Portal:Ferrol

Ferrol é unha cidade e concello da provincia da Coruña, cabeza da comarca de Ferrol, terceira concentración urbana de Galicia, da cal é capital. Segundo o INE en 2014 tiña 70.389 habitantes, sendo a sétima cidade máis habitada de Galicia e a terceira da provincia. A cidade ocupa un emprazamento peninsular dentro da ría que leva o seu nome, a Ría de Ferrol.

Constitúe unha das cidades galegas máis importantes no eido industrial, cunha especial influencia do sector naval. Tamén conta cunha importante actividade das Forzas Armadas, principalmente da Armada Española, que ten dende o século XVIII unha das súas principais bases navais e un destacado Arsenal Militar.

A cidade aséntase de cara á ría de Ferrol, aínda que tamén conta cunha destacada fachada litoral cara ó Océano Atlántico na zona rural. Esa fachada acolle algunhas das máis afamadas praias, como as asentadas nas parroquias de Doniños, San Xurxo ou Covas.

Ademais da cidade, o termo municipal comprende once parroquias rurais e a vila da Graña, considerada como zona urbana a efectos legais aínda que se atope no arrabalde. O concello ten unha densidade de poboación de 852,17 hab./km² e unha superficie de 82,6 km².

Entre o patrimonio da cidade destacan o castelo de San Filipe ou Concatedral de San Xiao. Por outra banda, a Semana Santa de Ferrol, un dos acontecementos máis sinalados do ano, xunta unha gran cantidade de turistas e é declarada de interese internacional.

ler máis...

Amosar máis contido destacado

Artigo destacado

editar

O OAR Ferrol foi un club de baloncesto galego da cidade de Ferrol. Fundado en 1951, en 1982 foi un dos fundadores da Asociación de Clubs de Baloncesto (ACB). O equipo desapareceu en 1996 por motivos económicos.

Na tempada 1979-80 foi campión da Segunda División, conseguindo deste xeito o ascenso á máxima categoría, na que permaneceu sete tempadas. Logo dun ano na segunda categoría (denominada daquela Primeira División B) conseguiu de novo o ascenso á Liga ACB, na que permaneceu ata o seu descenso en 1994.

Foi durante a presidencia de Juan Fernández García cando o club obtén os seus maiores éxitos deportivos, marcados por sucesivos ascensos de categoría que levan ao club a militar durante trece anos na máxima categoría do baloncesto español. Nestes trece anos logra clasificarse en tres ocasións para xogar competición europea, concretamente a Copa Korać.

Nos 45 anos de historia do equipo pasaron xogadores como Fernando Romay, Bob McCann, Otis Howard, Anicet Lavodrama ou Miguel Ángel Loureiro.

...Arquivo

Ler máis...

Lugar de interese

editar

O Museo Naval de Ferrol está situado dentro da base Naval de Ferrol, no antigo Cuartel de Presidiarios coñecido como San Campio, foi proxectado en 1765, lugar onde se aloxaban os presidiarios mentres duraban os traballos de construción, reparación e limpeza dos buques.

A partir de 1970 comezaron a recompilarse e catalogarse obxectos dispersos polas múltiples dependencias que, xunto cos da recuperación dos restos do pecio da fragata Magdalena, afundida na ría de Viveiro no ano 1810, propiciaron a creación do Museo Naval, que foi inaugurado o 5 de marzo de 1986.

Este museo conta con magníficos modelos de barcos de grandes dimensións, cartografía, canons, armamento antisubmarinos, velas, instrumentos de navegación, traxes de mergullo, bandeiras, maquetas de barcos e outro tipo de aparellos relacionados co mar, como unha áncora medieval rescatada do fondo da dársena do porto da vila de Mugardos. Presenta tamén información de todos os navíos construídos en Ferrol de 1751 a 1984.

...Arquivo

Ler máis...

Imaxe destacada

editar

Casa do Concello na Praza de Armas.

Vexa o artigo Alcaldes de Ferrol.

Biografía destacada

editar

Carolina Casanova Rodríguez, máis coñecida como Carolina Casanova de Cepeda ou simplemente como «La Cepeda», nada o 10 de xaneiro de 1847 no ferrolán barrio de Esteiro e finada en Madrid o 8 de febreiro de 1910, foi unha soprano galega, considerada como unha das mellores sopranos da segunda metade do século XIX.

Ao longo da súa carreira Carolina Casanova actuou nalgúns dos teatros de ópera máis prestixiosos do mundo, como o Teatro alla Scala de Milán, o Teatro San Carlo de Nápoles, ou a Royal Opera House de Londres, tendo realizado estreas mundiais como a de Il mercadante di Venezia de Ciro Pinsuti. Logo de deixar a súa carreira concertística exerceu como profesora na Escola Nacional de Música e Declamación (actualmente denominado Real Conservatorio Superior de Música de Madrid), onde formaría a futuras personalidades importantes do mundo da ópera española.

...Arquivo

Ler máis...

Sabías que...?

editar

...a Semana Santa de Ferrol está declarada Festa de interese turístico internacional?
...o OAR Ferrol foi un dos equipos fundadores da Asociación de Clubs de Baloncesto (ACB)?
...as autoridades franquistas decretaron a denominación El Ferrol del Caudillo en 1938 e mantívose ata a década de 1980?