Europese Economische Gemeinsjap

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Europese Economische Gemeinsjap (EEG) (Frans: Communauté économique européenne, Duuts: Europäische Wirtschaftsgemeinschaft, Italiaans: Comunità europea, Neerlands: Europese Economische Gemeenschap, Ingels: European Economic Community) waor de gemeinsjap die aon de basis vaan de allewijl Europese Unie stoont en woort opgeriech op 1 jannewarie 1958, wie 't Verdraag vaan Roeme vaan krach góng. Dit verdraag waor op 25 miert 1957 geteikend door 6 len: Belsj, Duutsland (Wes-Duutsland), Fraankriek, Italië, Luxembörg en Nederland en woort groetdeils meugelek gemaak door 't diplomatieke wèrk vaan versjèllende kopstökker achter 't Europees integratieperses, wie Jean Monnet en Robert Schuman.

Binne de EEG woort 'ne gemeinsjappeleke merret gevörmp. 't EEG-verdraag bevatde bepaolinge euver landbouw, transportmiddele en economische verhajdinge mèt neet-leie. Later zouwe ouch kappitaol en arbeidskrachte deil oetmake vaan de gemeinsjappeleke merret. Bij 't Verdraag vaan Roeme woort ouch de Europese Gemeinsjap veur Atoomenergie (ouch wel bekènd es Euratom) opgeriech. In 1951 waor al de Europese Gemeinsjap veur Kole en Staol (EGKS) opgeriech. De drei organisaties kraoge in 1967 same ein kommissie, eine raod en ei budget. Ze wèrkde wijer oonder de verzamelnaom Europees Gemeinsjappe (EG), mer de drei verdraagsorganisaties bleve wel los vaanein bestoon. In 1993, bij de inwèrkingstrejjing vaan 't Verdraag vaan Mestreech woort de naom vaan de gemeinsjap gewijzeg in Europese Gemeinsjap umtot de verdraagsbepaolinge ziech vaanaof dat momint väöl wijer oetstrekde es allein op 't economisch gebeed.

• Op 1 jannewarie 1973 kraog de EEG drei nui len debij, boedoor häör aontal op nege stoont. Dit waore 't Vereineg Keuninkriek, Ierland en Denemarke
• Op 1 jannewarie 1981 voogde Griekeland ziech bij de EEG. Häör aontal stoont op tien.
• Op 1 jannewarie 1986 kaome de lèste twie len bij de EEG, boedoor zie op 12 len stoont. Dit waore de Iberische len Spanje en Portugal

Zuuch ouch: Historie vaan de Europese Unie