Pippin dr Mittleri

Dr Pippin dr Mittleri oder Pippin vo Herstal lat. Pippinus (* um 635; † 16. Dezember 714 in Jupille bi Lüttich) us em Gschlächt vo de Arnulfinger isch vo 679 bis 714 dr datsächlich Machthaber im Frankeriich gsi, sit 679 Huusmeier vo Austrasie, sit 680 als dux (Herzog) vo Austrasie, ab 688/689 as Huusmeier vo Neustrie (principale regimine majorum domus) und sit 688 Huusmeier vom Burgund. Er isch dr Sohn vom domesticus Ansegisel (* um 610; † 679) und dr Begga, dr Dochter vom austrische Huusmeier Pippin em Eltere, und Grosschind vom Arnulf vo Metz, em Bischof vo Metz vo 614 bis 629.

Noch em Dod vom Merowingerkönig Childerich III. het dr Pippin mit dr Understützig vo austrasische Adlige gege dr Neustrier Ebroin Chrieg gfüehrt. Er het zwar 679 verlore, aber si Vormacht isch vom Ebroin siim Nochfolger Waratto anerkennt worde. 687 het dr Pippin dr Bechar, em Waratto si Nochfolger, bi Tertry gschlage und het d Herrschaft über s ganze Riich übernoh. Er het si Sohn Drogo mit dr Witwe vom Berchar verhürotet und siine Söhn wichdigi Böste ge, für zum si Stellig im Riich z festige. 690 bis 695 het dr Pippin Friesland eroberet und dr angelsächsisch Mönch Willibrord as Missionar dört ane gschiggt.

Ane 707 het er gege d Alemane gchämpft, debi isch de alemannisch Herzog Gotfrid gfalle. Vo 709 bis 712 het er gege de alemannisch Herzog Willehari gchämpft.

Dr Pippin isch noch ere lange Chrankhet 714 gstorbe. Er isch z Chevremont begrabe worde.

No bevor dr Pippin dod gsi isch, hai sich si ersti Frau Plektrud–ihri Söhn si denn scho dod gsi–und dr Sohn vom Pippin siiner Gliebte Chalpaida, dr Karl, und dr Childebrand um s Erb afo striite. 717, drei Johr noch em Dod vom Vater, het dr Karl d Herrschaft a sich grisse.

• I. Plektrud (Hugobertiner)
  • Drogo
  • Grimoald der Jüngeri
• II. Chalpaida, die Gliebti
  • Karl Martell
• III. NN
  • Childebrand

• Schieffer, Rudolf: Die Karolinger, ISBN 3-17-016480-5, S. 16,19, 22-24, 26

• genealogie-mittelalter.de

Dä Artikel basiert uff ere fräie Übersetzig vum Artikel „Pippin_der_Mittlere“ vu de dütsche Wikipedia. E Liste vu de Autore un Versione isch do z finde.