انتقل إلى المحتوى

زرمومية

بدل ليانات
من ويكيپيديا
زرمومية
معلومات عامة
سمية لعيلمية Lacertilia
(ريتشارد أوين، 1842)
لخاصية د ترتاب تنيضيمة
تابع ل حرشفيات


زرموميّة ولا وزغة هي السمية لمخدّمة ل ݣاع الزواحف لحرشفيين آپار من اللفاعي (و ب شكل قل الزرموميات الدوديين)، كايجمعو كتر من 7,000 نوع،[1] مفرقين ف ݣاع لقارات من غير أنطاركتيكا، و حتى ف لغالبية ديال السلاسل د لݣزاير لبركانيين. الترتاب ديالهم متشابه لعروش حيت شي زرموميات مرتابطات ب شكل قرْب ل اللفاعي على الزرموميات لخرين. الزرموميات كايتفاوتو ف لقد من التاتات و لبو بريصات لي فيهم سونتيميطرات قلال ف الطول ل دراݣو لكوموضو لي فيه 3 ميطرو ف الطول.

لأغلابية د الزرموميات رباعيات لمشية، كايجريو ب واحد لحاراكة مجهدة من جنب ل جنب. شي نسولا (معروفين ب "الزرموميات بلا رجلين") خسرو رجليهم ب شكل تانوي، و عندهم كسدات طوال كيف لحنوشا. شي زرموميات، بحال الدراكوات لي كايعيشو ف لغابة، كايقدرو يݣلايديو (glide). هوما حدوديين ديما، الدكور كايتقاتلو ضد دكور خرين و كايورّيو سينيالات، ب لوان فاتحين دايماّ، باش يجدبو لي بغا يتجاوج و باش يخوّفو لمنافسين. الزرموميات ف الساس لحايميين، و ف لغالب مفتارسين د لغفلة؛ بزاف د النواع لي صغر كاياكلو لحشرات، ف لوقيتة لي دراݣو لكوموضو كاياكل بزوليات كبار كايوصلو ف لقد حتى ل ݣاموس لما.

الزرموميات كايخدّمو واحد التشكيلة ديال لآضاپطاسيوات أونتي مفتارس، منهم السم، لكاموفلاج، تطواش الدم د الريفليكس، و لقدرة على باش يضحّيو ب قزازهم داتياً و يعاودو يكبّروهم.

لآناطوميا

[بدل | بدل لكود]

لكبر و الصغر

[بدل | بدل لكود]

الطول لبالغ د النواع وسط هاد التنضيمة التحتانية كايتفاوت من شوية د سونتيميطرات عند التاتات بحال بروكيزيا ميكرا (Brookesia micra) و لبو بريصات كيف سفيروضاكتيلوس آرياسي (Sphaerodactylus ariasae)[2] ل تقريباً 3 د لميطرو ف لحالة ديال أكبر نوع حي من لورليات (varanidae)، دراݣو لكوموضو.[3] جل الزرموميات حيوانات صغيورين.

خصايل التفراز

[بدل | بدل لكود]
بوبريص د الدار متوسطي ف الطور د النسيلاخ

الزرموميات ف لعادة عندهم طورسوات (torsos)، ريوس عاليين على عناق قصار، ربعة د الطراف و قزازب طوال، وخا شي وحدين منهم بلا رجلين.[4] الزرموميات و اللفاعي كايشرْكو واحد لعضم مربّع محرّك، هادشي لي كايفرّزهم على منقاريات الراس (rhynchocephalians)، لي عندهم جمجومة د الدياپسيدات/جاوجيات لقواس (diapsids) صليبة كتر.[5] شي زرموميات بحال التاتات عندهم قزازب قبّاطين، لي كايعاونوهم ف التشعبيط بينات النبات.[6]

كيف ما الزواحف لخرين، الجلد د الزرموميات مغطي ب حراشف مدّاخلين مصاوبين من لكيراتين. هادشي كايكالي عليهم من لبيئة و كاينقص من خسران لما ف لوقيتة د التبخور. هاد لاضاپطاسيو كاتعطي ل الزرموميات لقدرة باش يتزوهرو ف شي صحرات من الصحاري الناشفين ݣاع ف الدنيا. الجلد كايكون قاصح و مجلوْد، و كايبدا ينسالخ (كايتقشر) منين لحيوان كايبدا يكبر. على لعكس من اللفاعي لي كايسلخو الجلدة پياسا وحدة، الزرموميات كايسلخو جلدهم على بزاف د لپياسات. لحراشف يقدرو يتعدّلو ل شوكات على قبل التْوَريَة (display) ولا لحماية، و شي نواع عندهم عضوما جلديين (osteoderms) تحت من لحراشف.[6][7]

جمجومة طيݣو حمر (Tupinambis rufescens) كاتورّي سنان من نواع مبدلين

التسنينات (dentitions) د الزرموميات كايعكسو الساس لعريض ديال ريجيماتهم، لي منهم اللحايميين، لبخايشيين، لقارتين، لعشاشبيين، النيكطاريين (nectivorous)، و الرخوانيين (molluscivorous). النواع ف لعادة عندهم سنان موحّدين لي كايتواتاو معا معا ريجيمهم، و لايني بزاف د النواع عندهم سنان منوعين، بحال سنان التقطاع ف لقدام د لفكاك و سنان التهراس ف اللور. لأغلابية د النواع كايكونو جنبيات السنان (pleurodont)، وخا لآݣاميات (agamids) و التاتات كايكونو قمقوميات السنان (acrodont).[6][8]

اللسان يمكن ليه يتجبّد برّا لفم، و كايكون طويل ف لعادة. عند الزرموميات لمعققين (beaded lizards)، الزرموميات قزازب لمسواط (whiptails) و الزرموميات د لمونيطور (لورل)، اللسان عندهم كايكون معرّش و كايتخدّم ب شكل ساسي ولا حصري باش يحسو ب لبيئة، و كايدلّيوه برّا ب شكل دايم باش ياخدو لعيينات على لبيئة، و كايرجعوه ل لداخل باش يطرونسيفيريو لجزيئات ل لعضو لمحراتي النيفي (vomeronasal) لي مسؤول على لمحسوسات لكيماويين، لي كايشبه و لكن مختالف على حاسة الشمان و الدوق. عند لبو بريصات، اللسان كايتخدّم ف تنقية لعينين ب اللحيس حيتاش ماعندهمش الجفون. التاتات عندهم لسانات طوال ب زايد و معلكين لي يمكن ليهم دغيا يتجبّدو على ود باش يقبطو فرايسهم د لحشرات.[6]

تلاتة د النسولا، لبو بريصات، لآنولات (anoles)، و التاتات، عندهم حراشف معدّلين تحت صباعهم لي كايشكلو واحد لوسادات لاصقين هادشي لي كايعطيهم لقدرة باش يتحركو ف لحيوط و السقوفا بلا مايطيحو، هاد لخصلة بارزة ب زايد ف لݣروپات الجوج اللولين. لوسادات كايتكوّنو من ملاين د لهلبات الصغيورين (قلدات بحال الشعر) لي كايتواتاو معا الطبْقة الدخلانية باش يلصقو ب تخدام قوى ڤان دير ڤالس (van der waals forces)؛ حتى شي سايل د التلصاق (adhesive) ماكايحتاجوه.[9] زيد على هادشي، صبعان التاتات مقسمين ل جوج ݣروپات مقابلين ف كل رجل (زيݣوداكتيل-zygodactyl)، هادشي لي كايخلّيهم يوقفو على لعروش د النبات كيف بحال الطيور.[6]

لفيزيولوجيا

[بدل | بدل لكود]

لحركة

[بدل | بدل لكود]
لوسادات اللاصقين كايخلّيو لبوبريصات يتشعبطو ب شكل عمودي

آپار من الزرموميات بلا رجلين، لأغلابية د الزرموميات كايكونو رباعيين لمشية و كايتحركو ب تخدام لمشي (gait) معا حركة مناوبة ديال الطراف ليمنيين و ليسريين و معا تقواس كبير د لكسدة. هاد التقواس د لكسدة ماكايخلّيش التنفوس يكون ب شكل كبير ف لوقيتة د لحركة، هادشي لي كايحد من قوة التحمول ديالهم، ف واحد لميكانيزم لي كايتسمى التكبال د كاريير (carrier's constraint). بزاف د النواع كايمكن ليهم يجريو ب جوج رجلين،[10] و واحد الشوية منهم يقدرو يخدمو طرافهم اللورانيين و قزازبهم كا دعامات ف لوقيتة لي كايكونو ف بلاصتهم تابتين. شلا نواع صغار كيف هادوك لي ف ݣنس الدراكو كايقدرو يݣلايديو (glide): شي وحدين منهم كايقدرو يوصلو ل مسافة د 60 ميطرو ف لݣلايد، ب هبوط د 10 ميطرو من لعلو.[11] شي نواع، بحال لبو بريصات و التاتات، كايلصقو ف السورفاصات لعموديين بحال الجاج و السقوفا.[9] شي نواع، بحال لبازيليسكات الشايعين (common basilisk)، كايقدرو يجريو فوق لما.[12]

لحواس

[بدل | بدل لكود]

الزرموميات كايخدّمو حواسهم ديال الشوف، لمَس، الشمان و السميع بحال السلسوليات لخرين. لبالونص ديال هاد لحواس كايتنوع على حساب لموايل د نواع مبدلين؛ متلاً، السكينكات (skinks) لي كايعيشو ب شكل كبير ف لبلايص لمغطيين ب التراب لفازݣ كايعولو ب شكل تقيل على الشمان و لمس، ف لوقيتة لي لبو بريصات كايعولو ب شكل كبير على الشوف لمجهد على قبل لقدرة ديالهم على الصيادة و لقدرة على تقدير لمسافة د فرايسهم قبل ما يهجمو عليهم. الزرموميات د لمونيطور عندهم حواس مجهدين د الشوف، السميع، و الشمان. شي زرموميات كايطبّقو تخدام ماموالفش بيه د لاعضاء د لحواس ديالهم: التاتات كايقدرو يڤيزيو عينيهم ف تيجاهات مبدلين، هادشي شي مرّات كايعطيهم مجالات د الشوفة (fields of view) مامدّاخلينش، بحال لقدرة على باش تشوف لقدّام و اللور ف وقيتة وحدة. زرموميات كاينقصوهم لودنين لبرّاويين، و ف عوض هادشي عندهم واحد لفتحة ضايرة فين لغشا الطبلي (طبل لودن) يقدر يتشاف. بزاف النواع كايعولو على السميع على ود التحديرات لبكرانيين ديال لمفتارسين، و كايهربو منين كايجمعو ل أصغر صوت.[13]

ورل النيل كايخدّم لسانو على ود الشمان

كيف ما عند لحناش و بزاف د لبزوليات، ݣاع الزرموميات عندهم سيسطيم شمّي مختص، لي هو لعضو لمحراتي (لميكعي) النيفي (vomeronasal organ)، لي كايتخدّم باش يديطيكطي لفيرومونات. زرموميات لمونيطور كايطرونسفيريو الريحة من لقمقومة د لسانهم ل هاد لعضو؛ اللسان كايتخدّم غير على قبل هاد لغرض د جميع لمعلومات، و ماكايكونش داخل ف مديغ لماكلة.[13][14]

سكوليط الدراݣو لمعقق (pogona sp) معروض ف متحف علم لعضام

شي زرموميات، ب الضبط لإيݣوانات، بقى عندهم لعضو لحسّي الضوّي لفوق د ريوسهم سميتو لعين لحيطية (parietal eye)، لي واحد لمزيّة قاعدية ("بيدائية") حاضرة عاوتاني ف التواطارا (Tuatara). هاد "لعين" فيها غير واحد الشبكية بيدائية و عدسات لي ماكايقدروش يصاوبو تصويرة، و لايني حساسة ل التبدالات ف الضو و الضلام و كايمكن ليها تديطيكطي لحركة. هادشي كايعاونهم ف ضبيط لمفتارسين لي جايين عندهم من لفوق.[15]

السم

[بدل | بدل لكود]
شي زرموميات بحال وحش لهيلا كايكونو مسمومين

حتى ل 2006 كان كايتشاف بلي غير وحش لهيلا (gila monster) و الزرمومية لميكسيكية لمعققة (Mexican beaded lizard) لي بوحدهم زرموميات مسمومات. بلحق، بزاف د النواع ديال لورليات، منهم دراݣو لكوموضو، كايطلقو سم مجهد من لغوداد لفمّيين دياولهم. متلاً، السم د ݣوانا الشجر (نوع من لورليات)، كايتسبب دغيا ب خسران لوعي و سيلان د الدم شديد ب سباب التأتيرات دياولو لفارماكولوجيين، لي كايهبطو الطونسيو و كايمنعو التختار د الدم. تسعود ديال لكلاصات د الطوكسينات معروفين من اللفاعي كايتنتجو من لوزاغي. لمادى د هاد لآنشيطة كايعطي واحد لحتيمال باش يتصاوبو دوايات جداد مبازيين على لپروتينات د سم الزرمومية.[16][17]

الجينات لمرتابطين ب طوكسينات السم تصابو ف لغوداد لبزاقيين ديال واحد لقاعيدة كبيرة من الزرموميات، منهم نواع تشافو ب شكل تقليدي مامسمومينش، بحال لإيݣوانات و الدراݣوات لمعققين. هادشي كايلمح بلي هاد الجينات تطوورو ف الجد لمشروك د الزرموميات و اللفاعي، جوايه 200 مليون عام هادي تقريباً (هادشي لي صايب واحد التقسيمة فرّادية، حمّالات السم-Toxicofera).[16] وخا هاكداك، لأغلابية ديال جينات د السم لمفتارضين كانو "جينات منزليين" تلقاو ف ݣاع لخالايا و لانسيجة، بحال الجلد و لغوداد التقبيين د الريحة (cloacal scent glands). و عليها هاد الجينات لمعنيين يقدرو يكونو أصول تطوريين د الجينات د السم.[18]

التنفوس

[بدل | بدل لكود]

الديراسات الجداد (2013 و 2014) على لآناطوميا د رية ورل الصاڤانا (savannah monitor) و لإيݣوانا لخضرا لقاو بلي عندهم سيسطيم د تدفاق لهوا وحداني التيجاه، لي كايشمل الدوزان د لهوا ف واحد لحلقة (loop) على طريق الريات ف لوقيتة د التنفوس. هادشي شحال هادي كان كايتشاف بلي موجود غير ف لآركوصورات (التمساحيات و الطيور). هادشي واقيلا دليل بلي تدفاق لهوا وحداني التيجاه، خصلة موروتة من الجدود عند جاوجيات لقواس.[19][20]

لمكاترة و دورة لحياة

[بدل | بدل لكود]
سكينكات منقطين الشلقومة (Trachylepis maculilabris) كايتلاقاو

كيف ما هو لحال معا ݣاع لآمنيوطات (amniotes)، الزرموميات كايعولو على التخصاب الدخلاني، و التيصال الجنسي (copulation) كايشمل الدكر كايخشي واحد من النص قضبان (قضيب-hemipenes) دياولو ف التقبة (cloaca) د النتوا.[21] الزرموميات النتوات حتى هوما عندهم نص كيلطوريسات (hemiclitorises)، لي هوما واحد لكليطوريس مدوبل. لأغلابية ديال النواع كايكونو بيايضيين (oviparous). النتوا كاتحط لبيض ف شي قلدة مكالية بحال شي عش ولا شي شقّة ولا حتى عل لرض.[22] على حساب النوع، لقد د لقبّاط (clutch) يقدر يتنوّع من 4–5 ف لمية من التقل د كسدة النتوا ل 40–50 ف لمية و لقبّاطات كايتفاوتو ف لقدرة الستيعابية ديالتهم من بيضة ولا شي شوية د لبيضات لكبارات ل لعشرات من لبيضات الصغار.[23]

جوج تصويرات ديال بيضة د زرمومية السياج الشرقية محطوطين ف تصويرة وحدة

عند لاغلابية د الزرموميات، لبيضات دياولهم عندهم قشور مجلوْدين باش يخلّيو التباديل د لما، وخا النواع لعايشين ف الجو لقاحل كايكون عندهم قشور مكلصمين/متكلّسين (calcified) كتر باش يخلّيو لما. ف الداخل د لبيض، لاجينّة كاياخدو التقاوت من لمح. التهلية د لوالدين ماكاتكونش شايعة و النتوا ف لعادة كاتخلّي لبيض من مور ماكاتحطو. لقريق (brooding) و لحماية ديال لبيض كايطراو ف شي نواع. النتوا د سكينك لمروج (prairie skink) كاتخدّم لما التنفوسي لمخسور باش تخلّي ليميديتي د لبيض هادشي لي كايسهّل الديڤلوپمو د الجنين. عند ݣوانات الشجر، الصغار كايفقسو ف جوايه 300 يوم، و النتوا كاترجع باش تعاونهم يهربو من الجبيّل د الطيرميتات فين كايتحط لبيض.[22]

جوايه 20 ف لمية من نواع الزرموميات كايتكاترو على طريق لولودية (ولادة حية-viviparity). هادشي شايع ب الضبط عند شباه لبدغيات (anguimorphs). النواع لولوديين كايولدو صغار مديڤلوپيين ب شكل نسبي لي كايبانو بحال شي مينياتورات د لبالغين. لاجينّة كاياخدو التقاوت على طريق واحد لقلدة بحال لمشيمة.[24] واحد لاقليّة د الزرموميات عندهم موالدة عزريّة (مكاترة من بيض مامخصّبش-parthogenesis). هاد النواع كايتكوّنو من ݣاع النتوات لي كايتكاترو ب شكل لاجنسي بلا لحاجة ل الدكور. هادشي معروف بلي كايطرا ف نواع منوعين ديال زرموميات قزيبة لمسواط.[25] لموالدة لعزرية تشجلات عاوتاني ف نواع لي كايتكاترو ف لعادة ب شكل جنسي. واحد النتوا ديال دراݣو لكوموضو كاپتيڤ خرّجات واحد لقبّاط د لبيض، وخا كانو مفارقينها على الدكور ل كتر من عاماين.[26]

تحديد الجنس عند الزرموميات يمكن لو يكون كايعول على درجة لحرارة. درجة لحرارة ديال لميكرو بيئة د لبيض يمكن ليها تحدد الجنس ديال الصغار لمفقوسين: لقريق/لحضانة د لبيض ف درجات لحرارة نازلين كايخرّج نتوات كتر ف لوقيتة لي درجات لحرارة الطالعين كايخرّجو دكور كتر. وخا هاكداك، شي زرموميات عندهم كروموزومات د الجنس، و ليطيروݣام د الدكر (XY و XXY) و ليطيروݣام د النتوا (ZW) ب جوج بيهم كايوقعو.[25]

الشرف

[بدل | بدل لكود]

واحد لعنصر موهيم ف الشرف (ageing) عند زرمومية الدراݣو لمطلية سطينوفوروس پيكتوس (Ctenophorus pictus) هو اللوان د لمجاوجة لي كايبداو يبهاتو.[27] ب التلاعوب ب نيڤوات السوپرؤكسيد (ب تخدام واحد لموقلّيد د سوپرؤكسيد ديسموطاز) بان بلي التلوينة لي غادية ف لبهتان سبابها ب شكل غالب واحد لخسران تدريجي معا لعمر د الزرمومية ديال واحد لقدرة خلوقية د لؤنيتيئكسادة ب سباب الزيادة ف هليك لآ دي إن.[27]

السلوك

[بدل | بدل لكود]

السلوك النهاري و الريݣلاج د لحرارة

[بدل | بدل لكود]

جل النواع د الزرموميات كايكونو آكتيڤ ف وقيت النهار،[28] وخا شي وحدين منهم كايكونو آكتيڤ ف الليل، ب لآخص لبو بريصات. و ب صيفتهم براّويين لحرارة (باردين الدم-ectotherms)، الزرموميات عندهم واحد لقدرة محدودة باش يريݣلو درجة حرارة كسدتهم، و كايخصهم يخرجو برّا و يتشمشو باش ياخدو سخونية كافية على قبل باش يولّيو آكتيڤ ب لكامل.[29] السلوك د ريݣلاج لحرارة (thermoregulation) تقدر تكون فيه لفايدة ل لوزاغي ف لمادى لقريب حيتاش كاتخلّي ليهم لقدرة باش يقلّلو من الجهد د التبدالات لبيئيين و يصبرو على لحتيباس لحراري.[30]

ف لعلووات الزايدين، الزرمومية پودارسيس هيسپانيكوس (Podarcis hispaniscus) كاتستاجب ل درجات لحرارة الطالعين ب تلوينة فوقانية/ضهرية (dorsal) غلْق باش تتجنب الشعا لفوق بنفساجي و باش تتواتى معا لخلفية. لميكانيزمات لي كايريݣلو لحرارة كايخلّيو الزرمومية عاوتاني تحافض على درجة حرارة لميتالية د لكسدة ديالها على ود حركة حسن.[31]

لحدودية

[بدل | بدل لكود]
دكور ديال زرمومية الرملة مطايفين

جل التفاعولات الجتيماعيين بينات الزرموميات كايكونو بين لفراد لمجاوجين.[32] لحدودية (territoriality) كاتكون شايعة و مرتابطة ب النواع لي كايخدّمو سطراتيجيات الصيادة ديال لغفلة. الدكور كايأسسو و كايحافضو على زونات لي فيهم لموارد لي كايجدبو النتوات لي كايحاميو عليهم الدكور من دكور خرين. لموارد لموهيمين بحال، لمواطع ديال التشماش، لماكلة، و التعشاش و حتى مواطع التخبية من لمفتارسين. لموؤل د شي نوع كايأتر على لقلدة د الزونات، متلاً، زرموميات الصخر عندهم زونات فوق لقماقم لبارزين د الصخر.[33] شي نواع يقدرو يتجمّعو ف ݣروپات، هادشي لي كايعدّل ف التوݣاض (vigilance) و كايقلّل على لفراد الريسك د لفريس، ب الضبط الصغار.[34] السلوك لعدواني (Agonistic behaviour) ف لعادة كايوقع بينات الدكور لبالغين جنسياً على شي زون ولا على شي نتوات ف وقيت لمجاوجة و هاد السلوك يقدر يجمع التْوْرْيَة (display)، لپوستورات لكسديين (posturing)، التبيع (chasing)، لمشاوشة (grappling)، و لعضّان.[33]

التواصول

[بدل | بدل لكود]
آنولي خضر (Anolis carolinensis) كايسينيالي ب لكيس الجلدي لعنقي ديالو لمجبّد

الزرموميات كايطلقو سينيالات على قبل باش يجدبو لمجاوجين و باش يخوْفو لمنافسين. التْوْرْيَات الشوفيين (visual display) منهم لپوستورات د لكسدة و التضخام، الطراكسيوات (push ups)، اللوان لفاتحين، حلّان لفم و تطياش لقزيية. الدكور د لآنولات و لإݣوانات عندهم حناݣر جلديين عنقيين (Dewlaps) ولا كياس د الجلد ف لعنق لي كايكونو ف قدود، لوان، و نماط منوعين و التجباد ديال لكيس لعنقي و حتى تضوار الراس و حركات لكسدة كايتزادو ف التورية د السينيالات الشوفيين.[35][36] شي نواع عندهم كياس عنقيين ب الزرق غالق و كايتواصلو ب سينيالات فوق بنفساجيين.[28] السكينكات زرقين اللسان كايخرّجو لسانهم و كايدخلوه دغيا كا تورية على التهديد.[37] التاتات معروفين كايبدلو نماط لوانهم لمعقدين منين كايكونو كايتواصلو، ب الضبط ف وقيت لملاقيات لعدوانيين. كايميلو باش يورّيو لوان ضاويين منين كايكونو كايورّيو لعنف[38] و لوان غالقين منين كايخضعو ولا "كايستسلمو".[39]

شلّا نواع من بو بريص كايكونو لوانهم فاتحين؛ شي نواع كايقوسو كسداتهم باش يورّيو التلوينة ديالتهم. ف شي نواع فلانيين، الدكور فاتحين اللون كايولّيو باهتين منين ماكايكونوش لمنافسين ولا النتوات حاضرين. ف لوقيتة لي الدكور ف لعادة لي كايورّيو (display)، ف شي نواع النتوات حتى هوما كايخدّمو هاد التواصول. عند لآنولي لبرونزي (bronze anole)، تضوار الراس واحد الشكل شايع د التواصول بينات النتوات، الزربة و التعاويد (frequency) كايتبدلو معا لعمر و لحالة د الزون. السينيالات لكيماويين ولا لفيرومونات حتى هوما موهيمين ف التواصول. الدكور ف لعادة كاينيّشو السينيالات على لمنافسين، أما النتوات كاينيّشوهم على لمجاوجين لمحتاملين. الزرموميات واقيلا قادرين باش يعرفو لفراد د نفس النوع من ريحتهم.[35]

عيطة د لملاقية ديال بوبريص الطوكاي، سمية النوع أونوماطوپيا على الصوت ديالو

التواصولات الصوتيين شايعين ب شكل قل عند الزرموميات. التهسهيس (hissing)، لي هو واحد الصوت نوعي عند الزواحف، كايتطلق ب شكل غالب من النواع لكبر ف لقد ب صيفتو طرف من شي تورية د التهديد، لي كايكون مرافق معا حلان لفم. شي ݣروپات، ب الضبط لبو بريصات، الزرموميات-اللفاعي، و شي إيݣوانيات، كايمكن ليهم يطلقو صوات معقدين كتر، و الدوزانات (apparatuses) الصوتيين تطوورو عندهم ب شكل مستاقل ف ݣروپات مبدلين. هاد الصوات كايتخدّمو على قبل التتوات/لمغازلة (courtship)، الدفاعات لحدوديين، و ف لوقيتة د شي محنة، هاد الصوات منهم التكلاك (clicks)، الزوْيان (squeaks)، النباح، و التݣرݣير (growls). لعيطة د لمجاوجة د دكر بوبريص الطوكاي كاتسمع "طوكاي-طوكاي" (أونوماطوپيا).[35][37][40] التواصول لمسّي كايجمع فراد كايفركو ريوسهم معا بعضياتهم، يامّا ف التتوات ولا ف لعنف.[35] شي نواع د التاتات كايتواصلو معا بعضياتهم ب تزعزيع لعمود لي واقفين عليه، بحال شي عرش ولا ورقة د الشجر.[41]

إيكولوجيا

[بدل | بدل لكود]
زرمومية ف شجرة، بزاف د نواع منهم كايسكنو ف الشجر.
زرمومية من الصحرا د طار، پاكيستان.

التوزيع و لموؤل

[بدل | بدل لكود]

الزرموميات كايتصابو ف ݣاع قنات الدنيا، من غير الشمال لبعيد و أنطاركتيكا، و ف شي ݣزاير. يقدرو يتلقاو ف علووات على نيڤو لبحر كايوصلو ل 5,000 ميطرو. هوما كايخيّرو لموناخات الدافيين و الستيوائيين و لايني كايقدرو يتآضاپطاو و كايمكن ليهم يعيشو ف ݣاع لبيئات إلا لبيئات الشداد ف لعيشة. الزرموميات عاوتاني كايستاغلو بزاف د لموايل؛ غالباً كايعيشو ب زايد ف لرض، و لكن وحدين خرين يقدرو يعيشو ف الصخر، الشجر، تحت لرض ولا حتى لما. لإيݣوانا لبحرية مآضاپطية على لعيشة ف لبحر.[36]

الريجيم

[بدل | بدل لكود]
زرمومية خضرا غربية كاتفرس واحد الجندوب.

لفرايس الشايعين كتر هوما اللاسلسوليات لرضيين الصغار، ب لاخص لحشرات.[36][42] شلا نواع منهم كايكونو مفتارسين د لغفلة وخا وحدين خرين يقدرو يكونو علايفيا نشيطين.[43] التاتات كايفرسو شلا نواع من لحشرات، بحال لخنافس، الجنادب (grasshoppers)، و الطيرميتات لمجنحين و حتى الرتيلات. هوما كايعولو على النتيضام و لغفلة باش يقبطو هاد لفرايس. فرد واحد كايسمر فوق شي عرييش و كايبقى تابت بلا حس، و كايبقاو غير عينيه لي كايتحركو. منين كاتهبط شي حشرة، التاتة كاتركز عينيها قبالة لحشرة و كاتبدا تتحرك ل جيهتها ب شوية قبل ماتفييّر عليها ب لسانها لي طويل و معلّك، منين اللسان كايرجع، كايجيب معاه لفريسة لاصقة. لبو بريصات كاياكلو صرّارات الليل، لخنافس، الطيرميتات، و لعتات (moths).[36][42]

الطيرميتات طرف موهيم ف الريجيمات د شي نواع ديال التقسيمة أوطارتشوݣلوسات (Autarchoglossa)، مادام هوما حشرات جتيماعيين، يمكن ليهم يتلقاو ب عداد كبار ف موطع واحد. النمل يقدرو يصايبو واحد الطرف بارز ف الريجيم د شي زرموميات، ب الضبط الزرموميات لحقيقيين (lacertas).[36][42] الزرموميات مّو ݣرن حتى هوما معروفين ب صيفتهم مختصين ف لماكلة د النمل. ب سباب قدهم الصغير و لكيتين (chitin) ديالهم لمامهضومش، كايخصهم يكونسوميو النمل ب كميات كبار، و الزرموميات وكّالات النمل عندهم معدات كبار عل الزرموميات لعواشبيات.[44] نواع من السكينك و زرموميات لݣاطور (alligator lizards) كاياكلو لغلال و فكاكهم د لقوة و سنانهم لي بحال الضراس مآضاپطيين على تهراس لكوكياجات.[36][42]

دراݣو د لكوموضو شاب كاياكل من واحد الجيفة د ݣاموس لما.
إيݣوانا بحرية كاتعلف تحت لما ف ݣزاير ݣلاپاݣوص، إيكوادور.

النواع لي كبر، بحال زرموميات لمونيطور (لورل)، يقدرو ياكلو فرايس كبار كيف لحوت، الجران، الطيور، لبزوليات، و الزواحف لخرين. لفريسة تقدر تتسرط كاملة ولا كاتّشرّݣ ل طراف صغار. لبيض د الطيور و الزواحف ب جوج حتى هوما يقدرو يتكونسوماو. وحوش لهيلا (Gila monsters) و الزرموميات لمعققين كايتشعبطو الشجر باش يوصلو ل لبيض و الصغار د الطيور. و وخا هوما مسمومين، هاد النواع كايعولو على فكاكهم لمجهدين ف قتيلة لفرايس. لفرايس لبزوليين ف لعادة كايتكوّنو من لقوارض و الرنبيات؛ دراݣو لكوموضو يمكن ليه يقتل فرايس كبار قد ݣاموس لما. دراݣوات لكوموضو كايتعتابرو قمايميا (scavengers) مجهدين، و تقدر جيفة وحدة محلّلة تجدب بزاف منهم و هي بعيدة عليهم 2 كم. دراݣو واحد وازن 50 كݣ قادر يكونسومي 31 كݣ د الجيفة ف 17 دقيقة.[42]

جوايه 2 ف لمية من نواع الزرموميات، منهم شلّا إيݣوانيات، كايكونو عواشبيين، لبالغين من هاد النواع كاياكلو طراف النبات بحال النوّار، لوراق، السيقان، و لفاكهة، ف لوقيتة لي الصغار كاياكلو لحشرات كتر. طراف النبات يقدرو يكونو صعاب ف لهضيم، و ماحدهم كايقربو ل لبلوغ، صغار لإيݣوانا كاياكلو لخرا د لبالغين باش ياخدو لميكروفلورا (microflora) الضارورية على ود لقليب ديالهم ل ريجيم مبازي على النبات. واقيلة أكتر نوع عواشبي هي لإيݣوانا لبحرية لي كاتغطس 15 ميطرو باش تعلف الطحالب (algae)، لكيلپات (kelps) و بزاف د النبتات لبحريين لخرين. شي نواع لاعواشبيين كايدعمو ريجيمهم لي مبازي عل لحشرات ب لفاكهة، لي كاتهضم ب السهولة.[36][42]

لآضاپطاسيوات أونتي مفتارس

[بدل | بدل لكود]
عنق الزرمومية مكشكشة لعنق كايخلّيها تبان كبر من لقد ديالها د بصح.

الزرموميات عندهم تشكيلة من لآضاپطاسيوات أونتي مفتارس، بحال الجرا و التشعبيط، السم، لكاموفلاج، التقزاب الداتي (tail autotomy)، و تطواش الدم الريفليكسي (reflex bleeding).

لكاموفلاج

[بدل | بدل لكود]

الزرموميات كايستاغلو تنويعة من لميطودات لمبدلين د لكاموفلاج. بزاف د الزرموميات كاتكون عندهم تلوينة مشتتة (disruptive pattern). ف شي نواع، بحال بوبريص لحيط لإيجياني (Aegean wall lizards)، لفراد كايتنوعو ف اللون، و كايعزلو الصخور لي كايتواتاو حسن معا لونهم باش يصغّرو الريسك د الديطيكسيو من لمفتارسين.[45] لبو بريص لمغربي (moorish gecko) قادر باش يبدل لونو على قبل لكاموفلاج: منين شي بو بريص لونو فاتح كايكون على شي موطع غالق، ف ساعة د لوقت كايبدا حتى هو يغلاق باش يتواتى معا لبيئة ديالو.[46] التاتات ب شكل عام كايخدّمو قدرتهم على تبدال التلوينة ديالتهم على قبل السينيالات عوض لكاموفلاج، و لايني شي نواع بحال التاتة لقزمة د سميث (Smith's dwarf chameleon) كاتخدّم تبدال آكتيڤ د اللوان على قبل غراضات ديال لكاموفلاج.[47]

لكسدة ديال الزرمومية مّو ݣرن فطحة لقزيبة (flat-tail horned lizard) لونها بحال لون لخلفية د الصحرا ديالها، و مبعّزة و مقمقمة ب حراشف بيضين لي كاينقصو من الضل ديالها.[48]

التقطاع الداتي

[بدل | بدل لكود]
قزيبة السكينك كاتبقى مكمّلة ف التحراك من مورا التقطاع الداتي.

شلّا زرموميات، بحال لبو بريصات و السكينكات، قادرين يقطعو قزازبهم (تقطاع داتي-autotomy). لقزيبة لمقطعة، كاتبقى مكملة ف التفركيل من مورا التقطاع، هادشي لي كايشتت نتيباه و كايلهي لمفتارس من لفريسة لهربانة. الزرموميات قادرين ب شكل جزئي باش يرجّعو قزازبهم ف النمو ف وقيتة ديال سيمانات. شي 326 جين داخل ف لمعاودة د ترجاع قزازب الزرموميات.[49] لبو بريص حوتي لحراشف (fish-scale gecko) ݣيكوليپيس ميݣاليپيس (Geckolepis megalepis)، كايبدا يقشر شي طبقات من الجلد ديالو يلا تقبط.[50]

لهريب، موتة حمار، تطواش الدم

[بدل | بدل لكود]

بزاف ديال الزرموميات كايجرّبو يهربو من لخطر ب لهريب ل شي موطع سالم؛[51] متلاً، زرموميات لحيط يمكن ليهم يهربو ل لحيوط و يتخباو ف التقابي ولا الشقاق.[9] الزرموميات مّو ݣرن مبنّيين دفاعات مبدلين على حساب النوع د لمفتارس. يقدرو يديرو موتة حمار (play dead) باش يقولبو شي مفتارس لي شدّهم؛ و من بعد كايجرّبو يسبقو اللفعى الصرّارة (rattlesnake)، لي ماكاتبعش لفريسة؛ بلحق كا تبقى ف بلاصتها، زيد كايعوّلو على التلوينة لمطلسمة ديالهم، حيتاش حناش السوط (whip snakes) من ݣنس ماستيكوفيس (Masticophis) كايمكن ليهم يقبطو حتى لفرايس السريعين. شي نواع بحال الزرموميات قصار لݣرون (short-horned lizard) يلا تشدّو كاينفخو ريوسهم، هادشي لي كايخلّي كسدتهم صعيبة ف السريط ل شي مفتارس فمو ضيّق بحال حنش السوط. ف اللخر، الزرموميات مّو ݣرن يقدرو يرشّو دمهم على لمفتارسين كيف لقطوط و لكلاب من واحد الجويّب تحت عينيهم، ل واحد لمسافة ف جوايه 2 ميطرو؛ الدم مداقو كايجي خايب ل هاد لهاجمين.[52]

التطوور

[بدل | بدل لكود]

التاريخ لفوصيلي

[بدل | بدل لكود]
فوصيل د زرمومية دالينݣوصوروس لونجيديجيتوس (Dalinghosaurus longidigitus) من اللول د لعصر الطاباشيري، الشينوا.

لقراب لعايشين لي قراب ݣاع ل الزرموميات هوما منقاريات الراس (rhynchocephalians)، لي كانو واحد التنضيمة منوعة د الزواحف، لي موجود دابا فيها غير نوع واحد باقي عايش، التواطارا (Tuatara) د نيو زيلانضا. شي زواحف من لعصر التلاتي/الترياسي بحال سوفينيطا (Sophineta) و ميݣاتشيريلا (Megachirella)، كايبانو بلي هوما ݣروپ ساق (stem) د لحرشفيات (squamates)، قراب كتر ل الزرموميات لعصريين على منقاريات الراس، بلحق، التستاف ديالهم مازال محطوط ل النيقاش، معا شي ديراسات وصفوهم بلي هوما قراب ل لحرشفيات على منقاريات الراس.[53] أقدم زرمومية ماعليهاش النيقاش متورخة حتى ل لعصر الجوراسي لوسطاني (middle Jurassic)، من شياطات تلقاو ف أوروپا، آسيا، و شمال إفريقيا.[54] التنواع لمورفولوجي و لإيكولوجي د الزرمومية تزاد ب شكل كبير على طول لعصر الطاباشيري.[55] ف لعصر لپاليوجيني، لقدود د كسدات الزرموميات ف أمريكا الشمالية وصلو ل الدروة نتاعهم ف لوسط د هاد لعصر.[56]

لموزاصورات (Mosasaurs) ف لغالب تطوورو من واحد لݣروپ منقارض ديال الزرموميات لبحريين،[57] معروفين ب سمية إيجيالوصورات (aigialosaurs) ف لبدية د لعصر الطاباشيري. الضوليتشوصوريدات (Dolichosauridae) واحد لفاميلة د لورليات من اللخر لعصر الطاباشيري مرتابطين ب لموزاصورات.[58][59]

لفيلوجينيا

[بدل | بدل لكود]

لفيلوجينيا لبرّاوية

[بدل | بدل لكود]

الترتاب د الزرموميات و لحرشفيات لخرين بينات الزواحف تدرس ب تخدام واحد الدليل فوصيلي من غاينغ شوش و هانس ديتر سوس ف 2015. الزرموميات كايشكلو شي 60٪ من الزواحف اللاطيارا لباقيين.[60]



آركيلوصوريات (Archelosauridae)

شباه لأركوصورات (Archosauromorpha)


شباه الليپيدوصورات (Lepidosauromorpha)


ݣاع لفكرونيات (Pantestudines)




كونوصوريات† (Kuehneosauridae)


ليپيدوصوريات (Lepidosauria)

منقاريات الراس (Rhynchocephalia)



حرشفيات (Squamata)







لفيلوجينيا الدخلانية

[بدل | بدل لكود]

اللفاعي و لآمفيسبينيات (الزرموميات الدوديين) ب جوج بيهم تقسيمات غارقين وسط لحرشفيات (التقسيمة الصّغر لي فيها ݣاع الزرموميات)، عليها "الزرمومية" كاتعتابر مشابهة لعروش (paraphyletic).[61] لكلاضوݣرام مبازي على التحليل الجينومي من ڤينس و رفاقو ف 2012 و 2016.[62][63] الطاكسات لمقصيين كايبانو ف الصندوق لفوقاني ف لكلاضوݣرام.



حرشفيات (Squamata)
شباه جاوجيات الرجلين (Dibamia)

جاوجيات الرجلين (Dibamidae)


جاوجيات الشوكة (Bifurcata)
قريبات لبوبريصات (Gekkota)
شباه رجليات لقزيبة (Pygopodomorpha)

زرموميات مدوبلات الصبعان (Diplodactylidae)




رجليات لقزيبة (Pygopodidae)



عريشيات الصبعان (Carphodactylidae)




شباه لبوبريصات (Gekkomorpha)

حقيقيات الجفن (Eublepharidae)


بوبريصيات الشكل (Gekkonoidea)

مكورات الصبعان (Sphaerodactylidae)




ورݣيات الصبعان (Phyllodactylidae)



بوبريصيات (Gekkonidae)






وحدانيات السنان (Unidentata)
سكينكيات الشكل (Scincoformata)
شباه السكينكات (Scincomorpha)

سكينكيات (Scincidae)


شباه لكورديلات (Cordylomorpha)

زانتوسيات (Xantusiidae)




جعروصوريات (Gerrhosauridae)



كورديليات (Cordylidae)





قريبات لحرشفيات (Episquamata)
شباه الزرموميات لحقيقيين (Lacertoidea)
شباه سوطيات لقزيبة (Teiformata)

عريانات لعينين (Gymnophthalmidae)



سوطيات لقزيبة (Teiidae)



زرموميات حقيقودوديين (Lacertibaenia)
زرموميات الشكل (Lacertiformata)

زرموميات حقيقيين (Lacertidae)



زرموميات دوديين (Amphisbaenia)




حمالات السم (Toxicofera)

بدغيات الشكل (Anguimorpha)
بدغيات الشكل قدام (Palaeoanguimorpha)
شباه الصوريات الشينويين (Shinisauria)

صوريات شينويين (Shinisauridae)


شباه لورليات

مخبيات لودنين (Lanthanotidae)



ورليات (Varanidae)




بدغيات الشكل جداد (Neoanguimorpha)
شباه ضفريات الجلدة (Helodermatoidea)

ضفريات الجلدة (Helodermatidae)



شباه الصوريات لبرانيين (Xenosauroidea)

صوريات برانيين (Xenosauridae)


شباه لبدغيات (Anguioidea)

مدوبلات اللسان (Diploglossidae)




زرموميات خاتميات (Anniellidae)



بدغيات (Anguidae)







شباه لإيݣوانيات
فوقانيات السنان (Acrodonta)

تاتاويات (Chamaeleonidae)



أݣاميات (Agamidae)



جنبيات السنان (Pleurodonta)

ملسات الراس (Leiocephalidae)




إيݣوانيات (Iguanidae)





مسلحات لقزيبة (Hoplocercidae)




زرموميات مسنسلين (Crotaphytidae)



زرموميات مو كا��ك (Corytophanidae)






زرموميات ستيوائيين (Tropiduridae)





جرانيات لكسدة (Phrynosomatidae)




صبعيات (Dactyloidae)



پوليكروتيات (Polychrotidae)






ليوليميات (Liolaemidae)




صوريات ملسين (Leiosauridae)



زرموميات مدغشقر (Opluridae)












حنشيات (Serpentes) ( لحناش و اللفاعي ماكايتعتابروش من الزرموميات)







الطاكسونوميا

[بدل | بدل لكود]
ريسطوراسيو فنية ديال واحد لموزاصور، پروݣناطوضون (Prognathodon)

ف لقرن 13، الزرموميات كانو معروفين ف أوروپا كا طرف ف واحد لكاطيݣوري عريضة ديال الزواحف لي كانت مكوّنة من واحد التنويعة د لمخلوقات لي كايحطو لبيض، منهم "اللفاعي، بزاف د لوحوش لخياليين، [...]، تشكيلة من لبرمائيات، و الدود". كيف ما مشجل من ڤانسو دو بوڤيه ف لعمل ديالو مراية ديال الطبيعة (mirror of nature).[64] لقرن 17 وقعو فيه تبدالات ف هاد لوصف لمفضفض. السمية صوريات (Sauria) تأسسات من دجايمس مكارتني (1802)؛[65] هاد لكلمة كانت الشكل اللاتيني ديال السمية لفرانساوية صوغييآ (sauriens)، لي أسسو آليكزوندغ بغونياغ (1800) على قبل واحد التنضيمة د الزواحف ف الترتاب لي قتارحو هاد لكتاتبي، و لي فيه الزرموميات و التمساحيات،[66] ف اللاحق تكتاشف بلي هوما ماشي أقرب قراب ل بعضياتهم. لكتاتبيا لي جاو من بعد خدّمو موصطالاح "صوريات" ب شكل مكبّل، ب معنى خر تخدّم كا موراديف د اللاسيرتيلات (الزرموميات لحقيقيين)، لي هي واحد التنضيمة تحتانية د لحرشفيات لي كاتجمع ݣاع الزرموميات بلحق كاتقصي اللفاعي. هاد الترتاب كايتخدّم دابا ب شكل نادر حيتاش الصوريات تعرّفو كا ݣروپ مشابه لعروش. تعرّفو ب صيفتهم تقسيمة من جاك ݣوتييه، آرنولد دجي. كلوج و تيموثي رووْ (1988) ب صيفتو لݣروپ لي فيه أقرب جد مشروك ديال لآركوصورات (archosaurs) و ليپيدوصورات (lepidosaurs) (لݣروپات فيهم التماسح و الزرموميات، على حساب التعريف لأصلي د مكارتني) و ݣاع لحفاد ديالهم.[67] واحد التعريف مغاير تصاوب من مايكل ديبراݣا و أوليڤير ريپل (1997)، لي عرّفو الصوريات ب صيفتهم تقسيمة فيها أقرب جد مشروك ديال مفارقات لعنق/كوريسطوديرات (choristodera), شباه لآركوصورات (Archosauromorpha)، شباه الليپيدوصورات (Lepidosauromorpha) و ݣاع لحفاد ديالهم.[68] غير هو، هاد التخدامات ماكسبوش قوبول عريض بينات لمختصين.

تنضيمة تحتانية لاسيرتيلات (صوريات) – (لوزاغي)

  • فاميلة †صوريات باڤاريين (Bavarisauridae)
  • فاميلة †صوريات إيئخسطات (Eichstaettisauridae)
  • تنضيمة صغيورانية شباه لإيݣوانيات (Iguanomorpha)
    • فاميلة †آريطوصوريات (Arretosauridae)
    • فاميلة †إيوپوصوريات (Euposauridae)
    • فاميلة كوريطوفانيدات (Corytophanidae) (لوزاغي ريوس لكاسك)
    • فاميلة إيݣوانيات (Iguanidae) (لإيݣوانات و لإيݣوانات مشوّكات لقزيبة)
    • فاميلة فرينوصوماتيدات (Phrynosomatidae) (زرموميات الشجر، مّو ݣرن، بلا ودن، لمشوّكين، و مجلخين الجناب)
    • فاميلة پوليكروتيدات (Polychrotidae) (لآنولات)
      • فاميلة صوريات ملسين (Leiosauridae)
    • فاميلة طروپيدوريدات (Tropiduridae) (زرموميات لرض ديال الجو الستيوائي د لعالم الجديد)
      • فاميلة ليولاميدات (Liolaemidae)
      • فاميلة زرموميات عوجين لقزيبة/لييوسيفاليدات (Leiocephalidae)
    • فاميلة زرموميات مسلسلين/كروطافيتيدات (Crotaphytidae) (الزرموميات لمسنسلين و النمريين)
    • فاميلة أوپلوريدات (Opluridae) (إيݣوانيات مادغشقر)
    • فاميلة هوپلوسيرسيدات (Hoplocercidae) (زرموميات لخشب، و قزازب لهراوة)
    • فاميلة †پريسكاݣاميدات (Priscagamidae)
    • فاميلة †إيݣوانيات ݣوبي (Gobiguania)
    • فاميلة آݣاميات (Agamidae) (لآݣامات، و وزاغي الدراݣو)
    • فاميلة تاتاويات (Chamaeleonidae) (التاتات)
  • تنضيمة صغيورانية شباه لبوبريصات (Gekkota)
    • فاميلة بو بريصيات (Gekkonidae) (لبو بريصات)
    • فاميلة پيݣوپوديدات (Pygopodidae) (لبو بريصات بلا رجلين)
    • فاميلة ديباميدات (Dibamidae) (الزرموميات لعميين)
  • تنضيمة صغيورانية شباه السكينكات (Scincomorpha)
    • فاميلة †پاراماسيلوديدات (Paramacellodidae)
    • فاميلة †سلاڤويدات (Slavoiidae)
    • فاميلة سكينكيات (Scincidae) (السكينكات)
    • فاميلة كورديليدات (Cordylidae) (الزرموميات مشوكين لقزيبة)
    • فاميلة صوريات جعروريين (Gerrhosauridae) (الزرموميات لمطليين)
    • فاميلة زانتوسيدات (Xantusiidae) (وزاغي الليل)
    • فاميلة لاسيرتيدات (Lacertidae) (زرموميات لحيط ولا لوزاغي لحقيقيين)
    • فاميلة †مونݣولوشاموپيدات (Mongolochamopidae)
    • فاميلة †صوريات بنادميين (Adamissuridae)
    • فاميلة سوطيات لقزيبة ( Teiidae) (زرموميات الطيݣو و قزيبة السوط)
    • فاميلة عريانات لعينين (Gymnophthalmidae) (الزرموميات مو نضاضر)
  • تنضيمة صغيورانية شباه مدوبلات اللسان (Diploglossa)
    • فاميلة بدغيات (Anguidae) (الدود التقيل، زرموميات الجاج)
    • فاميلة مدوبلات اللسان (Diploglossidae)
    • فاميلة زرموميات خاتميين (Anniellidae) (زرموميات بلا رجلين لأمريكيين)
    • فاميلة صوريات برانيين (Xenosauridae)
  • تنضيمة صغيورانية پلاتينوطات (Platynota) (شباه لورليات-Varanoidea)
    • فاميلة ورليات (Varanidae) (دراݣو لكوموضو وقرابو)
    • فاميلة لانطانوتيدات (Lanthanotidae)
    • فاميلة مسماريات الجلدة (Helodermatidae) (وحوش لهيلا و الزرموميات لمعققين)
    • فاميلة †موزاصورات (Mosasauridae) (الزرموميات لبحريين)
لبدغيات، (Anguidae) من بين 20 ݣروپ د الزرموميات لي طووٌر ب شكل تقاربي واحد لبلان كسدي بلا رجلين.

التقاروب

[بدل | بدل لكود]

الزرموميات ب واحد الطريقة منتاضمة تطوورو ب شكل تقاروبي (convergent evolution) معا بزاف د لݣروپات ديڤلوپاو ب شكل مستاقل مورفولوجيات و نيشات إيكولوجيين (ecological niches) مشابهين. التشكالات لإيكولوجيين/لإيكومورفات د لآنولات (Anolis ecomorphs) ولاو واحد السيسطيم موديل ف لبيولوجيا التطوورية على قبل ديراسة التقاروب.[69] الطراف ترزاو ولا تنقصو ب شكل مستاقل كتر من عشرين خطرة على طول التطوور د الزرموميات، متال على هادشي الزرموميات لخاتميين، لبدغيات، لكورديليدات، الديباميدات، عريانات لعينين، لپيݣوپوديدات، و السكينكيات؛ اللفاعي هوما غير أكتر ݣروپ مشهور و عامر ب النواع ديال لحرشفيات لي تبعو نفس الطريق.[70]

لعالاقات معا بنادم

[بدل | بدل لكود]

التفاعولات و التخدامات من بنادم

[بدل | بدل لكود]

جل نواع الزرموميات ماكايتسببوش ب الضر ل بنادم. غير النوع د الزرموميات لكبير ݣاع، دراݣو لكوموضو، لي كايوصل ل 3.3 ميطرو ف الطول و كايوزن حتى ل 166 كيلوݣرام، لي معروف بلي كايتبع، كايهجم، و يلا جاتو لفرصة، كايقتل بنادم. واحد لولد أندونيسي ف عمرو تمن سنين مات ب سباب خسران الدم من مورا واحد لهجمة ف 2007.[71]

لإيݣوانات لخوضر (Iguana iguana)، من لحيوانات د الدار الشعبيين.

شلّا نواع من الزرموميات مخلّيينهم كا حيوانات د الدار، منهم الدراݣوات لمعققين،[72] لإيݣوانات، لآنولات،[73] و لبو بريصات (بحال النوع الشعبي بوبريص النمر).[72] زرموميات لمونيطور بحال ورل الصاڤانا و الطيݣوات كيف طيݣو لآرجونتين و الطيݣو لحمر حتى هوما كايخلّيوهم.

طيݣو حمر كايشرب لما من واحد لموزّيع.

لإيݣوانات لخضرين كايتكالو ف أمريكا لوسطانية، فين كايعيطو ليهم شي خطرات "دجاج الشجر" ب سباب لقاعيدة ديال الترياح ف الشجر و بنّتهم لي بحال الدجاج كيف ما كايقولو،[74] ف لوقيتة لي الزرموميات مشوكين لقزيبة كايتكالو ف إفريقيا. ف شمال إفريقيا. النواع من ݣنس الضب (Uromastyx) لي كايعيطو ليهم "حوت الصحرا" كايتكالو من لقبايل النوماضيين.[75]

الزرموميات بحال وحش لهيلا كاينتجو طوكسينات ب تطباقات طبيين. الطوكسين د لهيلا كاينقص من لپلازما ݣلوكوز؛ هاد لمادّة دابا تصايبات على ود التخدام ف الضروݣ لأونتي سكار، إيكزانيتيد (exenatide).[76] واحد الطوكسين خر من بزاق وحش لهيلا تدرس فيه على قبل تخدامو كا ضروݣ أونتي زهايمر.[77]

ف التقافة

[بدل | بدل لكود]

الزرموميات كايبانو ف لميطولوجيات و لحجايات لفولكلوريين ف ݣاع قنات الدنيا. ف لميطولوجية لؤسطرالية لأصلية (aboriginal)، طارّوطارّو، الرب الزرمومية، هو لي فرق لݣنس لبنادمي ل دكور و نتوات، و عطى ل الناس لقدرة باش يعبّرو على ريوسهم ف لفن. واحد لملك زرمومية سميتو موؤو (Mo'o) بان ف هاوايي و تقافات خرين ف پولينيزيا. ف لآمازون، الزرمومية هي لملك د لوحوش، أما بينات شعب لبانتو ف إفريقيا، الرب أونكولونكولو (UNkulunkulu) سيفط واحد التاتة باش تقول ل لبشر بلي غايبقاو ديما عايشين، و لايني التاتة توقّفات، و واحد التاتة خرة جابت ميساج خر، و هنايا فين تحدّات لبشرية.[78] واحد لوسطورة شعبية ف ماهاراشطرا كاتعاود لحجاية على كيفاش لورل لهندي الشايع (common Indian monitor)، ب قنبّات مربوطين فيه، تخدّم ف الطلوع ف حيوط لقصبة ف معراكة سينهاݣاد.[79] ف لمنطاقة لي كايهدرو ب لبوجپوري ف لهند و نيپال، كاين واحد لعتيقاد بينات الطفال بلي، يلا تقاصت قزيبة السكينك تلاتة (ولا خمسة) د لخطرات ب صبع ليد الصغير كايتحضّرو لفلوس.

الزرموميات ف بزاف ديال التقافات كايشركو نفس الرمزية د اللفاعي، ب الضبط كا رمز د لقيامة. هادشي يقدر يكون تشتق من النسيلاخ ديالهم لمنتاضم. السباب علاش الزرموميات كايتحطو ف حمّالات الشمع عند لمسيحيين ف لغالب كايلمح ل نفس الرمزية. على حساب دجاك تريزيدر، ف مصر و لعالم لكلاسيكي، الزرموميات كانو رموز نافعين، و كايربطوهم ب لحكمة. ف لفولكلور لإفريقي، لابوريجينال، و لميلانيزي هوما مربوطين ب شي أبطال تقافيين و فيݣورات ديال جدودهم.[80]

مصادر

[بدل | بدل لكود]
  1. ^ "The Reptile Database". Reptile-database.reptarium.cz
  2. ^ Muir, Hazel (3 December 2001). "Minute gecko matches smallest reptile record". New Scientist.
  3. ^ "The world's top 10 reptiles – in pictures". The Guardian. 5 May 2016.
  4. ^ McDiarmid, Roy W. (2012). "Reptile Diversity and Natural History: An Overview". In McDiarmid, Roy W.; et al. (eds.). Reptile Biodiversity: Standard Methods for Inventory and Monitoring. University of California Press. p. 13.
  5. ^ Jones; et al. (2011). "Hard tissue anatomy of the cranial joints in Sphenodon (Rhynchocephalia): sutures, kinesis, and skull mechanics". Palaeontologia Electronica. 14(2, 17A): 1–92
  6. ^ a b c d e Bauer, A. M.; Kluge, A. G.; Schuett, G. (2002). "Lizards". In Halliday, T.; Adler, K. (eds.). The Firefly Encyclopedia of Reptiles and Amphibians. Firefly Books. pp. 139–169.
  7. ^ Starr, C.; Taggart, R.; Evers, C. (2012). Biology: The Unity and Diversity of Life. Cengage Learning. p. 429
  8. ^ Pough; et al. (2002) [1992]. Herpetology (Third ed.). Pearson Prentice Hall.
  9. ^ a b c Spinner, Marlene; et al. (2014). "Subdigital setae of chameleon feet: Friction-enhancing microstructures for a wide range of substrate roughness". Scientific Reports. 4: 5481.
  10. ^ Irschick, D. J.; Jayne, B. C. (1 May 1999). "Comparative three-dimensional kinematics of the hindlimb for high-speed bipedal and quadrupedal locomotion of lizards". Journal of Experimental Biology. 202 (9): 1047–1065.
  11. ^ Piper, Ross (2007), Extraordinary Animals: An Encyclopedia of Curious and Unusual Animals, Greenwood Press.
  12. ^ Pianka and Vitt, 23–24
  13. ^ a b Wilson, Steve (2012). Australian Lizards: A Natural History. Csiro Publishing. pp. 65–74.
  14. ^ Frasnelli, J.; et al. (2011). "The vomeronasal organ is not involved in the perception of endogenous odors". Hum. Brain Mapp. 32 (3): 450–60.
  15. ^ Brames, Henry (2007), "Aspects of Light and Reptile Immunity" (PDF), Iguana: Conservation, Natural History, and Husbandry of Reptiles, 14 (1): 19–23
  16. ^ a b Fry, Bryan G.; et al. (16 November 2005). "Early evolution of the venom system in lizards and snakes". Nature. 439 (7076): 584–588.
  17. ^ Casey, Constance (26 April 2013). "Don't Call It a Monster". Slate. Archived from the original on 10 October 2018
  18. ^ Hargreaves, Adam D.; et al. (2014). "Testing the Toxicofera: Comparative transcriptomics casts doubt on the single, early evolution of the reptile venom system". Toxicon. 92: 140–156.
  19. ^ Robert L.; Craven, Brent A.; Schachner, Emma R.; Farmer, C. G. (2014). "New insight into the evolution of the vertebrate respiratory system and the discovery of unidirectional airflow in iguana lungs". PNAS. 111 (48): 17218–17223.
  20. ^ Schachner, Emma R.; Cieri, Robert L.; Butler, James P.; Farmer, C. G. (2014). "Unidirectional pulmonary airflow patterns in the savannah monitor lizard". Nature. 506 (7488): 367–370.
  21. ^ Pianka and Vitt, pp. 108
  22. ^ a b Pianka and Vitt, pp. 115–116
  23. ^ Pianka and Vitt, pp. 110–111
  24. ^ Pianka and Vitt, pp. 117–118.
  25. ^ a b Pianka and Vitt, pp. 119
  26. ^ Morales, Alex (20 December 2006). "Komodo Dragons, World's Largest Lizards, Have Virgin Births". Bloomberg Television. Archived from the original on 8 October 2007
  27. ^ a b Olsson M, Tobler M, Healey M, Perrin C, Wilson M. A significant component of ageing (DNA damage) is reflected in fading breeding colors: an experimental test using innate antioxidant mimetics in painted dragon lizards. Evolution. 2012 Aug;66(8):2475-83.
  28. ^ a b Pianka and Vitt, pp. 86.
  29. ^ Pianka and Vitt, pp. 32–37
  30. ^ Buckley, Lauren B.; Ehrenberger, Joseph C.; Angilletta, Michael J. (2015). "Thermoregulatory behaviour limits local adaptation of thermal niches and confers sensitivity to climate change". Functional Ecology. 29 (8): 1038–1047.
  31. ^ Ortega, Jesús; Martín, José; Crochet, Pierre-André; López, Pilar; Clobert, Jean (2019-03-15). "Seasonal and interpopulational phenotypic variation in morphology and sexual signals of Podarcis liolepis lizards". PLOS ONE. 14 (3): e0211686.
  32. ^ Pianka and Vitt, pp. 86
  33. ^ a b Pianka and Vitt, pp. 94–106.
  34. ^ Lanham, E. J.; Bull. M. C. (2004). "Enhanced vigilance in groups in Egernia stokesii, a lizard with stable social aggregations". Journal of Zoology. 263 (1): 95–99.
  35. ^ a b c d Pianka and Vitt, pp. 87–94
  36. ^ a b c d e f g Bauer, A. M.; Kluge, A. G.; Schuett, G. (2002). "Lizards". In Halliday, T.; Adler, K. (eds.). The Firefly Encyclopedia of Reptiles and Amphibians. Firefly Books. pp. 139–169
  37. ^ a b Langley, L. (24 October 2015). "Are Lizards as Silent as They Seem?". news.nationalgeographic.com.
  38. ^ Ligon, Russell A.; McGraw, Kevin J. (2013). "Chameleons communicate with complex colour changes during contests: different body regions convey different information". Biology Letters. 9 (6): 20130892.
  39. ^ Ligon, Russell A (2014). "Defeated chameleons darken dynamically during dyadic disputes to decrease danger from dominants". Behavioral Ecology and Sociobiology. 68 (6): 1007–1017.
  40. ^ Frankenberg, E.; Werner, Y. L. (1992). "Vocal communication in the Reptilia–facts and questions". 41. Acta Zoologica: 45–62
  41. ^ Barnett, K. E.; Cocroft, R. B.; Fleishman, L. J. (1999). "Possible communication by substrate vibration in a chameleon" (PDF). Copeia. 1999 (1): 225–228.
  42. ^ a b c d e f Pianka and Vitt, pp. 41–51.
  43. ^ Pianka and Vitt, pp. 53–55.
  44. ^ Pianka and Vitt, pp. 162.
  45. ^ Marshall, Kate; Philpot, Kate E.; Stevens, Martin (25 January 2016). "Microhabitat choice in island lizards enhances camouflage against avian predators". Scientific Reports. 6: 19815.
  46. ^ Yong, Ed (16 July 2014). "Lizard 'Sees' With Its Skin For Automatic Camouflage". National Geographic.
  47. ^ Stuart-Fox, Devi; Moussalli, Adnan; Whiting, Martin J. (23 August 2008). "Predator-specific camouflage in chameleons". Biology Letters. 4 (4): 326–329.
  48. ^ Sherbrooke, WC (2003). Introduction to horned lizards of North America. University of California Press. pp. 117–118.
  49. ^ Scientists discover how lizards regrow tails Archived 2017-10-27 at the Wayback Machine, The Independent, August 20, 2014
  50. ^ Scherz, Mark D.; et al. (2017). "Off the scale: a new species of fish-scale gecko (Squamata: Gekkonidae: Geckolepis) with exceptionally large scales". PeerJ. 5: e2955.
  51. ^ Cooper, William E. Jr. (2010). "Initiation of Escape Behavior by the Texas Horned Lizard (Phrynosoma cornutum)". Herpetologica. 66 (1): 23–30.
  52. ^ Hewitt, Sarah (5 November 2015). "If it has to, a horned lizard can shoot blood from its eyes". BBC.
  53. ^ Tałanda, Mateusz; Fernandez, Vincent; Panciroli, Elsa; Evans, Susan E.; Benson, Roger J. (2022-11-03). "Synchrotron tomography of a stem lizard elucidates early squamate anatomy". Nature. 611 (7934): 99–104.
  54. ^ Evans, Susan E. (2022-08-11), Gower, David J.; Zaher, Hussam (eds.), "The Origin and Early Diversification of Squamates", The Origin and Early Evolutionary History of Snakes (1 ed.), Cambridge University Press, pp. 7–25,
  55. ^ Herrera-Flores, Jorge A.; Stubbs, Thomas L.; Benton, Michael J. (March 2021). "Ecomorphological diversification of squamates in the Cretaceous". Royal Society Open Science. 8 (3): rsos.201961, 201961.
  56. ^ ElShafie, Sara J. (5 January 2024). Meloro, Carlo (ed.). "Body size estimation from isolated fossil bones reveals deep time evolutionary trends in North American lizards". PLOS ONE. 19 (1): e0296318.
  57. ^ Dash, Sean (2008). Prehistoric Monsters Revealed. United States: Workaholic Productions / History Channel.
  58. ^ Ilaria Paparella; Alessandro Palci; Umberto Nicosia; Michael W. Caldwell (2018). "A new fossil marine lizard with soft tissues from the Late Cretaceous of southern Italy". Royal Society Open Science. 5 (6): 172411.
  59. ^ Caldwell, M. (1999-01-01). "Squamate phylogeny and the relationships of snakes and mosasauroids". Zoological Journal of the Linnean Society. 125 (1): 115–147.
  60. ^ Schoch, Rainer R.; Sues, Hans-Dieter (24 June 2015). "A Middle Triassic stem-turtle and the evolution of the turtle body plan". Nature. 523 (7562): 584–587.
  61. ^ Reeder, Tod W.; Townsend, Ted M.; Mulcahy, Daniel G.; Noonan, Brice P.; Wood, Perry L.; Sites, Jack W.; Wiens, John J. (2015). "Integrated Analyses Resolve Conflicts over Squamate Reptile Phylogeny and Reveal Unexpected Placements for Fossil Taxa". PLOS ONE. 10 (3): e0118199.
  62. ^ Wiens, J. J.; Hutter, C. R.; Mulcahy, D. G.; Noonan, B. P.; Townsend, T. M.; Sites, J. W.; Reeder, T. W. (2012). "Resolving the phylogeny of lizards and snakes (Squamata) with extensive sampling of genes and species". Biology Letters. 8 (6): 1043–1046.
  63. ^ Zheng, Yuchi; Wiens, John J. (2016). "Combining phylogenomic and supermatrix approaches, and a time-calibrated phylogeny for squamate reptiles (lizards and snakes) based on 52 genes and 4162 species". Molecular Phylogenetics and Evolution. 94 (Pt B): 537–547.
  64. ^ Franklin-Brown, Mary (2012). Reading the world : encyclopedic writing in the scholastic age. Chicago London: The University of Chicago Press. p. 223;377.
  65. ^ James Macartney: Table III in: George Cuvier (1802) "Lectures on Comparative Anatomy" (translated by William Ross under the inspection of James Macartney). Vol I. London, Oriental Press, Wilson and Co.
  66. ^ Alexandre Brongniart (1800) "Essai d'une classification naturelle des reptiles. 1ère partie: Etablissement des ordres." Bulletin de la Science. Société Philomathique de Paris 2 (35): 81–82
  67. ^ Gauthier, J. A.; Kluge, A. G.; Rowe, T. (June 1988). "Amniote phylogeny and the importance of fossils" (PDF). Cladistics. 4 (2): 105–209.
  68. ^ Debraga, M. & Rieppel, O. (1997). "Reptile phylogeny and the interrelationships of turtles". Zoological Journal of the Linnean Society. 120 (3): 281–354.
  69. ^ Losos, Jonathan B. (1992). "The Evolution of Convergent Structure in Caribbean Anolis Communities". Systematic Biology. 41 (4): 403–420
  70. ^ Brandley, Matthew C.; et al. (August 2008). "Rates And Patterns In The Evolution Of Snake-Like Body Form In Squamate Reptiles: Evidence For Repeated Re-Evolution Of Lost Digits And Long-Term Persistence Of Intermediate Body Forms". Evolution. 62 (8): 2042–2064.
  71. ^ "Komodo dragon kills boy in Indonesia". NBC News. 2007-06-04.
  72. ^ a b Virata, John B. "5 Great Beginner Pet Lizards". Reptiles Magazine.
  73. ^ McLeod, Lianne. "An Introduction to Green Anoles as Pets". The Spruce.
  74. ^ "Referencias culturales - todo iguanas verdes". Archived from the original on 2016-10-26.
  75. ^ Grzimek, Bernhard. Grzimek's Animal Life Encyclopedia (Second Edition) Vol 7 – Reptiles. (2003) Thomson – Gale. Farmington Hills, Minnesota. Vol Editor – Neil Schlager. ISBN 0-7876-5783-2 (for vol.7). p. 48
  76. ^ Casey, Constance (26 April 2013). "Don't Call It a Monster". Slate.
  77. ^ "Alzheimer's research seeks out lizards". BBC. 5 April 2002
  78. ^ Greenberg, Daniel A. (2004). Lizards. Marshall Cavendish. pp. 15–16.
  79. ^ Auffenberg, Walter (1994). The Bengal Monitor. University Press of Florida. p. 494
  80. ^ Tresidder, Jack (1997). the Hutchinson Dictionary of Symbols. London: Helicon. p. 125.
مرجّعة من "https://ary.wikipedia.org/w/index.php?title=زرمومية&oldid=405145"