Manuel Martínez-Risco

Manuel Martínez-Risco

Nome orixinal	(es) Manuel Martínez Risco y Macías
Biografía
Nacemento	1 de decembro de 1888 Ourense, España
Morte	3 de maio de 1954 (65 anos) París, Francia
Lugar de sepultura	Cemiterio de San Francisco de Ourense
Deputado nas Cortes republicanas
2 de abril de 1936 – 2 de febreiro de 1939 Lexislatura: III lexislatura da Segunda República Española Circunscrición electoral: Ourense
Deputado nas Cortes republicanas
13 de xullo de 1931 – 9 de outubro de 1933 Lexislatura: I lexislatura da Segunda República Española Circunscrición electoral: Ourense
Actividade
Lugar de traballo	Madrid
Ocupación	político, físico
Partido político	Acción Republicana
Membro de	Real Academia de Ciencias Exactas, Físicas, Químicas y Naturales de Zaragoza (en)
Familia
Cónxuxe	Fernanda Pérez Colemán
Irmáns	Sebastián Martínez-Risco

Manuel Martínez-Risco Macías, nado en Ourense o 1 de decembro de 1888^[1] e finado en París o 3 de maio de 1954,^[2] foi un científico e político galego.

Era sobriño de Marcelo Macías, curmán de Vicente Risco e irmán de Sebastián Martínez-Risco. Logo de facer o bacharelato no Instituto de Ourense foi a estudar Ciencias Físicas á Universidade Central de Madrid. Con 21 anos desprazouse ao Natuurkundig Laboratorium da Universidade de Ámsterdam, cabo de Pieter Zeeman e nesta institución permaneceu case dous anos estudando Óptica-física. De volta incorporouse á rede primaria de formación da JAE e foi profesor auxiliar na Facultade de Ciencias de Madrid. En 1911 presentou a súa tese de doutoramento e en 1914 sacou a cátedra de Acústica e Óptica da Universidade de Zaragoza, á que se incorporou ao ano seguinte. En 1918 retornou á Facultade de Ciencias de Madrid, por traslado. Estivo tamén agregado un tempo no Observatorio Astronómico

Finalizando a ditadura de Primo de Rivera asinou manifestos contra o réxime, en compañía doutros docentes galegos en Madrid como Nóvoa Santos e Varela Radío. Nas eleccións a Cortes Constituíntes de 1931 foi elixido deputado por Ourense por Acción Republicana, actuando como un gran defensor da autonomía de Galicia nas Cortes. Nas eleccións xerais de 1936 volveu ser elixido por Ourense por Izquierda Republicana (foi proclamado pola Cámara xa que non fora proclamado pola Xunta de escrutinio). Durante a Guerra civil dirixiu a fábrica de instrumentos ópticos creada polo Goberno republicano. Ao rematar a contenda exiliouse en Francia, onde exerceu como Maître de Recherches do CNRS, continuando as súas investigacións sobre as ondas luminosas.

Estivo casado con Fernanda Pérez Colemán, finada en 1951^[3], e irmá de Jaime Pérez Colemán.

• La asimetría de los triples de Zeeman, Madrid, 1912 e 1914.
• Estudios Generales sobre aberración esférica de orden superior, Madrid, 1927.

• "Manuel Martínez-Risco". Álbum da Ciencia do Consello da Cultura Galega. 
• Gurriarán, Ricardo. "Manuel Martínez-Risco". Álbum da JAE do Consello da Cultura Galega. 
• Ficha no Congreso dos DeputadosArquivado 12 de setembro de 2019 en Wayback Machine.