Caesaraugusta

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Caesaraugusta
Colonia inmune romana
Muralla de Caesaraugusta
Entidat  • País  • Provincia	Colonia inmune Imperio Romano Hispania Tarraconense
Coordenadas	41°39’ 6’’N 0°55’48’’U
Actual	Zaragoza
Fundación	15 aC

Caesaraugusta ye o nombre con que yera conoixita l'actual ciudat de Zaragoza en tiempos d'os romanos.

Fue establita en honor d'o Emperador César Augusto alto u baixo en l'anyo 15 aC como una colonia sobre a población ibera de Salduie. En ixe mesmo inte César Augusto yera organizando as provincias d'Hispania dezaga d'a suya victoria en as Guerras Cantabras.

Colonia Caesar Augusta yera o nombre oficial d'a nueva ciudat, gozaba d'o privilechio de tener o nombre completo d'o suyo fundador, qui acomandó a suya deductio, como atras muitas fainas de l'Imperio, a lo suyo choven Agripa.

En a fundación d'a ciudat, participoron soldatos veterans d'as lechions IV Macedonica, VI Victrix y X Gemina, licenciatos dezaga la dura campanya contra os Cantabros, con a doble intinción de guaranciar a esfensa d'o territorio y de fixar-ie a presencia de Roma. Caesaraugusta teneba o títol de Colonia Inmune, lo que feba que goza-se de determinatos privilechios, asinas teneba dreito a cudir y yera desimita d'o pago d'impuestos. Os nuevos ciudadans fuoron adscritos a la tribu Aniense.

En o proceso de reorganización de territorios hispanos, se creyan tres provincias, Tarraconensis, Baetica y Lvsitania, dividitas en conventos churidicos (distritos menors con funcions chudicials y administrativas); d'éls, o rechito por Caesaraugusta, o Convento Churidico Caesaraugustano, yera lo mas amplo d'os siet en os que se dividiba la provincia Tarraconense. Caesaraugusta asumió dende o primer inte o papel de cabecera rechional, substituyindo a la colonia Victrix Ivlia Celsa (actual Viliella d'Ebro).

O periodo de mayor fuga d'a ciudat (sieglos I y II) trayó muitas d'as grans obras publicas, belunas d'ellas encara pueden veyer-sen hue: o foro, o puerto fluvial (que convirtió a Caesarugusta en a prencipal redistribuidera de mercaderías d'a val de l'Ebro), as termas publicas, o teatro, l'anfiteatro, o primer puent d'a ciudat (situato en o mesmo puesto que l'actual puent de Piedra y que probablement yera una obra mixta de piedra y fusta).

L'augua también teneba un important papel en Caesaraugusta romana, tanto por a suya situación a o canto d'o río Ebro y chunto a la desembocadura de La Uerba y o Galligo como por os suyos complexos sistemas de furnito y regano. Chunto a las ya ditas termas, s'han documentato a-saber-los alchubs, fuents y trampos de canyerías de plomo y sanamiento.

Ya en o sieglo III prencipia la construcción d'una imponent muralla y l'albandono d'as grans obras publicas denotan o important proceso de crisi en o mundo romano (segunda metat d'o sieglo III).

Mientres o sieglo V, Caesaraugusta, como tot l'occident romano, ye adintro d'un proceso de desintegración d'o poder imperial. No yera una ciudat decadent y tenió una importancia temporal como seu imperial mientres la usurpación de Constantín III y Constant II. Dimpués d'esconfir a Didimo y Verinián Constant II en l'anyo 408 establió a suya cort en Caesaraugusta, que se convertió en seu imperial. Caesaraugusta li permitiba un contacto fácil tanto con Arlet como con Asturica Augusta, Emerita Augusta y Hispalis; tamién yera amán de los pasos pirenencos. Caesaraugusta se salvó d'as incursions de sueus, vandalos y alanos, que cruzoron os Pireneus en a santmigalada de l'anyo 409, por un acuerdo entre o cheneral Cheroncio y los barbaros en l'anyo 411 que lis permititiba d'establir-se en atras parz d'Hispania prou luent a cambio d'aduya militar. Este pacto permitió que a diferencia d'atras provincias romanas en a Tarraconense y Caesaragusta no bi hese presencia d'estos pueblos barbaros cuan Cheroncio fue esconfito.^[1]

• (es) Aragón en la época romana. Tema 6 Cesaraugusta.