Tessub

De Tessub (z Ugarit: tṯb) isch de hurritisch Wettergott und o de Hoptgott. Wo d Hurriter i Syrie iigwanderet sind, isch er mitem Wettergott vo Ḫalpa (Aleppo) verschmulze.

De Tessub isch de Soo und Gegner vom Kumarbi und de Brüeder vom Tasmis und vo de Sauska. Sini Frau isch d Ḫebat. De Sarrumma und d Allanzu sind d Chind vo dem Götterpaar.

De Tessub isch de Gott vom Wetter, wo Sturm, Rege und Gwitter macht. Sini Waffe isch de Tunnerkail. Siin Wage werd vo zwee Stiere zoge, em Seri und em Ḫurri. Im hethitisch-hurritische Felshailigtum Yazılıkaya stoot er uf zwee Berggötter, em Namni und em Ḫazzi. Er füert di männlichi Götterprozession aa. Gegenöber von em stoot d Ḫebat, wo d Prozession vo de Göttine aafüert.