Theuderich I.

Theuderich I.
König vo Metz
Fantasiibild vom Theuderich I. (Jean Dassier, 1676-1763)
Regierigsziit	511-533
Uf d Wält cho	vor 484
Gstorbe	533
Vorgänger	Chlodwig I.
Dronfolg	Lex Salica: Nume Söhn erbe, s Riich wird under de Erbe ufdeilt.
Nochfolger	si Sohn Theudebert I.
Verhürotet mit	1. Suavegotta 2. e Dochder vom Sigismund vo Burgund

Dr Theuderich I. (* vor 484; † 533) war von 511 bis 533 e fränkische König im Oste vom Riich gsi, wo spöter als Austrasie bezeichnet worden isch.

Dr Theuderich isch dr eltist Sohn vom Merowingerkönig Chlodwig I. gsi. Si Mueter isch en unbekannti Fränkin gsi, wo dr Gschichtsschriiber Gregor vo Tours as Konkubine bezeichnet het. Vermuetlig het si zur Sippe vo de Kölner König ghört. Die andere Chinder vom Chlodwig si alli vo siiner Frau Chrodechild gsi. Vo de Söhn us dere Eh si dr Chlodomer, dr Childebert I. und dr Chlothar I. bim Dod vom Chlodwig im Johr 511 no am Läbe gsi. Mit dene drei Halbbrüeder het dr Theuderich s Frankeriich ufdeilt. Är het dr östlig Deil übercho, wo d Champagne, d Auvergne, Deil vo Aquitanie und die rächtsrhiinische Gebiet umfasst het. D Residänz siig Reims gsi; das isch allerdings nit mit Quellezügnis gsicheret. Jede vo de vier Brüeder het e Deil vo dr Francia (em Kärngebiet vom Riich zwüschen em Rhii und dr Loire) und e Deil vo de Gebiet südlig vo dr Loire, wo dr Chlodwig eroberet gha het, übercho. Die komplizierti Deilig het uf em Stammesrächt, dr Lex Salica, basiert; die sait, ass alli Söhn gliichberechtigt siige bim Erbe. Die Erbregelig het bis ins 10. Johrhundert die fränkischi Gschicht bestimmt und het wäsentlig drzue biidrait, wie die europäische Riich im Hochmittelalter usgseh hai.

Dr Theuderich isch bim Dod vom Vater dr einzig erwachseni Sohn gsi und isch so zum Garant für e Bestand vom Riich in de Gränze vo 511 worde. 531 het er mit dr Hilf vo siim Brueder Chlothar I. s Königriich Thüringe eroberet. Siis Verhältnis zum Halbbrueder Childebert I. isch gspannt gsi, wil dä im Johr 531, eme Grücht noh, ass dr Theuderich gfalle siig, brobiert het, däm siis Riich z überneh.

Em Theuderich si ersti Frau isch d Suavegotta gsi, d Mueter vo siine beide Chinder. Si zweiti Frau isch d Dochder vom burgundische König Sigismund gsi; ihre Name weiss me nit. Wäge dere Hürot het dr Theuderich nit mitgmacht bim Chriegszug vo siine Brüeder gege Burgund. Noch em Dod vom Theuderich het si Sohn Theudebert I. (* um 500, † 548) sis Erb gege si Unggle chönne verdeidige.

Usser däm Sohn het dr Theuderich non e Dochter, d Theudechild, gha, wo vor 579 gstorben und z Saint-Pierre-le-Vif bi Sens begrabe worden isch, in ere Chille, wo si sälber het lo baue. Si isch zerst mit em Warnekönig Hermegisclus verhürotet gsi, denn mit däm siim Sohn Radigis und isch spöter, wo sich dr Radigis von ere drennt het, in ihri Heimet zruggange.

• Matthias Springer: Artikel Theuderich I., in: Reallexikon der Germanischen Altertumskunde 30 (2005) S. 459-463
• Eugen Ewig: Die Namengebung bei den ältesten Frankenkönigen und im merowingischen Königshaus, in: Francia 18/1 (1991) S. 21-69 (mit Stammtafel S. 48 und ausführlichen Angaben zur Prosopographie der Königsfamilie)
• Ian N. Wood: The Merovingian Kingdoms. London 1994

• genealogie-mittelalter.de

Dä Artikel basiert uff ere fräie Übersetzig vum Artikel „Theuderich_I.“ vu de dütsche Wikipedia. E Liste vu de Autore un Versione isch do z finde.