Gaan na inhoud

Vlag van Singapoer

in Wikipedia, die vrye ensiklopedie
Vlag van Singapoer
Vlag van Singapoer
Vlag van Singapoer
Gebruik Nasionale vlag Nasionale vlag
Verhouding 2:3
Goedgekeur 3 Desember 1959[1]
Ontwerp Twee horisontale bane in rooi en wit met ’n wit sekelmaan en sterre in die skildhoek.

Die nasionale vlag van Singapoer is op 3 Desember 1959 amptelik in gebruik geneem. Die vlag vertoon twee horisontale bane in rooi bo en wit onder en ’n wit sekelmaan en vyf vyfpuntige sterre in die skildhoek.

Singapoer het in 1959 selfregering binne die Britse Ryk verkry. Die vlag is op 9 Augustus 1965 as nasionale vlag herbevestig toe die republiek onafhanklikheid verkry het. Voor onafhanklikheid was dit die enigste staatsvlag in Maleisië wat nie ’n verhouding van 1:2 gehad het nie. Die elemente op die vlag (die kleure, sekelmaan en sterre) dui op ’n jong, opkomende volk, verenigde broederskap en gelykheid en nasionale ideale.

Vaartuie gebruik nie die nasionale vlag as ’n vaandel nie. Handelskepe en ontspanningstuie gebruik ’n burgerlike vaandel van rooi met ’n variant van die sekelmaan-en-sterre-embleem in die middel. Nie-militêre regeringsvaartuie soos skepe van die kuswag gebruik ’n blou staatsvaandel met die nasionale vlag in die skildhoek en ’n agtpuntige rooi-en-wit windroos op die wapperkant. Oorlogskepe van die vloot vertoon ’n vaandel soortgelyk aan die staatsvaandel, maar dan in wit met ’n rooi windroos.

Die reëls wat deur die Wet op die Wapen en Vlag en Nasionale Lied van Singapoer gedefinieer is, beheer die gebruik en vertoon van die nasionale vlag. Die reëls is effens verslap sodat burgers op nasionale dae die vlag op voertuie, of enige tyd van die jaar aan hul huise kan vertoon.

Simboliek

[wysig | wysig bron]

Die Singapoer Wapen-, Vlag- en Volksliedreëls definieer die samestelling van die vlag en die simboliek van die elemente soos volg: rooi stel universele broederskap en gelykheid voor en wit stel deurdringende en ewigdurende reinheid en deur voor. Die wassende sekelmaan verteenwoordig ’n jong, opkomende nasie. Die vyf sterre stel die nasie se ideale van demokrasie, vrede, vooruitgang, geregtigheid en gelykheid voor.[2][3] Gedurende die tweede helfte van die 20ste eeu het die ster en sekelmaan as ’n simbool van Islam bekendheid begin verwerf en Singapoer se vlag is gevolglik in hierdie konteks gesien deur die land se Moslemaktiviste.[4]

Ontwerp

[wysig | wysig bron]
’n Wapperende nasionale vlag

Die hoogte-breedte-verhouding van die vlag is 2:3. Vir die vervaardiging van die vlae het die Singapoerse regering bepaal dat die skakering van die rooi wat vir die vlag gebruik word Pantone 032 moet wees.[5] Volgens die riglyne wat deur die Ministerie van Inligting, Kommunikasie en die Kunste (MIKK) mag die vlag in enige grootte gereproduseer en op enige tyd vertoon word mits dit in die voorgeskrewe verhouding en kleur is.[6] MIKK se aanbeveling is groottes van 915x1 370 mm, 1 220x1 830 mm en 1 830x2 740 mm.[7] Die aanbevole materiaal vir die nasionale vlag is dun- of vlagdoek.[5]

Geskiedenis

[wysig | wysig bron]

In die 19de eeu was Singapoer onder Britse bewind en het die land saam met Malakka en Penang die Straits Settlements uitgemaak. Die vlag wat gebruik is om die Settlements te verteenwoordig was ’n Blou Britse Vaandel, aanvanklik met slegs een goue kroon, daarna met drie goue krone – een vir elke kolonie – in ’n gaffel-en-skyf-motief.[8]

Die Kolonie Singapoer het nie ’n afsonderlike vlag gehad nie, maar die stad het in 1911 ’n wapenskild met ’n leeu op gekry. Gedurende Japannese besetting van Singapoer gedurende die Tweede Wêreldoorlog is die vlag van Japan op land deur die weermag gebruik en gedurende openbare gebeure.[9] Kort na die Tweede Wêreldoorlog het Singapoer ’n onafhanklike kroonkolonie geword en ’n eie vlag aangeneem. Dit was ’n gewysigde weergawe van die voorafgaande Blou Britse Vaandel, met ’n gaffel-en-skyf-motief waarin hierdie keer slegs een kroon was.[10][11]

Singapoer het op 3 Junie 1959 selfregering binne die Britse Ryk verkry.[12] Op 3 Desember 1959, met die instelling van die nuwe Yang di-Pertuan Negara (staatshoof), is die nasionale vlag saam met die landswapen en die nasionale lied, Majulah Singapura (Voorwaarts Singapoer), amptelik aanvaar.[13] Die destydse Adjunk-Eerste Minister, Toh Chin Chye, het die ontwikkeling van die nasionale vlag tydens ’n onderhoud in 1989 bespreek:

“ Hoewel ons selfregering gehad het, was dit nodig om van meet af aan genoeg verskillende rasse in ’n Singapoerse nasie saam te bind… Buiten die nasionale lied moet ons die vlag en wapen skep en ons het daarop aangedring dat dit ’n staatsvlag was wat naas die Union Jack vertoon moes word.[13] ”


Die ontwerp van die vlag is binne twee maande voltooi deur ’n komitee onder leiding van Toh. Hy wou aanvanklik die hele agtergrond in rooi hê maar die Kabinet het daarteen besluit omdat rooi as versamelpunt vir kommunisme gesien is.[14] Volgens Lee Kuan Yew het die Chinese bevolking vyf sterre versoek na aanleiding van die vlag van China terwyl die Moslembevolking ’n sekelmaan versoek het. Hierdie twee simbole is verenig om die nasionale vlag van Singapoer te skep.[15]

Op 30 November 1959 is die Ordonnansie op die Staatswapen en -vlag en Nasionale Lied van Singapoer 1959 deurgevoer om die gebruik en vertoon van die vlag en wapen en die uitvoering van die nasionale lied te reguleer.[16] Toe die mosie op 11 November 1959 voor die Wetgewende Vergadering gebring is, het die minister van kultuur, Sinnathamby Rajaratnam, gesê: “Nasionale vlae, wapens en liedere druk die hoop en ideale van ’n volk simbolies uit … Die besit van ’n nasionale vlag en wapen is vir ’n volk simbolies van selfrespek.”[13]

In September 1962 het die Singapoerese gestem om by die Federasie van Maleisië aan te sluit. Die proses is op 16 September 1963 voltooi toe die vlag van Maleisië deur Eerste Minister Lee Kuan Yew in Singapoer gehys is.[17] Die Singapoerse vlag is herbevestig as die nasionale vlag toe Singapoer op 9 Augustus 1965 ten volle onafhanklik van Maleisië geword het.[18]

  • Vlag van die Straits Settlements, 1868
    Ontwerp is in verlede gebruik maar sedertdien laat vaar Vlag van die Straits Settlements, 1868
  • Vlag van die Straits Settlements, 1874 tot 1925
    Ontwerp is in verlede gebruik maar sedertdien laat vaar Vlag van die Straits Settlements, 1874 tot 1925
  • Vlag van die Straits Settlements, 1925 tot 1942
    Ontwerp is in verlede gebruik maar sedertdien laat vaar Vlag van die Straits Settlements, 1925 tot 1942
  • Vlag van Japan gebruik gedurende die besetting, 1942 tot 1945
    Vlag van Japan gebruik gedurende die besetting, 1942 tot 1945
  • Vlag van die Kolonie Singapoer, 1946 tot 1952
    Ontwerp is in verlede gebruik maar sedertdien laat vaar Vlag van die Kolonie Singapoer, 1946 tot 1952
  • Vlag van die Kolonie Singapoer, 1952 tot 1959
    Ontwerp is in verlede gebruik maar sedertdien laat vaar Vlag van die Kolonie Singapoer, 1952 tot 1959
  • Vlag van Maleisië, gebruik toe Singapoer by die Federasie van Maleisië aangesluit het, 1963 tot 1965
    Vlag van Maleisië, gebruik toe Singapoer by die Federasie van Maleisië aangesluit het, 1963 tot 1965

Gebruik van die vlag

[wysig | wysig bron]

Nasionale Dag-viering

[wysig | wysig bron]

Singapoerese word aangemoedig om tydens vierings van die Nasionale Dag die nasionale vlag buite hul huise te vertoon en bewonersverenigings, vernaam dié van openbarebehuisingskemas reël dikwels gekoördineerde vertonings. Sommige Singapoerese weier egter om die vlag te vertoon omdat hulle hulself met die Volksaksieparty vereenselwig, eerder as met die nasie.[19] Jaarliks van 1 Julie tot 30 September mag enige persoon sonder die goedkeuring van die Minister volgens paragraaf (4), die vlag of ’n afbeelding daarvan inkorporeer as deel van enige kostuum of kleding mits dit nie die vlag disrespekteer nie.[20]

Tydens die Nasionale Dag in 2007 het 8 667 vrywilligers in Padang rooi en wit sambrele omhoog gehou om die grootste voorstelling nog van Singapoer se vlag op te lewer. Dit is gereël deur ’n jeugbeweging wat bande met die Nasionale Handelsuniekongres het.[21]

Ander tye

[wysig | wysig bron]
Die nasionale vlag en baniere word by Istanapark vertoon.

Buite die periode vir viering van die Nasionale Dag word die vlag op alle regeringsgeboue en regeringsverwante departemente, soos die gewapende magte, howe, kantore en skole vertoon. ’n Afbeelding van die vlag word normaalweg in elke klaskamer vertoon en skole hys en stryk die vlag aan die begin en einde van elke skooldag terwyl die nasionale lied gesing word en die nasionale eed afgelê word.[22]

Hoewel dit as verkeerd geag word, word die nasionale vlag soms vertoon deur vaartuie wat in Singapoer geregistreer is, omdat sulke vaartuie vereis word om geskikte nasionale kleure te vertoon wanneer hulle die have in- of uitvaar.[23] Die vaandel is rooi en belaai met ’n wit sirkel waarbinne die sekelmaan en sterre in wit vertoon word.[24] Die nasionale vlag word nie deur kuswagskepe en militêre oorlogskepe gebruik nie; albei klasse het hul eie vaandels.

Die Singapoerse regering maak ’n aankondiging oor die stryk van die vlag na halfstok in die geval van die afsterwe van ’n belangrike persoon of wanneer die land rou.[25] Die vlag word halfstok vertoon wanneer senior politici of voormalige presidente sterf en op 6 Januarie 2005 is die vlag halfstok vertoon as teken van respek vir diegene wat in die tsoenamiramp van 2004 omgekom het.[26]

In kultuur

[wysig | wysig bron]
Die nasionale vlag vertoon onder 'n venster, gefotografeer op Singapoer se Nasionale Dag (9 Augustus) in 2006.

Lim Su Chong, ’n Singapoerse komponis het in 1969 ’n lied met die titel Five Stars Arising gekomponeer met elemente van die nasionale vlag as tema. Die lirieke van die lied noem ’n nuwe maan, vyf sterre en ’n nuwe vlag wat “opstaan uit die stormagtige see”. Die maan is “jeugdig en helder en dra hoop, en rustig”, elke ster is “’n lamp om die pad te wys; ’n lamp wat almal kan sien” en die vlag is “bloedrooi soos die bloed van die mensdom, dog wit en suiwer en vry”.[27] Die lied word dikwels gedurende Nasionale Dag-vieringe gesing.

In Januarie 2003 is Justin Lee Chee Kong, ’n Singapoerse kunstenaar, deur die Media-ontwikkelingsowerheid verbied om ’n skildery getitel Dubbelgeluk—’n Fantasie in Rooi, wat bestaan het uit ’n afbeelding van die Singapoerse vlag met verskeie rooi uitbeeldings van die Chinese karakter vir dubbelgeluk, uit te stal. Die beweegrede hiervoor was op grond van die feit dat “die Nasionale Vlag ’n nasionale simbool is en dat geen woorde of simbole daarop gesuperponeer behoort te word nie”.[28]

Lee het aangevoer dat die werk eenvoudig sy liefde vir sy land uitgebeeld het en dat dit ’n uitdrukking van Singapoer se sukses was en hy het in ’n persverklaring gevra dat die werk “hanteer sal word as ’n kunstige en komplimentêre interpretasie van ’n nasionale ikoon”. In ’n onderhoud met The New Paper het hy gesê hy weet dat, as ’n burger ’n mens dit nie mag doen nie, maar dat dit kuns is en dat hy ’n kunstenaar is.[28] Hy het ook van dubbele standaarde gekla aangesien ’n Chinese kunstenaar, Gu Wen Da, kort tevore ’n nasionale vlag wat van haar gemaak was, by die Esplanade – Teaters aan die Baai, uitgestal het. Lee het gevoel dat die gebruik van haar die betekenis gedra het dat die vlag die verkeerde kleur was, en dat dit onsmaaklik was.[28]

Later in 2003 het The Rolling Stones Singapoer as deel van hul Licks-wêreldtoer besoek. Tydens die eerste konsert was daar twee opblaaspoppe op die verhoog waarvan een die Rolling Stones-logo en die ander die vlag van Singapoer op die kruis-area gehad het.[29] Weens die onwettige gebruik van die staatsvlag, en uit vrees vir die regering, is die poppe en die vlae verwyder vir die opvolgende konsert.[30]

In Augustus 2007 is ’n e-pamflet aan ten minste 1 500 lede van ’n Singapoerse kroeg se e-poslys gestuur waarin ’n nabyfoto van ’n vrou se kruis met die onderstuk van ’n baaipak waarop die sekelmaan en sterre vertoon is.[31] Dit is gedoen as deel van die kroeg se bemarkingsveldtog vir die Nasionale Dag-vieringe. Volgens die bemarkingsbestuurder van die kroeg “is die pamflet geensins beledigend jeens die land of enige persoon bedoel nie.”[32]

Die meerderheid van die mense in ’n peiling van The New Paper het gevoel dat die advertensie minagtend en in swak smaak was. MIKK het gesê dat die advertensie geen wet oortree het nie aangesien slegs ’n gedeelte van die vlag weergegee is – die totaliteit van die vlag se rooi en wit bane is byvoorbeeld nie weergegee nie. Die direkteur van die ministerie se Nasionale Weerstandigheidsafdeling, K.U. Menon, het egter gesê: “Die ministerie moedig nie sulke advertensies wat die nasionale vlag met minag hanteer, aan nie. […] Simbole moet met ’n mate van waardigheid hanteer word en ons hoop die kroeg sal op eie inisiatief die advertensie herroep.”[32]

In November 2010, gedurende die Asiese Spele wat in China gehou is, het die Singapoerse manswaterpolospan se swemklere ’n storm ontketen omdat elemente van die vlag onwelvoeglik vertoon is.[33] Kritici het gemeen dat die kledingstuk beledigend is en ’n vernedering vir die land is met die sekelmaan wat in die middel van die broek verskyn, regoor die kruisarea. Die kledingstuk is deur die span self ontwerp[34] maar het nie voorafgoedkeuring van MIKK gekry nie. Selfs nadat die kontroversie aan die lig gekom het, mog die span egter steeds die swemklere dra omdat die kompetisiereëls dit stel dat ’n span nie deur die loop van die Spele van uniform mag verander nie.

Regulasies en riglyne

[wysig | wysig bron]
Toeskouers met nasionale vlae by die 2007 Nasionale Dag-parade.
’n Reuse Singapoese vlag hang aan ’n CH-47 Chinook-helikopter vergesel deur twee Boeing AH-64D Longbow Apaches gedurende ’n oefening vir die Nasionale Dag-parade op 29 Julie 2006.
President George W. Bush van die VSA spreek ambassadepersoneel in Singapoer op 16 November 2006 toe. Die nasionale vlag agter hom is beklad met die Leeu-simbool van Singapoer.

Tot 2004 is die vlag regdeur die jaar eksklusief voor of op regeringsgeboue, ministeries, statutêre rade en skole vertoon.[35] Die vlag mog slegs in Augustus deur individue en nie-regeringsinstellings vertoon word om die land se nasionale dag op 9 Augustus te vier.[36] Gedurende die Nasionale Dag-vieringe (1 Julie tot 30 September) word reëls rakende die vertoon van die nasionale vlag buite geboue verslap.[37] Die vlag mag op enige voertuig (buiten ’n lykswa), vaartuig of vliegtuig vertoon word,[38] en mag as deel van enige kostuum of drag geïnkorporeer word mits dit op ’n respekvolle manier geskied.[39]

Hierdie beperkinge op indiwidue en nie-regeringsorganisasies is in 2004 verslap sodat die vlag deur die jaar onder sekere voorwaardes vertoon kon word. ’n Verklaring van die Ministerie van Inligting en die Kunste (nou MIKK) lui dat “die nasionale vlag, nasionale lied en Singapoerse leeukop … die sigbaarste simbole van ons soewereiniteit, trots en eer is” en het Singapoerese aangemoedig om hierdie “samebindende” simbole te gebruik om “te identifiseer met die nasie”.[40]

Geen beweegrede is vir die veranderinge gegee nie maar korrespondente van BBC-nuus het gemerk dat die regering ’n patriotiese sentiment, wat gedemp is deur ekonomiese kwessies, gedryf het. (In 2003 was werkloosheid in Singapoer op 5,9% die hoogste in 17 jaar en die uitbraak van die ernstige akute respiratoriese sindroom in Oos-Asië het die eiland se toerismebedryf ’n knou toegedien, wat gelei het die ’n eerste finansiële verlies in die geskiedenis van die Singapoerse lugredery.)[40]

Op versoek van Singapoerese is riglyne vir die gebruik van die vlag in 2006 verder uitgebrei sodat inwoners ’n verskeidenheid geleenthede gehad het om hul lojaliteit jeens Singapoer te betoon gedurende die Nasionale Dag-vieringe. MIKK het toegestaan dat, vir ’n toetstydperk van middel Julie tot einde Augustus, die vlag op voertuie en aan persone vertoon mag word met minimale beperkinge[41] In 2007 is die tydperk verleng na drie maande van Julie tot September.[6][42]

Singapoerse burgers, regerings- en nieregeringsorganisasies mag regdeur die jaar die vlag vertoon om hulself met die volk te identifiseer en word aangemoedig om dit te doen gedurende nasionale vieringe of gebeure van nasionale belang.[6] Nie-Singapoerse besighede en organisasies mag ook regdeur die jaar die vlag vertoon.[43] Die gebruik en vertoon van die vlag word beheer deur Deel III van die Reëls op Singapoer se Wapen en Vlag en Nasionale Lied[2] wat vasgestel is deur die Wet op Singapoer se Wapen en Vlag en Nasionale Lied.[44] Dit is ’n oortreding gespesifiseerde bepalings van die reëls willens en wetens te verbreek; die straf is ’n boete van nie meer nie as S$1 000.[45]

Die Singapoerse regering bepaal dat geeneen die nasionale vlag met disrespek mag hanteer nie,[46] soos dat die vlag aan die grond raak.[47] Die vlag mag nie onder ’n ander vlag, embleem of voorwerp vertoon word nie;[48] in saluut vir enige mens of voorwerp laat sak word nie;[49] of horisontaal vertoon of gedra word nie, maar altyd omhoog en vry.[50]

Binne Singapoer kry die nasionale vlag voorkeur bo alle ander vlae, onderworpe aan internasionale praktyk.[51] Wanneer dit as sodanig vertoon word, moet dit in die ereposisie wees; bedoelende dit moet waar prakties òf bo alle ander vlae òf langs ander vlae op dieselfde vlak na links (vir die aanskouer) geposisioneer word.[52] Wanneer die vlag gehys word of in ’n prosessie saam met ander vlae gedra word, moet dit vooraan ’n enkel ry vlae geskied, of indien die vlae langs mekaar is, regs soos deur die vaandeldraer gesien, wees[53] (d.i., links soos gesien deur die aanskouer). Die vaandeldraer moet die vlag hoog of oor sy regterskouer dra.[54]

Wanneer die vlag op ’n platform of verhoog vertoon word, moet dit hoër as alle ander versierings hang en hoër as enige spreker wat die platform of verhoog gebruik. Indien dit aan ’n vlagpaal op die platform of verhoog is, moet dit regs van die spreker vertoon word.[55] Wanneer die vlag hang moet dit teen ’n vertikale muur of ander vertikale plat oppervlak gehang word met die sekelmaan en sterre links bo aan die vlag wees vir die aanskouer.[56]

Wanneer die vlag buite ’n gebou vertoon word, moet die slegs aan ’n vlagpaal aan die voorkant van die gebou vertoon word.[57] Indien die vlag snags vertoon word moet dit goed verlig wees.[58] Die vlag mag slegs op die voertuig van die president van Singapoer of enige regeringsminister wat op ’n amptelike sakereis is, vertoon word.[59] Die vlag mag op geen privaatvaartuig of -vliegtuig vertoon word nie.[60]

Geen persoon mag die vlag vir enige kommersiële doeleindes gebruik of aanwend nie, of as enige meubilering, versiering, bedekking of houer,[61] buiten omstandighede wat deur MIKK goedgekeur is waarin daar geen disrespek jeens die vlag is nie.[62] Voorts word dit ook nie toegestaan dat die vlag gebruik word as deel van enige handelsmerk,[63] of om enige vlag te vervaardig of te ontwerp wat enige grafika op die vlag superponeer nie.[64] Die vlag, of ’n afbeelding daarvan, mag ook nie gebruik of toegepas word as deel van ’n kostuum of kleding nie.[65]

Die regering kan versoek dat die vlag halfstok gehang word in die geval van die afsterwe van ’n belangrike persoon of vir ’n dag van nasionale rou.[66] Geen persoon mag die vlag tydens ’n privaatbegrafnisdiens gebruik nie.[67] Die vlag mag egter oor die kis gedrapeer word gedurende ’n militêre- of staatsbegrafnis.[68] Geen persoon mag enige vuil of beskadigde vlag vertoon nie.[69] Enige verslete of beskadigde vlag moet in ’n geseëlde swart vullissak verpak word alvorens dit van kant gemaak word en moet nie sigbaar gelaat word nie.[6]

Ander vlae

[wysig | wysig bron]

Staatsvaartuie gebruik die Jalur Gemilang as die staatsvaandel. Die ander vaandels wat in Maleisië gebruik word, word hieronder weergegee.

  • Presidensiële standaard van Singapoer
    Presidensiële standaard van Singapoer
  • Blou vaandel van die Singapoerse regering
    Blou vaandel van die Singapoerse regering
  • Burgerlike vaandel van Singapoer
    Burgerlike vaandel van Singapoer
  • Vlootvaandel van Singapoer
    Vlootvaandel van Singapoer

Soortgelyke vlae

[wysig | wysig bron]

Verwysings

[wysig | wysig bron]
  1. ↑ "Singapoer" (in Engels). Flags of the World. Geargiveer vanaf die oorspronklike op 25 April 2019. Besoek op 28 Mei 2019.
  2. ↑ 2,0 2,1 (en) "Reëls op Singapoer se Wapen en Vlag en Nasionale Lied (Cap. 296, R 1, 2004 Gew. Uitg.)" (PDF). Regering van Singapoer. 2004. Geargiveer vanaf die oorspronklike (PDF) op 10 Julie 2010. Besoek op 19 November 2009. soos gewysig deur Wysigingsreëls op Singapoer se Wapen en Vlag en Nasionale Lied 2007 Geargiveer 3 Julie 2010 op Wayback Machine (S 377/2007)
  3. ↑ (en) Lee, Kuan Yew (1998). The Singapore Story: Memoirs of Lee Kuan Yew. Singapoer: Times Editions. pp. 342–343. ISBN 981-204-983-5.
  4. ↑ (en) Syed Muhd Khairudin Aljunied (Augustus 2009). "Handhawing van Islamitiese Aktivisme in Sekulêre Omgewings: Die Muhammadijah-beweging in Singapoer" (PDF). Asia Research Institute Working Paper Series No. 120. National University of Singapore. Besoek op 15 Desember 2009.; Syed Muhd Khairudin Aljunied, ‘Die Rol van Hadramis in Singapoer na WOII – ’n Herinterpretasie’, Immigrante & Minderhede 25, 2, bl. 167.
  5. ↑ 5,0 5,1 "Nasionale Simbole – Die Nasionale Vlag". MyStory (in Engels). Nasionale Erfenisraad. 2009. Geargiveer vanaf die oorspronklike op 2 Mei 2012. Besoek op 17 Desember 2009.
  6. ↑ 6,0 6,1 6,2 6,3 (en) "Nasionale Simbole en Verwysings: Die Nasionale Vlag—Riglyne". Singapore Infomap. Ministerie van Inligting, Kommunikasie en die Kunste. Geargiveer vanaf die oorspronklike op 12 Mei 2009. Besoek op 16 Oktober 2007.
  7. ↑ (en) Ministerie van Inligting, Kommunikasie en die Kunste (2001). Die Nasionale Simbole-gereedskapstel. Singapore: Ministerie van Inligting, Kommunikasie en die Kunste. p. 5. OCLC 49823410.
  8. ↑ (en) National Geographic Society (1918). "Die Vlae van die Britse Ryk" (PDF). National Geographic. National Geographic Society. 32: 383. Besoek op 12 Januarie 2009.
  9. ↑ (en) Foong, Choon Hon; Xie Song Shan (2006). ETERNAL VIGILANCE: The Price of Freedom. Singapoer: Asiapac Books Pte Ltd. pp. 115–16. ISBN 981-229-395-7.
  10. ↑ "Singapoer, Vlag van" (in Engels). Encyclopædia Britannica. 2008. Geargiveer vanaf die oorspronklike op 30 Maart 2012. Besoek op 14 September 2008.
  11. ↑ (en) Corfield, Justin J.; Robin Corfield (April 2006). Encyclopedia of Singapore. Rowman & Littlefield Publishers, Inc. p. 68. ISBN 0-8108-5347-7.
  12. ↑ (en) Wheatley, Paul; Kernial Singh Sandhu, Hussein Alatas, Instituut van Suidoos-Asiese Studies (1989). Management of Success: The Moulding of Modern Singapore. Instituut van Suidoos-Asiese Studies. p. 1067. ISBN 978-981-3035-42-3.{{cite book}}: AS1-onderhoud: meer as een naam (link)
  13. ↑ 13,0 13,1 13,2 Dr. Toh Chin Chye [orale geskiedenisonderhoud, toetredingno. A1063, haspel 1]: "Staatsimbole". Toegang tot Aanlynargief (a2o), Nasionale Argief van Singapoer. Geargiveer vanaf die oorspronklike op 8 Junie 2019. Besoek op 4 November 2007.
  14. ↑ Zaubidah Mohamed (18 Desember 2004). "Die nasionale vlag van Singapoer". Singapore Infopedia, Nasionale Biblioteekraad. Geargiveer vanaf die oorspronklike op 6 Mei 2008. Besoek op 4 November 2007.
  15. ↑ (en) Lee Kuan Yew (1998). The Singapore Story: Memoirs of Lee Kuan Yew. Singapoer: Times Editions. pp. 342–343. ISBN 978-981-204-983-4.
  16. ↑ Ordonnansie op die Staatswapen en -vlag en Nasionale Lied van Singapoer 1959 (No. 70 van 1959), nou die Wet op die Wapen en Vlag en Nasionale Lied van Singapoer cap. 296, 1985, Hersiene uitg.
  17. ↑ (en) "Pad na onafhanklikheid – Samesmelting met Maleisië". Singapore Press Holdings. 1998. Geargiveer vanaf die oorspronklike op 13 Oktober 2013. Besoek op 30 November 2009.
  18. ↑ (en) "Nasionale Simbole en Verwysings: Die Nasionale Vlag". Singapore Infomap. Ministerie van Inligting, Kommunikasie en die Kunste. 2004. Geargiveer vanaf die oorspronklike op 27 April 2009. Besoek op 16 Oktober 2007.
  19. ↑ (en) Leong, Laurence Wai-Teng (Desember 2001). "Consuming the Nation: National Day Parades in Singapore" (PDF). Nieu-Seelandse Tydskrif vir Asiese Studies. Die Nieu-Seelandse Genootskap vir Asiese Studies. 3 (2): 5 at 14. Geargiveer vanaf die oorspronklike (PDF) op 16 Julie 2007. Besoek op 3 November 2007.
  20. ↑ (en) http://statutes.agc.gov.sg/aol/search/display/view.w3p;ident=280a9818-9661-4fed-b6cc-784463ace351;page=0;query=DocId%3A%223100849d-3555-4b06-ba59-bf4998ae34f2%22%20Status%3Ainforce%20Depth%3A0;rec=0#pr10-he- Geargiveer 15 Junie 2016 op Wayback Machine
  21. ↑ "Massadeelname – gemeenskappe: Grootste nasionale vlag deur sambrele gevorm". Die Singapore Boek van Rekords. 9 Augustus 2007. Geargiveer vanaf die oorspronklike op 12 Mei 2008. Besoek op 3 November 2007.
  22. ↑ Sien bv. die volgende: para. 22 van Lee, Hsien Loong (17 Mei 1997). "Nasionale Onderwys: Toespraak deur BG Lee Hsien Loong, adjunk-Eerste Minister by die bekendstelling van die Nasionale Onderwys op Saturdag 17 Mei 1997 by TCS TV-teater om 9.30 am". Ministerie van Onderwys. Besoek op 4 November 2007. Paragraaf 18 van Teo, Chee Hean (8 Julie 2003). "Kry die basiese reg: Toespraak deur RADM (NS) Teo Chee Hean, Minister vir Onderwys en Tweede Minister vir Verdediging by die NIE Onderwysersinhuldigingseremonie om 2.30 pm op 8 Julie 2003 by die Singapoer Binnenshuise Stadion". Ministerie van Onderwys. Besoek op 4 November 2007. Paragraaf 3 van "Persverklaring: Indiening van aanbiedinge vir privaatskole" (in Engels). Ministerie van Onderwys. 5 Junie 2006. Geargiveer vanaf die oorspronklike op 15 September 2016. Besoek op 4 November 2007.
  23. ↑ Seksie 37(1) van die Wet op Handelskepe (179/1996). ’n Meester van ’n Singapoerse skip wat sonder grondige rede nie aan hierdie seksie voldoen nie is skuldig aan ’n oortreding en op skuldigbevinding onderhewig aan ’n boete wat nie S$1000 oorskrei nie: s. 37(2). Indien enige onderskeidende nasionale kleure anders as die regeringsvaandel aan boord van ’n Singapoerse skip gehys word sonder amptelike instemming is die meester van die skip of die eienaar indien aan boord – asook elke ander persoon wat die kleure hys – skuldig aan ’n oortreding en op skuldigbevinding onderhewig aan ’n boete wat nie S$1000 oorskrei nie: s. 37(2).
  24. ↑ Lee Seng Kong (Direkteur van Marine) (20 Julie 1999). "Nasionale kleure vir Singapoerse skepe (MC No. 13 van 1999)" (in Engels). Maritieme- en Hawe-owerheid van Singapoer. Geargiveer vanaf die oorspronklike op 13 Februarie 2012. Besoek op 4 Desember 2008.
  25. ↑ (en) Our Army Customs and Traditions (PDF). Singapoer: Ministerie van Verdediging. 2006. pp. 130–131. Geargiveer vanaf die oorspronklike (PDF) op 3 Oktober 2008.
  26. ↑ (en) "'n Minuut van stilte gaan in Singapoer heers; SCDF sal dit aankondig". Ministerie van Gemeenskapsontwikkeling, Jeug en Sport. 7 Januarie 2005. Geargiveer vanaf die oorspronklike op 23 Oktober 2007. Besoek op 4 November 2007.
  27. ↑ (en) "Five Stars Arising". Sing Singapore. 2005. Geargiveer vanaf die oorspronklike op 27 September 2007. Besoek op 16 Oktober 2007.
  28. ↑ 28,0 28,1 28,2 (en) Teo, Faith (25 Januarie 2003). "Kuns op die vlag: 'n Publisiteitsfoefie?". The New Paper. Geargiveer vanaf die oorspronklike op 12 November 2007. Besoek op 4 November 2007.
  29. ↑ (en) Millard, Mike; Ivan Hall (2004). Jihad in Paradise: Islam and Politics in Southeast Asia. M. E. Sharpe. p. 125. ISBN 978-0-7656-1336-3.
  30. ↑ (en) Boehme, Olaf; Gerd Coordes; Chris Jagger (Junie 2005). The Rolling Stones: Fruit of the Loom Tour; Licks World Tour 2002/2003. Norderstedt: Books on Demand GmbH. p. 120. ISBN 3-8334-2857-0.
  31. ↑ Ong, Alexis (18 Augustus 2008). "The Insider – the national flag". Time Out Singapore (in Engels). Time Out Group Ltd. Geargiveer vanaf die oorspronklike op 22 Februarie 2014. Besoek op 30 November 2009.
  32. ↑ 32,0 32,1 (en) Au Yong, Esther (12 Augustus 2007). "Gewilde kroeg gekasty oor astrante gebruik van maan en sterre van S'poer vlag". The New Paper. Geargiveer vanaf die oorspronklike op 12 November 2007. Besoek op 4 November 2007.
  33. ↑ Ransom, Ian (25 November 2010). "Spele-Skraps swemklere-ontwerp laat Singapoer bloos". Reuters (in Engels). Reuters. Geargiveer vanaf die oorspronklike op 5 Julie 2015. Besoek op 25 Februarie 2012.
  34. ↑ "Singapoer Polospanklere "Onwelvoeglik"". AP (in Engels). CBS News. 26 November 2010. Geargiveer vanaf die oorspronklike op 27 Oktober 2011. Besoek op 25 Februarie 2012.
  35. ↑ (en) Mohamed, Zaubidah (21 Desember 1999). "Die nasionale vlag van Singapoer". Infopedia Singapore. Singapoerse Nasionale Biblioteekraad. Geargiveer vanaf die oorspronklike op 6 Mei 2008. Besoek op 3 November 2009.
  36. ↑ (en) Ministerie van Inligting, Kommunikasie en die Kunste; die Kunste (2001). Die Nasionale Simbole-pakket. Singapoer: Ministerie van Inligting, Kommunikasie en die Kunste. p. 7.
  37. ↑ Singapoer Wapen en Vlag en Nasionale Lied Reëls, r. 5(3).
  38. ↑ Singapoer Wapen en Vlag en Nasionale Lied Reëls, r. 6(3).
  39. ↑ Singapoer Wapen en Vlag en Nasionale Lied Reëls, r. 9(5).
  40. ↑ 40,0 40,1 (en) "Singapoerese aangemoedig om die vlag te vertoon". BBC News. 3 Januarie 2004. Sien ook (en) "Singapoer verslap beheer oor vlagvertoon". Financial Times. 3 Januarie 2004.
  41. ↑ Noor Mohd Aziz (10 Julie 2006). "Reëls vir vertoon van nasionale vlag verslap" (in Engels). Channel NewsAsia. Geargiveer vanaf die oorspronklike op 6 Maart 2009. Besoek op 16 Oktober 2007.
  42. ↑ (en) "Persverklaring Singapoerse Regering: Vertoon van nasionale vlag gedurende Nasionale Dag-vieringe 2007". Nasionale Resilience afdeling, Ministerie van Inligting, Kommunikasie en die Kunste. 17 Julie 2007. Geargiveer vanaf die oorspronklike op 15 Augustus 2009. Besoek op 4 November 2007.
  43. ↑ (en) "Gebruik die nasionale vlag gedurende die Nasionale Dag-vieringe 2009". Ministerie van Inligting, Kommunikasie en die Kunste. 14 Julie 2009. Geargiveer vanaf die oorspronklike op 22 Desember 2015. Besoek op 10 Desember 2009.
  44. ↑ (en) "Wet op Singapoer se Wapen en Vlag en Nasionale Lied (Cap. 296, 1985 Gew. Uitg.)". Regering van Singapoer. 1985. Geargiveer vanaf die oorspronklike (PDF) op 15 Augustus 2009. Besoek op 19 November 2009.
  45. ↑ Reëls op Singapoer se Wapen en Vlag en Nasionale Lied, r. 14(2). Die reël lui: “Enige persoon wat wetend—(a) enige optrede in verband met die Vlag in oortreding van die bepalinge van reël 5, 6, 7, 9(1), (2), (3) of (4) of 10(1) gebaan; of (b) reël 8 of 9(6) in verband met die Vlag oortree, sal skuldig wees aan ’n oortreding en sal ’n boete van nie meer nie as S$1 000 tydens vonnis moet betaal”. Disrespekvolle hantering van die vlag is ’n afsonderlike oortreding onder r. 14(4), wat lui: “Enige persoon wat reël 4 sonder redelike verskoning oortree … sal skuldig wees aan ’n oortreding en sal ’n boete van nie meer nie as S$1 000 tydens vonnis moet betaal.” ’n Gemagtigde offisier mag hierdie oortredings saamstel deur van die verdagte persoon ’n bedrag van nie meer nie as S$500 te verhaal op oortreding: Reëls op Singapoer se Wapen en Vlag en Nasionale Lied (Samestelling van Oortredings) 2007 (S 378/2007).
  46. ↑ Reëls op Singapoer se Wapen en Vlag en Nasionale Lied, r. 4(1).
  47. ↑ Reëls op Singapoer se Wapen en Vlag en Nasionale Lied, r. 4(2).
  48. ↑ Reëls op Singapoer se Wapen en Vlag en Nasionale Lied, r. 7(4).
  49. ↑ Reëls op Singapoer se Wapen en Vlag en Nasionale Lied, r. 7(8).
  50. ↑ Reëls op Singapoer se Wapen en Vlag en Nasionale Lied, r. 7(6).
  51. ↑ Reëls op Singapoer se Wapen en Vlag en Nasionale Lied, r. 7(1).
  52. ↑ Reëls op Singapoer se Wapen en Vlag en Nasionale Lied, r. 7(2) en r. 7(9)(a) (definisie van “ereposisie”).
  53. ↑ Reëls op Singapoer se Wapen en Vlag en Nasionale Lied, r. 7(3)(a) en r. 7(9)(b) (definisie van “ereposisie”).
  54. ↑ Reëls op Singapoer se Wapen en Vlag en Nasionale Lied, r. 7(3)(b).
  55. ↑ Reëls op Singapoer se Wapen en Vlag en Nasionale Lied, r. 7(5).
  56. ↑ Reëls op Singapoer se Wapen en Vlag en Nasionale Lied, r. 7(7).
  57. ↑ Reëls op Singapoer se Wapen en Vlag en Nasionale Lied, r. 5(1).
  58. ↑ Reëls op Singapoer se Wapen en Vlag en Nasionale Lied, r. 5(2).
  59. ↑ Reëls op Singapoer se Wapen en Vlag en Nasionale Lied, r. 6(1).
  60. ↑ Reëls op Singapoer se Wapen en Vlag en Nasionale Lied, r. 6(2).
  61. ↑ “Houer” sluit papier, plastiek en vullissakke in: r. 9(8).
  62. ↑ Reëls op Singapoer se Wapen en Vlag en Nasionale Lied, r. 9(1).
  63. ↑ Reëls op Singapoer se Wapen en Vlag en Nasionale Lied, r. 9(2).
  64. ↑ Reëls op Singapoer se Wapen en Vlag en Nasionale Lied, r. 9(6). Hierdie reëls geld nie vir die vervaardiging deur of namens, of die vertoon deur, enige regeringsdepartement van die vlag nie: r. 9(7).
  65. ↑ Reëls op Singapoer se Wapen en Vlag en Nasionale Lied, r. 9(4).
  66. ↑ Reëls op Singapoer se Wapen en Vlag en Nasionale Lied, r. 10.
  67. ↑ Reëls op Singapoer se Wapen en Vlag en Nasionale Lied, r. 9(3).
  68. ↑ (en) Our Army Customs and Traditions (PDF). Singapoer: Ministerie van Verdediging. 2006. p. 127. Geargiveer vanaf die oorspronklike (PDF) op 3 Oktober 2008.
  69. ↑ Reëls op Singapoer se Wapen en Vlag en Nasionale Lied, r. 8.

Verdere leeswerk

[wysig | wysig bron]
  • (en) Smith, Whitney (1966). A History of the Symbols of Singapore. pp. 60–67. ISSN 0015-3370. {{cite book}}: |journal= ignored (hulp)
  • (en) "No conflict, clear-cut symbol of unity". The Sunday Times. 9 Augustus 1981. p. 13.
  • (en) Aslaksen, Helmer (11 Maart 2007). "The mathematics and astronomy of the Singapore flag". Departement van Wiskunde, Nasionale Universiteit van Singapoer. Besoek op 3 November 2007.
  • (en) Wetgewende Vergadering van Singapoer (1959). State Arms and Flag and National Anthem of Singapore (Legislative Assembly (New Series) Misc. 2 of 1959). Singapoer: Gedruk by die Staatsdrukkery se Kantoor.
  • (en) State Arms & Flag of Singapore. Singapoer: Advertensiesafdeling, Ministerie van Kultuur. 1977.
  • (en) Crampton, William (1992). The World of Flags : A Pictorial History (Rev. uitg.). Londen: Studio Editions. p. 88.
  • (en) The National Symbols Kit. Singapoer: Voorberei deur Programmafdeling, Ministerie van Inligting en Kunste. 1999.
  • (en) Singapoer Uitsaaikorporasie (1988). Flag and Anthem, 3 Desember 1959 [videorecording]. Singapoer: Televisiekorporasie van Singapoer.

Eksterne skakels

[wysig | wysig bron]
Hierdie artikel is in sy geheel of gedeeltelik vanuit die Engelse Wikipedia vertaal.
Ontsluit van "https://af.wikipedia.org/w/index.php?title=Vlag_van_Singapoer&oldid=2709055"