Fernando V. Arias
 | Este artigo contén varias ligazóns externas e/ou bibliografía ao fin da páxina, mais poucas ou ningunha referencia no corpo do texto. Por favor, mellora o artigo introducindo notas ao pé, citando as fontes. Podes ver exemplos de como se fai nestes artigos. |
  | |
| Biografía | |
|---|---|
| Nacemento | 12 de outubro de 1957 (67 anos) Melide, España |
| Actividade | |
| Ocupación | músico, director de orquestra, pianista, compositor |
| Instrumento | Piano e trompeta |
 | |
Fernando Vázquez Arias, nado en Melide o 12 de outubro de 1957, é un compositor e director de orquestra galego. Actualmente é profesor no Conservatorio Profesional de Música da Coruña e director da Orquestra Sinfónica de Melide.
Traxectoria
[editar | editar a fonte]Fernando Arias estudou no Conservatorio de Música da Coruña as carreiras de piano, trompeta e composición, gañando o premio de honor fin de carreira.
Entre 1986 e 1991 foi bolseiro pola Xunta de Galicia para estudar no Real Conservatorio de Música de Madrid, onde obtivo o Título Superior de Dirección de Orquestra e Coros co mestre F. García Nieto. Dende 1982 desenvolve unha intensa actividade como director e compositor.
Realizou varias producións operísticas á fronte da Coral Polifónica El Eco. Entre 1987 e 1993 dirixiu o Conservatorio de Lalín, onde creou a orquestra do mesmo e potenciou o coro e a banda municipais.
Creou o Conservatorio da súa localidade natal do cal actualmente é o seu director. En 1993 presentou a Orquestra de Cámara Melidá e en 1998 realizou unha xira á fronte da Orquestra de Cámara Melidá polos distintos auditorios de Galiza, dando pé a intervir como solistas convidados a novos músicos galegos.
Como compositor ten estreadas diversas obras para coro e orquestra sinfónica, piano só, voz e piano, e música de cámara. Destacan entre elas a Cantata do Deza, a Cantata Melidá, e unha adaptación sinfónica de dez temas populares galegos preparada por encargo da Consellería de Relacións Institucionais da Xunta de Galicia.
Foi convidado a dirixir, entre outras, a Orquestra Filharmónica Nacional de Moldova, os Virtuosos de Moscova, a Camerata do Porto, a Orquestra de Cámara de Kishinev (Moldova), a Orquesta de Radio Televisión Española, Orquestra de Cámara da Coruña, Orquestra de Cámara de Pontevedra, Orquestra do Norte Portugal, Xove Orquestra Sinfónica de Lalín, Filharmonie Bohuslava Martinú (República Checa), e a Orquestra do Conservatorio Superior da Coruña.
Algúns dos seus concertos foron gravados por Televisión Española, Antena 3, Telecinco, Televisión de Galicia e diversas emisoras de radio como Radio Clásica (RNE). Ten editados varios CDs: Luminaria, O Son do Futuro, Cantata do Deza, Luna de Otoño, No bico un cantar, Antoloxía da Zarzuela, e a propia Cantata Melidá.
Cómpre salientar tamén as súas producións realizadas nos últimos anos (2000-07) á fronte da Orquestra Sinfónica de Melide, tales como A Música do Cine (2001), Catro Décadas para un Musical (2002), 1º Festival de Música no Camiño de Santiago, Antoloxía da Copla, Duos e Arias de Zarzuela, Gala Lírica (2004), Concerto de Fragmentos de Ópera (2006), Concerto Vienés (2007), Gallaecia (2008), ou o último gran proxecto ata a data, a Gala Americana (2011).
En 1997 foi nomeado director da Escola de Práctica Orquestral do IGAEM e director titular da Xove Orquestra de Galicia (XOGA), así como profesor de Composición e Instrumentación do Conservatorio Superior de Música da Coruña, ademais de asumir a dirección da orquestra deste último.
Véxase tamén
[editar | editar a fonte]Bibliografía
[editar | editar a fonte]- "Vázquez Arias, Fernando". Gran Enciclopedia Galega Silverio Cañada (DVD). El Progreso. 2005. ISBN 84-87804-88-8.
- Barrera, F., ed. (2002). Gallegos. Quién es quien en la Galicia del siglo XXI (en castelán). El Correo Gallego. p. 579. ISBN 84-8064-113-4.
Ligazóns externas
[editar | editar a fonte]- Sitio web da Orquestra Sinfónica de Melide Arquivado 06 de febreiro de 2012 en Wayback Machine. (en castelán)
