John Truter

	John Truter
	;
	Adjunkadmiraalhof van die Kaapkolonie
	Ampstermyn; 1812 – onbekend
Voorafgegaan deur	Nuwe amp
Opgevolg deur	John Wylde
Persoonlike besonderhede
Gebore	11 Oktober 1763 ; Kaapstad, Nederlandse Kaapkolonie
Sterf	5 Junie 1845 (op 81); Rondebosch, Kaapstad, Kaapkolonie
Alma mater	Universiteit van Leiden

Sir Johannes Andries (John) Truter (Kaapstad, 11 Oktober 1763 – Rondebosch, Kaapstad, 5 Junie 1845) was 'n Suid-Afrikaanse regsgeleerde.

Sir John Truter het die hoeksteen van Wynberg se eerste NG kerk op 24 Maart 1831 gelê. Die vergrote kerkgebou is op 30 April 1843 in gebruik geneem, maar in 1897 gesloop om plek te maak vir die teenswoordige gebou. Ds. C.F.J. Muller het dit op 17 Maart 1899 ingewy.^[1]

Truter gaan studeer in die regte aan die Universiteit van Leiden en behaal die graad LL.D. in 1787. Hy keer na die Kaap terug en tree in diens van die H.O.I.K.. In 1803 stel goewerneur Janssens hom aan as sekretaris van die Raad van Justisie. Tydens die Bataafse bewind word hy Sekretaris van die Raad op Beleid. In 1806 begin hy privaat praktiseer aan die Kaap. In 1809 word hy aangestel as fiskaal en drie jaar later as eerste hoofregter van die Kaapkolonie. Hy beklee die pos tot en met sy aftrede in 1828 toe hy tot lid van die Raad van Advies benoem word. Hy sterf in 1845 op Rondebosch.

Hy word beskou as vader en stigter van die NG gemeente Wynberg, wat in 1829 gestig is as slegs die derde NG gemeente in die Kaapse Skiereiland. Dit was Truter wat toestemming by die kerkraad van die NG gemeente Kaapstad en die goewerneur gekry het om die nuwe gemeente op Wynberg te stig omdat lidmate nie gereeld die tog na die Groote Kerk kon aflê om dienste daar by te woon nie. Hy was destyds ook verteenwoordiger van die regering in die Kerk se Sinode.^[2] Die grond vir die kerkgebou is op 3 Maart 1831 toegestaan mits bouwerk binne nege maande begin en binne nog nege maande voltooi kon word. Truter lê die hoeksteen van die kerkgebou op 24 Maart 1831. Sir Lowry Cole, goewerneur, het die verrigtinge bygewoon, soos trouens ook die inwyding van die kerk op Sondag 20 September 1832.

Truter het ook in die eerste raad van direkteure van die Suid-Afrikaanse Kollege, wat later die Universiteit van Kaapstad en SACS sou word, gedien.^[3]

Verwysings

↑ 'n Webwerf oor die geskiedenis van Wynberg Geargiveer 31 Augustus 2011 op Wayback Machine.
↑ "'n Webwerf oor die geskiedenis van Wynberg". Geargiveer vanaf die oorspronklike op 31 Augustus 2011. Besoek op 23 Augustus 2011.
↑ "Universiteit van Kaapstad se webtuiste". Geargiveer vanaf die oorspronklike op 18 Oktober 2011. Besoek op 23 Augustus 2011.

Bronne

Albertyn, dr. C.F. (red.) 1962. Die Afrikaanse Kinderensiklopedie. Kaapstad, Bloemfontein, Johannesburg: Nasionale Boekhandel Bpk.
Olivier, ds. P.L. (samesteller). 1952. Ons gemeentelike feesalbum. Kaapstad en Pretoria: N.G. Kerk-uitgewers.
Rosenthal, Eric. 1978. Encyclopaedia of Southern Africa. Cape Town and Johannesburg: Juta and Company Limited.

[1] 'n Webwerf oor die geskiedenis van Wynberg Geargiveer 31 Augustus 2011 op Wayback Machine.

[2] "'n Webwerf oor die geskiedenis van Wynberg". Geargiveer vanaf die oorspronklike op 31 Augustus 2011. Besoek op 23 Augustus 2011.

[3] "Universiteit van Kaapstad se webtuiste". Geargiveer vanaf die oorspronklike op 18 Oktober 2011. Besoek op 23 Augustus 2011.

[1]