بھگت سنگھ
(1907ء تا 23 مارچ، 1931ء) برصغیر کی جدوجہد آزادی کا ہیرو۔ شہید اعظم بھگت سنگھ سوشلسٹ انقلاب کا حامی تھا۔ طبقات سے پاک برابری کی سطح پر قائم ہندوستانی معاشرہ چاہتا تھا۔ ضلع لائل پور کے موضع بنگہ میں پیدا ہوئے۔ ان کا تعلق جٹ خاندان سے تھا۔کاما گاٹا جہاز والے اجیت سنگھ ان کے چچا تھے۔ جلیانوالہ باغ قتل عام اور عدم تعاون کی تحریک کے خونیں واقعات سے اثر قبول کیا۔ 1921ء میں اسکول چھوڑ دی اور نیشنل کالج میں تعلیم شروع کی۔ 1927ء میں لاہور میں دسہرہ بم کیس کے سلسلے میں گرفتار ہوئے اور شاہی قلعہ لاہور میں رکھے گئے۔ ضمانت پر رہائی کے بعد نوجوان بھارت سبھا بنائی اور پھر انقلاب پسندوں میں شامل ہو گئے۔ دہلی میں عین اس وقت، جب مرکزی اسمبلی کا اجلاس ہو رہا تھا انھوں نے اور بٹوکیشور دت (بی کے دت) نے اسمبلی ہال میں دھماکا پیدا کرنے والا بم پھینکا۔ دونوں گرفتار کرلیے گئے۔ عدالت نے عمر قید کی سزا دی۔
| بھگت سنگھ Bhagat Singh | |
|---|---|
| (پنجابی میں: ਭਗਤ ਸਿੰਘ) | |
 | |
| معلومات شخصیت | |
| پیدائش | 28 ستمبر 1907ء جڑانوالہ تحصیل, پنجاب, برطانوی ہند |
| وفات | 23 مارچ 1931 (عمر 23 سال) لاہور, پنجاب, برطانوی ہند |
| وجہ وفات | پھانسی |
| طرز وفات | سزائے موت |
| شہریت |  برطانوی ہند |
| مذہب | دہریت |
| رکن | ہندوستان سوشلسٹ ریپبلکن ایسوسی ایشن [1]، نوجوان بھارت سبھا [2] |
| عملی زندگی | |
| پیشہ | مصنف ، حریت پسند |
| مادری زبان | پنجابی |
| پیشہ ورانہ زبان | پیجابی |
| تنظیم | نوجوان بھارت سبھا, کیرتی کسان پارٹی, ہندوستان سوشلسٹ ریپبلکن ایسوسی ایشن |
| تحریک | تحریک آزادی ہند |
| الزام و سزا | |
| جرم | قتل |
| ویب سائٹ | |
| ویب سائٹ | باضابطہ ویب سائٹ |
درستی - ترمیم  | |
1928ء میں سائمن کمیشن کی آمد پر لاہور ریلوے اسٹیشن پر زبردست احتجاجی مظاہرہ ہوا۔ پولیس نے لاٹھی چارج کیا جس میں لالہ لاجپت رائے زخمی ہو گئے۔ اس وقت لاہور کے سینئر سپرٹینڈنٹ پولیس جیمز سکاٹ تھے۔ انقلاب پسندوں نے ان کو ہلاک کرنے کا منصوبہ بنایا۔ لیکن ایک دن پچھلے پہر جب مسٹر سانڈرس اسسٹنٹ سپرٹینڈنٹ پولیس لاہور اپنے دفتر سے موٹر سائیکل پر دفتر سے نکلے تو شیو رام راج گرو اور بھگت سنگھ وغیرہ نے ان کو گولی مارکر ہلاک کر دیا۔ حوالدار جین نے سنگھ کا تعاقب کیا۔ انھوں نے اس کو بھی گولی مار دی اور ڈی اے وی کالج ہاسٹل میں کپڑے بدل کر منتشر ہو گئے۔ آخر خان بہادر شیخ عبد العزیز نے کشمیر بلڈنگ لاہور سے ایک رات تمام انقلاب پسندوں کو گرفتار کر لیا۔ لاہور کے سینٹرل جیل کے کمرۂ عدالت میں ان پر مقدمہ چلایا گیا۔ بھگت سنگھ اور دت اس سے قبل اسمبلی بم کیس میں سزا پا چکے تھے۔ مقدمہ تین سال تک چلتا رہا۔ حکومت کی طرف سے خان صاحب قلندر علی خان اور ملزمان کی طرف سے لالہ امرد اس سینئر وکیل تھے۔ بھگت سنگھ اور سکھ دیو کو سزائے موت کا حکم دیا گیا اور 23 مارچ، 1931ء کو ان کو پھانسی دے دی گئی۔ فیروز پور کے قریب دریائے ستلج کے کنارے، ان کی لاشوں کو جلا دیا گیا۔ بعد میں یہاں ان کی یادگار قائم کی گئی۔
بھگت سنگھ اور قائد اعظم
ترمیمقائد اعظم محمد علی جناح نے بھگت سنگھ کے لیے بھرپور آواز اٹھائی تھی۔متحدہ ہندوستان کی مرکزی اسمبلی کے اجلاس منعقدہ شملہ (ہماچل پردیش)میں 12 ستمبر 1929 کو قائد اعظم نے حکومت برطانیہ کو آڑے ہاتھوں لیا جبکہ گاندھی اور اُن کے چاہنے والے خاموش بیٹھے ہوئے تھے۔ بھگت سنگھ اور اس کے ساتھیوں نے مقدمے میں فئیر ٹرائل کا حق نہ ملنے پر بھوک ہڑتال کر رکھی تھی اور ہوم منسٹر (وزیر داخلہ) نے اسمبلی میں مسودہ قانون پیش کیا کہ ملزم کی غیر حاضری میں ہی مقدمہ چلا کر سزا دی جائے۔ اس پر محمد علی جناح نے جو بمبئی سے رکن اسمبلی منتخب ہوئے تھے، ہوم منسٹر کی اس تجویز کا سختی کے ساتھ رد کرتے ہوئے کہا: " کیا آپ بھوک ہڑتال سے بدتر تشدد کسی بھی چیز کو سمجھتے ہیں؟ ان (ملزمان) کا یہ فعل درست ہے یا غلط ؟ لیکن آپ پر اس کا رتی بھر اثر نہیں ہو رہا۔ میں پوچھنا چاہتا ہوں کہ آپ کسی بھی ملزم کے بنیادی قانونی حقوق کس طرح چھین سکتے ہیں؟ آپ کو یہ اختیار کس نے دیا ہے کہ آپ کریمنل جیورس پروڈنس کا اہم ترین اصول اپنے مفاد کے لیے تبدیل کر سکیں؟ ہر شخص بھوک ہڑتال کی اذیت برداشت نہیں کر سکتا ۔۔۔۔ اگر یہ اس قدر آسان ہے تو ہوم منسٹر خود بھوک ہڑتال کر کے دیکھ لیں ۔۔۔ چاہے مختصر وقت کے لیے ہی سہی ۔۔۔۔ لیکن آپ ایسا نہیں کر سکیں گے کیونکہ آپ کے اندر ارادے کی وہ مضبوطی اور عزم نہیں جو بھگت سنگھ اور اس کے ساتھیوں میں ہے۔ آج ہندوستان اٹھ کھڑا ہوا ہے، تیس کروڑ لوگ اپنے حقوق کی لڑائی کے لیے اٹھ کھڑے ہیں لیکن آپ یہ نہیں دیکھ رہے کیونکہ آپ دیکھنا نہیں چاہتے۔ آپ کے پاس صرف آپ ہی کی اپنی منطق ہے ۔۔۔۔ سفاک منطق! آج اگر ہندوستانی حقوق چاہتے ہیں تو یہ کوئی ان ہونی یا انوکھی بات نہیں۔ بلکہ دنیا کے متعدد ممالک میں ایسی تحریکیں خوب چل رہی ہیں۔ صرف نوجوان ہی نہیں، سفید بالوں اور داڑھیوں والے بزرگ بھی ایسے افعال کرنے پر مجبور ہیں جنہیں آپ اپنی منطق کے مطابق جرم کہتے ہیں۔"[3]
مزید دیکھیے
ترمیمحوالہ جات
ترمیم- ↑ http://www.towardsfreedom.in/site/HRA_and_HSRA
- ↑ http://naubhas.in/archives/531
- ↑ بحوالہ : Bhagat Singh .... The Eternal Rebel باب: گرفتاری اور بھوک ہڑتال مصنف: مل وندر جیت سنگھ وڑائچ سن اشاعت: 2007 ۔۔۔۔ دہلی
بیرونی روابط
ترمیم| ویکی ذخائر پر بھگت سنگھ سے متعلق سمعی و بصری مواد ملاحظہ کریں۔ |