Verhojansk

Eländpunktan aluz om pandud vl 1638 Posnik Ivanoval kuti kozakoiden tal'veline eländsija. Se sai lidnan statusad vl 1817. Šingotihe kükstud mehiden eländsijaks.

Nügüd'aigan mecpunktan ižanduzkeskuz, jogivaldmad da lendimport sijadasoiš lidnas, se šingotase karvpramozlal i maižandusel.

Lidn sijadase Jan-jogen oiktal randal (Jävaldmeren bassein), 127 m ü.m.t. keskmäižel korktusel. Matkad Batagai-rajonkeskushesai om 92 km pohjoižpäivnouzmha avtotedme, Jakutskhasai om 650 km suvhe orhal. Toine lähembaine lidn om Vilüisk 700 km suvipäivlaskmha.

Klimat om terav kontinentaline arktine, tal'v om kuiv i vilu lujas. Voden keskmäine lämuz om −14,5 C°, kezakun-elokun +12..+16 C°, tal'vkun-uhokun −42..−45 C°. Ekstremumad oma −67,8 C° i +38 C°. Paneb sadegid 178 mm vodes, enamba kezakus-elokus (27..34 mm kus), vähemba tal'vkus-sulakus (5..8 mm kus).

Verhojansk om lidnankundan üks'jäižeks eländpunktaks.

Vn 2010 kaiken Venäman rahvahanlugemižen mödhe lidnan eläjiden lugu oli 1 311 ristitud, rajonan kümnendez. Kaik 1 131 eläjad oli lidnas vl 2017. Kaikiš suremb lidnan ristitišt oli kaks' tuhad eläjid vll 1998−2000.

Ortodoksižen hristanuskondan Pühän Jumalanmaman Blagoveššenjan puine päjumalanpert'^[1] oli vll 1823−1937, paloi lophu.

Professionaližen opendusen aluzkundad ratas Batagai-rajonkeskuses i lähembaižiš lidnoiš.

Lidnankundan pämez' om sen Administracijan pämez'. Edeline lidnan pämez' om Jevgenii Potapov (sügüz'ku 2015 — reduku 2020).

•  
  Jogen bassein Verhojanskanno
•  
  Lidnan klimat kuidme (vn 2005 diagramm)
•  
  Sauptud lendimportan sauvuz vl 2009

1. ↑ Verhojanskan pühäpertid sobory.ru-saital. (ven.)

• Lidnan tobmuden sait tazovaldkundan oficialižel portalal (verhoyansk.sakha.gov.ru) (ven.) (angl.) (jakut.) da sen vanh versii.