Gore Vidal

Eugene Luther Gore Vidal [ˌɡɔr_vɨˈdɑːl] was 'n Amerikaanse skrywer wat met sy essays, romans, draaiboeke en Broadway-toneelstukke bekendheid verwerf het. Hy het daarnaas bekend gestaan vir sy patrisiese ingesteldheid, sy Transatlantiese aksent en sy geestige aforismes. Vidal is 'n gesin gebore wat uitstaande politici opgelewer het. Sy grootvader Thomas Gore het die amp van senator beklee, en hy het later deur huwelik aan Jacqueline Kennedy verwant geword.

Vidal het twee keer vir politieke ampte kandidaat gestaan en het as politieke kritikus oor 'n lang tydperk kommentaar op politieke gebeure gelewer. Hy het as aanhanger van die Demokratiese Party sy lewe lank 'n isolasionistiese houding ingeneem. Vidal, wat sowel met sy essays asook sy romans bekendheid verwerf het, het daarnaas ook bydraes vir The Nation, die New York Review of Books en Esquire gelewer. Met sy essays en media-optredes het Vidal oor 'n lang tydperk kritiese kommentaar op die Amerikaanse buitelandse beleid gelewer. Daarnaas het hy die Verenigde State sedert die 1980's as 'n vervallende ryk beskryf. Sy twiste met bekende persoonlikhede soos Norman Mailer, William F. Buckley, Jr. en Truman Capote het wye aandag in die media geniet.

Vidal se romans val in twee hoofkategorieë: maatskaplike en geskiedkundige tematiek. Sy bekendste roman met 'n maatskaplike fokus was Myra Breckinridge; sy bekendste historiese romans sluit Julian, Burr en Lincoln in. Sy derde roman, The City and the Pillar, het ná sy verskyning in 1948 behoudende kritici uitgedaag as die eerste beduidende werk in die Amerikaanse literatuur waarin homoseksualiteit onbeskaamd behandel is.

Vidal het die kategorisering van seksuele identiteite as "homoseksueel" en "heteroseksueel" steeds as inherent vals verwerp en daarna verwys dat die oorgrote meerderheid individue die potensiaal het om panseksueel te wees.

Toe Vidal in 2012 oorlede is, was hy die laaste van 'n generasie Amerikaanse skrywers wat gedurende die Tweede Wêreldoorlog as soldate gedien het, waaronder J. D. Salinger, Kurt Vonnegut, Norman Mailer en Joseph Heller. Hy word moontlik veral vir sy bytende opmerkings en sarkastiese humeur onthou. So het hy na homself as 'n gentleman bitch verwys en is as die 20ste eeu se antwoord op Oscar Wilde beskryf.^[1]

Wikimedia Commons bevat media in verband met Gore Vidal.

• Amptelike webtuiste van Gore Vidal