Edwy van Engeland

Edwy
Koning van Engeland
Huis	Wessex
Regeer	23 November 955 – 1 Oktober 959
Voorganger	Edred
Opvolger	Edgar die Vreedsame
Eggenote	Elfgifa (nietig verklaar)
Kinders
Gebore	941; Wessex
Oorlede	1 Oktober 959; Gloucester
Vader	Edmund I
Moeder	Elfgifa van Shaftesbury

Edwy (ook bekend as Edwig of Eadwig, met die bynaam "die Regverdige"; 941 – 1 Oktober 959) was van 955 tot met sy dood koning van Engeland. Hy was die oudste seun van Edmund 1 en sy vrou Elfgifa. Hy is deur die adel gekies om sy oom Edred op te volg. In 956 word hy op 13-jarige ouderdom gekroon.

Sy kort bewind is gekenmerk deur talle konflikte – met sy familie, die kerk, deur intriges aan die hof en deur opstande in Northumbrië en Mercië.

Volgens een legende het sy vete met die kerk onder leierskap van sint Dunstan en aartsbiskop Odo al op die dag van sy inwyding begin. Hy het nie opgedaag vir ’n byeenkoms van die adel nie. Dunstan het die jong koning aan die vry met ’n adellike meisie, ene Elfgifa, aangetref. Edwy het geweier om saam met Dunstan te gaan, maar dié het hom saamgesleep. Toe Dunstan besef hy het sy lewe in gevaar gestel, het hy na sy klooster gevlug. Edwy, onder aanmoediging van Elfgifa, het die klooster geplunder. Dunstan het ontsnap en eers ná die koning se dood na Engeland terugkeer.

In die Anglo-Saxon Chronicle word berig oor Edwy se opvolging en dat Duncan uit Engeland gevlug het, maar gee nie die rede nie. Die bostaande weergawe van die gebeure kan dus gebaseer wees op ’n ware politieke stryd tussen die jong koning en die kerkleiers, wat die storie later vertel het om hom te beswadder, of dit kan bloot ’n legende wees. In die Chronicle word ook vertel dat Odo die koning se latere huwelik met Elfgifa onwettig verklaar het omdat hulle "te naby familie" was.

Gesteun deur Odo het die inwoners van Mercië en Northumbrië hulle in 957 geskaar by Edwy se broer, Edgar die Vreedsame. Edwy is by die Slag van Gloucester verslaan, maar om ’n burgeroorlog te voorkom, is die ryk in twee verdeel al met die Teemsrivier langs. Edwy het oor die suidelike deel (Wessex en Kent) regeer en Edgar oor die noordelike deel.

Daarna het Edwy wyser opgetree en die kerk begunstig. Hy is egter kort daarna dood en is opgevolg deur Edgar, wat die ryk weer verenig het.

Hierdie artikel is merendeels vertaal vanaf die Nederlandse Wikipedia-artikel nl:Edwy