Boła specułativa

La boła specułativa o boła econòmega in economia ła ze na particułare faze de marcà caraterizada da un cresimento considerévołe e inzustifegà dei presii de uno o pì beni, che el ze dèbito a un cresimento de ła domanda repentina e limitada inte el tenpo: a ła faze de nasimento e de cresimento de ła boła ła sègue dopo de ła faze de s-ciopo che ła tende a repristinar i vałori orizenari del ben in cuestion.

Zeneralmente se parla de boła specułativa co referimento a marcai finansiari inte i cuałi łe gnen tratae asion, obligasion e tìtułi derivai, tutavia ła stòria de łe bołe specułative ła mostra cofà che i sìpia stai frecuenti i cazi de bołe rełasionae co beni materiałi, cofà i imòbiłi.

L'eceso de domanda che ła ghea spenzesto verso alto in poco tenpo el vałore de un ben, de un servìsio, de na inpreza o pì senplegamente de un tìtuło che el raprezenta un cualche derito su sti cuà, el se połe recondùzar a l'irasionałe (o rasionałe) euforia de sojeti econòmeghi convinsesti che na nova indùstria, un novo prodoto, na nova tecnołozia i podarà ofrir grandi guadagni e gaver un cresimento sensa precedenti.

Ła scatarà, par tanto, ła corsa a l'acuisto del derito, inte ła speransa de ri-véndar l'isteso derito a un preso superiore. La corsa a l'acuisto ła pròvoca un cresimento del preso che el conferma, ai oci de tanti, ła bontà de ła precedente previzion de un futuro cresimento del preso del derito. Sta cuà el stìmoła oncor-pì i acuisti e de consevensa el fa erlevar oncora na volta el preso. La profesia in altri tèrmani ła se autoreałiza, induzindo novi sojeti ecònomeghi a cronpar i medèzemi tìtułi. Intrà sti cuà, man man che i vałori i crese, i se unirà senpre pì sojeti de sòłito restii a cronpare strumenti finansiari che i ga ris-cio ełevà.

Co che el vałore dei tìtułi el va zó repentinamente e se vede un canbiamento radegałe de łe prospetive econòmeghe retrostanti, se parla de s-ciopo de ła boła specułativa.

L'eceso de acuisto de un derito, de fato, a un serto ponto el se aresta. Le càuze łe połe èsar inmanco trè:

• el ze difisiłe catare novi investitori disponesti a cronpar pòsteri deriti a un preso che inte el contenpo el ze divegnesto alto;
• chi che el ga conparà deriti prima de l'inalsamento, el ze spinzesto a véndar i tìtułi par monetizar el guadagno;
• łe otimìsteghe prospetive de guadagno precedentemente formułae łe połe vegner revedeste e redimensionae.

A ła faze de cresimento dei vałori se ga par tanto na faze oponesta, inte el ndar de ła cuała se vedarà un cało considerévołe de łe cuotasion. A l'eceso de véndite łe contribuise ła consapevołesa che, davanti a prospetive econòmeghe manco otimìsteghe, i vałori dei tìtułi tratai i ze destinai a całar, e ła vołontà de tanti operatori che i detien sti tìtułi i łi vołe céderli prima che łe se verìfeghee pòstere redusion del vałore.

• Boła dei tołipani
• Boła de łe dot-com
• Boła de ła South Sea Company
• Boła imobiłiare
• Pànego del 1792
• Pànego del 1825
• Boła specułativa japoneze
• Union Générale
• Crize econòmega del 2008
• Boła imobiłiare irlandeze

• (EN) bubbleEnçiclopedia Britannica, Encyclopædia Britannica, Inc.