Eva Wilma

Eva Wilma

Biografía
Nacemento	14 de decembro de 1933 São Paulo, Brasil
Morte	15 de maio de 2021 (87 anos) São Paulo, Brasil
Causa da morte	cancro de ovario
Residencia	São Paulo
Actividade
Ocupación	actriz, actriz de televisión
Período de actividade	1952 - 2019
Familia
Cónxuxe	Carlos Zara (1979–2002), morte do cónxuxe John Herbert (1955–1976), divorcio
Premios
(2018)  Orde do Mérito Cultural

Eva Wilma Riefle Buckup Zarattini, nada en São Paulo o 14 de decembro de 1933 e finada o 15 de maio de 2021 foi unha actriz e bailarina brasileira. Traballou en teatro, cine e televisión. Entre os seus papeis destacados, protagonizou a serie de televisión brasileira dos anos 50 Alô, Doçura!.^[1] Eva Wilma opúxose á ditadura militar brasileira e manifestouse contra a censura e a represión do réxime após o asasinato dun estudante, protagonizando unha emblemática fotografía de artistas contra a ditadura.^[2]

O seu pai, Otto Riefle Jr, era un metalúrxico da rexión da Selva Negra de Pforzheim, preto de Stuttgart, no sur de Alemaña. Marchou a Brasil, máis precisamente á cidade de Río de Xaneiro en 1929, con 19 anos, para traballar nunha empresa metalúrxica. A nai de Eva Wilma, Luísa Carp, naceu en Bos Aires, era filla de xudeus rusos e ucraínos que emigraran a Arxentina.^[3] Os pais de Eva coñecéronse na cidade de São Paulo cando o pai de Eva foi trasladado á cidade, e a súa nai, despois de vivir en Bos Aires, trasladouse a Brasil.^[4]

Comezou a súa carreira como bailarina clásica aos catorce anos. Tomou clases de patinaxe sobre xeo e foi contratada para participar en Holliday On Ice, un dos maiores festivais de patinaxe sobre xeo do mundo, pero os seus pais prohibíronllo. Pronto pasou a formar parte do São Paulo Ballet, de Maria Oleneva e logo comezou a carreira como actriz de teatro. Traballou no Teatro de Arena, actuando en obras como Judas o sábado de Aleluia, Uma Mulher e Três Palhaços e Boeing-Boeing. No cine, participou en filmes como Uma Pulga na Balança, O Homem dos Papagaios, Chico Viola Não Morreu e São Paulo S/A. Na televisión, debutou en 1953 na serie Namorados de São Paulo e posteriormente protagonizou Alô, Doçura xunto a John Herbert, serie que entrou no Libro Guinness como a máis longa do país. A parella, televisiva e na vida real, tamén protagonizou telenovelas brasileiras como Comédia Carioca e Prisoneiro de um Sonho. Eva Wilma e John Herbert foron unha das parellas máis queridas da televisión brasileira nos anos 50 e 60.

Durante a ditadura militar participou na folga dos teatros, opúxose ao réxime e manifestouse contra a represión e a censura.^[2] Nos inicios da ditadura (1965) actuou en São Paulo, Sociedade Anônima, escollido como o candidato do Brasil para o Oscar ao mellor filme en lingua non inglesa na 38ª edición dos premios, mais finalmente non foi nomeado.^[5] Eva Wilma foi galardoada con numerosos premios na súa carreira, como o Prêmio Saci e o Molière á mellor actriz entre outros.

Estivo casada durante 23 anos co actor John Herbert,^[1] co que tivo dous fillos, Vivian e John Jr., e deles cinco netos. Máis tarde casou co actor Carlos Zara, con quen non tivo fillos.

Eva Wilma faleceu aos 87 anos en São Paulo, o 15 de maio de 2021, no Hospital Albert Einstein, de cancro de ovario.^[6]

A Galipedia ten un portal sobre: Cine

Wikimedia Commons ten máis contidos multimedia na categoría:  Eva Wilma

• Eva Wilma na IMDb (en inglés).
• Eva Wilma, sitio oficial