Ніна Богдан

Ніна Іванаўна Богдан (нар. 1949, Менск, цяпер Беларусь) — беларуская эканамістка.

Доктарка эканамічных навук (2003) і прафэсарка (2003). Аўтарка навуковых працаў пра рэгуляваньне інавацыйнага разьвіцьця^[2]. Выдатніца адукацыі Беларусі^[3]. Дэканка факультэту фінансаў і банкаўскай справы Беларускага дзяржаўнага эканамічнага ўнівэрсытэту (2004—2009).

У 1970 скончыла плянава-эканамічны факультэт Беларускага дзяржаўанаг інстытуту народнай гаспадаркі (БДІНГ) паводле спэцыяльнасьці «эканоміка працы»^[2] і ўладкавалася асыстэнткай на катэдру эканомікі працы. У 1974 годзе скончыла асьпірантуру на катэдры эканомікі працы БДІНГ. У 1975 годзе абараніла кандыдацкую дысэртацыю «Матэрыяльнае стымуляваньне асваеньня і ўкараненьня новай тэхнікі» пад навуковым кіраўніцтвам Антаніны Анапрыенкі. Пасьля гэтага працавала старэйшай выкладніцай на катэдры эканомікі прамысловасьці БДІНГ^[4].

У 1979 годзе перайшла на працу дацэнткай у Полацкі дзяржаўны ўнівэрсытэт (Наваполацак), дзе ў 1986 годзе стала загадніцай катэдры. У 1992—2003 гадох была дэканкай факультэту Полацкага ўнівэрсытэту^[2]. У 1994 годзе прайшла стажаваньне ў Парыжы (Францыя), а ў 1996 годзе — у Кракаве (Польшча). У 1997, 1998, 2000 і 2001 гадох стажавалася ў Манчэстэры (Ангельшчына), а ў 1998 годзе — у Мадрыдзе (Гішпанія). У 1999 і 2001 гадох прайшла стажаваньне ў Стакгольме (Швэцыя), а ў 2002 і 2003 гадох — у Барсэлёне (Гішпанія). У 2002 годзе абараніла доктарскую дысэртацыю «Мэтадалёгія ўтварэньня і мэханізм ажыцьцяўленьня рэгіянальнай інавацыйнай палітыкі» пад навуковым кіраўніцтвам Людмілы Нехарошавай^[4].

У 2003 годзе перайшла працаваць прафэсаркай катэдры рэгіянальнага кіраваньня ў Беларускі дзяржаўны эканамічны ўнівэрсытэт. У 2004—2009 гадох займала пасаду дэканкі факультэту фінансаў і банкаўскай справы БДЭУ^[2]. У 2009 годзе стала прафэсаркай катэдры нацыянальнай эканомікі і дзяржаўнага кіраваньня БДЭУ. У рамках Праграмы трансэўрапейскай рухомасьці для ўнівэрсытэцкіх дасьледаваньняў (ПТРУД) брала ўдзел у сумесных мерапрыемствах «Стварэньне сыстэмы кіраваньня праграмамі падрыхтоўкі магістраў» і «Распаўсюд, супраца і ўнівэрсытэцкая рэформа ў галіне выкладаньня эканомікі ў Беларусі». Удзельнічала ў распрацоўцы праграмы навучаньня магістраў «Рэструктурызацыя і мэнэджмэнт на прамысловых прадпрыемствах». У 2009—2010 гадох сумесна з Народным ўнівэрсытэтам Упсалы (Швэцыя) узяла ўдзел у міжнародным мерапрыемстве «Балтыйская сетка сыстэмаў кіраваньня якасьцю ў сыстэме дадатковай прафэсійнай адукацыі». Паводле дамовы Менскага гарвыканкаму са Швэдзкай службай занясьці ад 2010 году ўдзельнічала ў міжнародным мерапрыемстве «Ўкараненьне сучасных спосабаў і мадэляў у прафэсійную адукацыю ў Менску». У 2010 і 2011 гадох брала ўдзел у падрыхтоўкі Аглядаў інавацыйнага разьвіцьця Беларусі і Казахстану адпаведна сумесна з Эўрапейскай эканамічнай камісіяй ААН (Швайцарыя)^[4].

Гэта — накід артыкула пра асобу з Беларусі. Вы можаце дапамагчы Вікіпэдыі, пашырыўшы яго.