لأن كل واحد من اليوزرات ممكن يصلحها.
10. حاول دايما تشرح سبب تعديلاتك وبالذات سبب استرجعاتك لتعديلات واحد من اليوزرات التانيين.
11. حاول تشجع و تساعد المساهمين الجداد.
12. ويكيپيديا هى موسوعه مفتوحه ممكن تعدّل و تزوّد فيها, و لو شايف حاجه غلط, صلّحها, طالما مش بتتحيز.

اختار الطريقه اللى تعجبك, و التزم بيها.

1. لو اخترت تكتب فى مقاله بطريقة املا معينه, لو سمحت التزم بنفس الطريقه فى باقى المقاله.
2. ما ينفعش يتكتب بكزا طريقه فى مقاله واحده و فى نفس السطر, و ماينفعش تتكتب كلمه واحده بكزا طريقه فى نفس المقاله (الا لو اتوضّح انها بتتكتب بكزا طريقه فى الاول).
3. لو سمحت ماتغيّرش فى طريقة الاملا فى المقالات, طول ما المقاله كلها مكتوبه بطريقة املا واحده. و لو عاوز تزوّد عليها, اكتب بنفس طريقة الاملا بتاعتها.
4. ممكن تستعمل الحروف دى فى العناوين: ا أ إ آ ب ت ث ج ح خ د ذ ر ز س ش ص ض ط ظ ع غ ف ق ك ل م ن ه ة و ي ء ى.
5. ممكن تستعمل حروف بتوضّح النطق جوّا الصفح, زى پ چ ڤ.
   • السبب هو ان الحروف دى فى العناوين بتخلى المقالات ماتظهرش فى سايتات التدوير, زى مثلا جوجل, لإن ماحدش هايكتب بيهم و هو بيدور على جوجل.
   • حرف چ هو لنطق /ʒ/ زى ما بيستخدم فى مصر, مش /t͡ʃ/ زى الفارسى! النطق التانى بيتكتب بـ تش.
   • حرف ڤ هو لنطق /v/ زى ما بيستخدم فى مصر, مش ڨ التونسى-الجزايرى اللى بيستخدم لنطق /ɡ/. النطق التانى بيتكتب بحرف الـ ج.
6. اكتب فيفا او ڤيڤا. اكتب ايفا او ايڤا, مافيش مشكله.

اهم حاجه تلتزم بطريقة املا واحده فى كتابة الكلام فى نفس الصفحه. بص تحت على الكتابه بالألف-به اللاتينى.

• زى الصفحه دى ماهى مكتوبه، العناوين ف كل جزء مهمين. زى "شوف كمان " أو "وصلات"
• ممكن كل عنوان يكون فيه عناوين فرعيه.
• المصادر تتكتب باسلوب موحد.
• المحتويات بتظهر لما يكون ف الصفحه اكتر من تلت عناوين.
• وصل الصفحات ببعضها بيسهل ان الصفحات تتشاف اكتر.

همزة القطع و همزة الوصل هما مصطلحات مقصود بيها فى العربى كتابة الألف من غير همزه, او فوق او تحت (أ, إ, ا) فى أول الكلام من غير اداة التعريف (ال).

المتماشى عليه فى ويكيپيديا مصرى هو كتابهم بألف من غير همزه.

• كلام لازم يتكتب بالهمزه:
  • الكلام اللى بيبدأ بألف-لام:
    • ألف /ˈʔælef, ʔælf, ʔæˈlef/ (اسم الحرف ا, رقم 1000, تصريف فعل يلف)
    • ألف-به /ˈʔælef be/ بتتجنب نطق /elˈfe be/ الـ فه-به.
    • إليزابيث Elizabeth /eˈlɪzæbes/ بتتجنب نطق /eljæzæˈbiːs/ الـ يزابيث.
    • إلفس Elvis /ˈelvɪs/ بتتجنب نطق /elˈfes/ الـ فس.
  • الكلام اللى فيه ألف بهمزه وسط الكلام:
    • تأمين, تأويل, مأمون
  • باقى اشكال الهمزات:
    • مؤلف, شىء, بدائى
  • ألف-مده "آ"
    • "آل" /ʔæːl/, بمعنى عيله, كلمه بتستخدم كتير فى نظام التسميه فى شبه الجزيره العربيه, عشان تتفرق بين اداة التعريف الـ /el/
    • الصوت ده غالبا بيتقصر فى فونولوجيا اللغه المصرى الحديثه و بيتحول لـ "أ" عاديه. مثلا: أسيا, أرامى (بدل آسيا, آرامى), لكن قرآن (كتابه بديله قرءان), لإن فى الحاله الاخيره, الجزء من الكلمه متركز عليه (stressed)

فى النطق المصرى, صوت الهمزه /ʔ/ (glottal stop) مش بيبان الا فى التشديد (emphasis) و عشان الكلام يتفصل عن بعضه, بعكس النطق النحوى اللى بينطق صوت الهمزه على حسب اصل الكلمه.

كتابة ادوات الجر و ادوات العطف اوضح و اسهل لو تتكتب مفصوله عن الكلمه اللى بتيجى وراها. مثلا: <فى اوروبا> او <ف اوروبا> اوضح و اسهل للقرايه من <فاوروبا>.

لو فيه كلمه من أصل عربى فيها حرف "ق", يتساب زى ما هو.

لو فيه كلمه من أصل عربى او أى لغه فيها حرف/نطق "ث" و بيتنطق \س\, يتساب زى ماهو. و لو بيتنطق \ت\ يتكتب <ت>.

لو فيه كلمه من أصل عربى او أى لغه فيها حرف/نطق "ذ" و بيتنطق \ز\, يتساب زى ماهو. و لو بيتنطق \د\ يتكتب <د>.

لما مش بيكون فى حالة الألف اللينه, حرف ال"ى" هو الشكل التقليدى فى اخر الكلام و اللى ماتغيرش فى مصر. كتابته من غير نقطتين اخر الكلام هى الطريقه اللى سكان وادى النيل متعودين عليها. "ى" او "ي" هما حرف واحد.

المتماشى عليه فى ويكيپيديا مصرى هو كتابته من غير نقطتين فى اخر الكلام.

فى مصر, الاسامى الاجنبيه اللى فيها نطق [ɡ] بتتكتب بالحرف العربى ج, مش بالـغ.

ته التأنيث بتتكتب حسب النطق. فى حالة الاضافه لما بتتنطق زى الـ"ت": \ة\; او \ه\ فى الحالات التانيه.

امثله

1. <ازازة مايه>, <ملكة انجلترا>, <جنينة الاسماك>
2. <حريه شخصيه>, <كوره فى ملعب>, <چيبه قصيره>

علامات التشكيل ساعات بتكون مهمه لو نفس الكلمه كان مش واضح نطقها من السياق و ليها اكتر من معنى, لو اتنطقت بكزا طريقه.

النقطه و الفصله مهمين جدا. ياريت تاخد بالك من النقطه و الفصله, علشان الواحد مايتوهش وسط الكلام. و بيتكتبو لازقين فى الكلمه اللى اتكتبت قبلهم, و بعدهم مسافه.

اكتب الاسامى زى ما بيكتبوها المصريين, يعنى اكتب عن <ڤينيسيا> مش عن <البندقية> و اكتب <انجلترا> مش <انكلترا>. و اكتب <البرت اينشتاين> مش <اينشتاين, البرت>; Oh Ji-Min زى ما المصريين متوقعين يكتبوه و ينطقوه: <او چى مين>.

المقاله الرئيسيه: ويكيپيديا:أسئله متكرره

لما المصرى يتكلّم عن حاجه حديثه بيمصر الكلمه الاجنبى; مثلاً كلمة سييڤ الصفحة, كلمه جايه من ”save“ استعملت هنا لانها مستعمله فى اللغه المصرى, و كلمة احفظ معناها ”افتكر“ زى ما يكون فى المذاكره, لو بيتكلم عن حاجه فى الكمبيوتر بيمصر الكلمه الاجنبى, زى الديسك و الدرايڤ و السكرين.

الا لو كان نقل حرفى لـ كلام حد قاله, ابعد عن استعمال الضماير الشخصيه فى المقالات و الاسلوب الموجّه, زى (انا, احنا...), علشان الطريقه دى مش موسوعيه.

مثال: ”احنا مصريين - احنا عرب - زى ما حاربـنا 4 حروب فى 25 سنه. احنا لينا روابط مع اليونانيين و مع الايطاليين و غيرهم من الجيران [...] و علشان مايجلكش زهايمر الحق نفسك و روح استشير“.

مقاله رئيسيه: ملاحظات ع الكتابه اللاتينى

فيه شوية صغيره من المقالات فى ويكيپيديا مصرى منها نسخ بالألف-به اللاتينى لان كان فيه اقتراح من سنة 1944 لكتابه العربى^[1] بالحروف اللاتينى, و رغم ان اغلبية المصريين مش متعوّدين ع الألف-به اللاتينى, فيه مواد قليله جداً فى ويكيپيديا مصرى بحروف لاتينى (الفرانكو) للى عاوز يكتب بيها.

الاقتباسات اللى بالعربى الكلاسيكى او العربى القياسى الحديث اللى بتبقى مكتوبه بالحرف على لسان حد او الأشعار:

• الهمزات: بنفس قواعد العربى القياسى الحديث او بنفس طريقة المصدر.
• ى: <ى> من غير نقط زى ما بتستعمل فى مصر.
• ته التأنيث: بنفس قواعد العربى القياسى الحديث او بنفس طريقة المصدر.

• ادوات الجر و ادوات العطف: بنفس قواعد العربى القياسى الحديث او بنفس طريقة المصدر.
• علامات التشكيل: شوف الجزء الخاص بالتنظيم.

• ملاحظات على قواعد المصرى
• مساعدة اليوزرات الجداد
• مشاكل الفونت
• Wikipedia:Manual of Style