Minister van Binnelandse Sake v Fourie-saak
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Die hofsaak Minister van Binnelandse Sake en 'n Ander v Fourie en 'n Ander; Lesbian and Gay Equality Project en Andere v Minister van Binnelandse Sake en andere, ([2005] ZACC 19),[1][2] was 'n waterskeiding-beslissing van die Konstitusionele Hof van Suid-Afrika waarin die hof beslis het dat paartjies van dieselfde geslag 'n grondwetlike reg besit om te trou. Die uitspraak, geskryf deur Regter Albie Sachs en gelewer op 1 Desember 2005, het die Parlement van Suid-Afrika 'n jaar tyd gegun om die nodige wetgewing in plek te stel. As gevolg hiervan het die Wet op Burgerlike Verbintenisse in werking getree op 30 November 2006, wat Suid-Afrika die vyfde land ter wêreld gemaak het om selfdegeslaghuwelike te erken.
Die saak is op 17 Mei 2005 aangehoor deur Langa ACJ, Madala J, Mokgoro J, Moseneke J, Ngcobo J, O'Regan J, Sachs J, Skweyiya J, Yacoob J en Van Der Westhuizen J. MTK Moerane SC (met S. Nthai) verskyn vir die aansoekers, P Oosthuizen (met T Kathri) vir die respondente, JJ Smyth QC vir die eerste en tweede amici curiae, GC Pretorius SC (met DM Achtzehn, PG Seleka en JR Bauer) vir die derde amicus curiae, DI Berger SC (met F Kathree) vir die aansoekers, en M Donen SC vir die respondente. In die Fourie-saak, is die aansoekers se raadgewers aangestel deur die Staatsprokureur, en die respondente s'n deur M. van den Berg. Die derde amicus curiae het opdrag van Motla Conradie ontvang. In die Lesbian en Gay Equality Project geval, is die aansoekers se advokate opdrag gegee deur Nicholls, Cambanis & Associates, en die respondente s'n deur die Staatsprokureur.
