مدارس القاهره التاريخيه

مدارس القاهرة التاريخية - Historic Schools of Cairo - ، القاهرة القديمه مليانه مدارس تاريخيه. المدارس دي كان بيبنيها السلاطين و الامرا و أكابر مصر، و كانوا بيزودوها بالمدرسين و الفقها و العلما، و كانوا بيدوا مرتبات و كسوه شهريه للتلامذه زي المنح الدراسية النهارده فى الجامعات الأوروبيه. و كانوا المدرسين و التلامذه بيعيشوا فيها، و كان بيطلع منها ناس متعلمه عملت نهضه ثقافيه كبيره فى مصر وخلتها لؤلؤة بين الأمم متفوقه على كل اللى حواليها، فى العصر المملوكي بالذات. من اشهر المدارس دي :

مدرسة السلطان حسن : فى حى القلعه. بدا بناها فى عهد السلطان الملك الناصر حسن بن محمد بن قلاوون. بتعتبر من أعظم المدارس اللى اتبنت فى مصر و على مستوى العالم كله ، و بتجمع مبانيها بين قوة البنا و عظمته و دقة الزخارف البديعه.
المدرسة الناصريه : فى شارع النحاسين جنب المدرسه المنصورية. بدا بناها بيبرس الجاشنكير و كملها الناصر محمد بن قلاوون سنة 1298. معروفه دلوقتي بجامع الناصرية. تحفة تاريخيه فنيه ما تتعوضش من العصر المملوكي. بابها له قيمه تاريخيه كبيره لانه اتنقل من عكا لمصر بعد فتح عكا فى زمن السلطان الاشرف خليل.
المدرسه الطيبرسيه : جنب الجامع الازهر من الجهه البحريه. بناها الامير علاء الدين طيبرس الخازندارى نقيب الجيوش المصريه فى عهد السلطان الناصر محمد بن قلاوون سنة 1309.
مدرسة منازل العز : بنتها ام الخليفة العزيز بالله بن المعز على النيل. اتحولت لفندق اسمه فندق النخلة.
المدرسة المنصورية : فى شارع النحاسية قدام المدرسة الكاملية. بناها السلطان المنصور قلاوون الالفي . معروفه دلوقتي بجامع المارستان.
المدرسة الكاملية : فى منطقة بين القصرين على ناصية الشارع الجديد لبيت القاضي، جنب السبيل. بناها الملك الكامل سنة 1225. اتهدمت.
المدرسة المحمودية : فى قصبة رضوان اول شارع الخيمية بين عطف زقاق المسك و جامع إينال. بناها الامير جمال الدين محمود بن علي الاستادار سنة 1394. معروفة دلوقتي باسم جامع محمود الكردي.
المدرسة المهذبية : بناها مهذب الدين ابو سعيد و كان رئيس الاطباء و من اصل مسيحي. معروفة دلوقتي بتكية الخلوتيه جوه عطفة مراد بك فى اول شارع الحلميه قدام حمام قماري ( حمام ابراهيم بك ).
مدرسة ابن العوام: بناها الامير صلاح الدين خليل بن عرام نايب اسكندريه. المدرسة قال المقريزي انها كات موجوده جنب جامع الامير حسن بحكر جوهر النوبي. دلوقتي زالت لكن تربة صاحبها موجوده و معروف باسم شيخ الاربعين.
المدرسه الأقبغاويه: موجوده على شمال الداخل للجامع الازهر من بابه الكبير الغربى. فى الاصل مكان المدرسه كان موجود فيه بيت الامير الكبير عز الدين أيدمر الحلى نايب السلطنه فى عهد السلطان الظاهر بيبرس. بنا المدرسه الامير أقبغا عبد الواحد سنة 1339.
المدرسه الجوهريه مدرسه صغيره جنب الباب الصغير بتاع الجامع الازهر بناها جوهر القنقبائى سنة 1440.
مدرسة اسماعيل باشا الوزير : بناها اسماعيل باشا الوزير اللى اتولى حكم مصر سنة 1107. جنب ديوان قايتباي.
مدرسة الأشرف شعبان : جنب قلعة القاهره. بناها الملك الأشرف شعبان سنة 1368، و كانت حاجه روعه ضاهت مدرسة عمه السلطان حسن. هدها فرج بن برقوق و بنى مكانها الملك المؤيد شيخ بيمارستان.
المدرسة الأشرفيه : بناها السلطان الاشرف ��ليل. لسه موجوده و مستخدمه كجامع.
مدرسة السلطان برقوق : بناها السلطان برقوق. لسة موجوده و بتستخدم كجامع.
مدرسة الاشرف برسباي

المراجع

المقريزى : المواعظ و الاعتبار بذكر الخطط و الاثار, مطبعة الادب، القاهرة 1968.
حسن الرزاز، عواصم مصر ، دار الشعب، القاهرة 1995