Batalha de Caporetto

La batalha de Caporetto es una batalha de la Premiera Guèrra Mondiala que se debanèt dau 24 d'octòbre au 9 de novembre de 1917 sus lo frònt italian. Opausèt una armada germanoaustriana comandada per lo generau Otto von Below ai defensors italians dau sector de Caporetto. L'objectiu dei poissanças centralas èra d'alunchar la linha de frònt dau pòrt de Trieste. Pasmens, leis Italians foguèron susprés per l'ataca que rompèt un ponch feble de sei defensas. L'esplecha de lor succès per lei Germanoaustrians entraïnèt l'afondrament d'una partida de l'armada italiana que perdiguèt 40 000 tuats e bleçats, 290 000 presoniers, 4 800 pèças d'artilhariá e de quantitats importants de municions e de viures. Lo mandadís d'un còrs expedicionari francobritanic foguèt tanben necessari per facilitar l'estabilizacion d'un frònt novèu lòng dau fluvi Piave. Lei Germanoaustrians perdiguèron solament 20 000 tuats e bleçats mai de rivalitats minèron la collaboracion entre Austrians e Alemands en causa de dificultats per partejar lo butin capturat. D'un biais paradoxau, la batalha de Caporetto accelerèt donc lo declin de l'armada austriana.

• Premiera Guèrra Mondiala.

• (fr) Jean-Paul Bled, L'agonie d'une monarchie : Autriche-Hongrie 1914-1920, Tallandier, 2014.