Golf van Meksiko

Golf van Meksiko
Nasa-Satellietbeeld van die Golf van Meksiko
Kaart van die Golf van Meksiko
Koördinate:	25°N 90°W / 25°N 90°W / 25; -90
Ligging:	Kuba, Meksiko, Verenigde State
Soort:	Golf van die Atlantiese Oseaan
Oppervlakte:	1 600 000 km² (615 000 myl²)
Breedte:	1 500 km (932,06 myl)
Invloei:	Brazosrivier, Coloradorivier, Mississippirivier, Rio Grande
Nedersettings:	Havana, Houston, Mobile, New Orleans, Tampa

Die Golf van Meksiko (ook Golf van Mexiko genoem, Engels: Gulf of Mexico, Spaans: Golfo de México) maak deel uit van die Atlantiese Oseaan en is die grootste golf in die wêreld. Die oppervlakte daarvan is ongeveer 1 600 000 km².

Die Golf grens in die noorde aan die Verenigde State van Amerika, in die weste en suide aan Meksiko en in die suidooste aan Kuba. Die belangrikste riviere is die Mississippi in die noorde en die Rio Grande in die weste, die grootste stede is New Orleans in die noorde en Havana in die suidooste. Die Golf word deur die Floridastraat tussen Florida en Kuba met die Atlantiese Oseaan en deur die Straat van Yucatan tussen Kuba en Yucatan met die Karibiese See verbind.

Die golf as 'n geheel staan bekend as die Golf van Meksiko. Hierdie naam word amptelik erken deur die Internationale Hidrografiese Organisasie wat poog om die name van internasionale maritieme kenmerke te standaardiseer en tel al drie lande aangrensend aan die golf as lidlande. Die naam is uiteindelik afgelei van Mexica, die Nahuatl-term vir die Asteke.

Vroeë 16de-eeuse kaarte deur Juan de la Cosa en Martin Waldseemüller het die golf uitgebeeld, maar dit ongemerk gelaat. 'n Kaart van 1584 deur Abraham Ortelius het dit as die "See van die Noorde" bestempel (Vlaams: Mare de Nort). Hernán Cortés het dit ook só genoem (Spaans: Mar del Norte), terwyl ander Spaanse ontdekkingsreisigers dit die "Golf van Florida" (Golfo de Florida) of "Golf van Cortés" (Golfo de Cortés) genoem het.

Ander vroeë Europese kaarte het dit die "Groot Antilliaanse Golf" (Latyn: Sinus Magnus Antillarum), "Cathayse See" (Mare Cathaynum) of "Golf van Nuwe Spanje" (Spaans: Golfo de Nueva España) genoem. Op 'n stadium was Nieu-Spanje rondom die golf, insluitend dele wat nou in die suidoostelike Verenigde State is.

Die naam "Golf van Meksiko" (Spaans: Golfo de México; Frans: Golphe du Mexique) het die eerste keer in 1550 op 'n wêreldkaart verskyn en is die algemeenste naam sedert die middel van die 17de eeu, toe die golf steeds as 'n Spaanse see beskou is. Franse Jesuïete het hierdie naam so vroeg as 1672 gebruik. In die 18de eeu het Spaanse admiraliteitskaarte die golf insgelyks as "Meksikaanse Inham" of "Mexican Sound" (Ensenada Mexicana of Seno Mexicano) bestempel. Totdat die Republiek van Texas in 1836 van Meksiko weggebreek het, het Meksiko se kusgrens ooswaarts langs die golf tot by die huidige Louisiana gestrek.

In die Verenigde State het die vermeende assosiasie met die naburige Meksiko gelei tot pogings om dit na die "Golf van Amerika" te herdoop. As voorsitter van die Verenigde State se Raad van Geografiese Name tussen 1999 en 2012 het John R. Hébert herhaalde voorstelle in hierdie verband van een individu ontvang. Hierdie naam is ook humoristies gebruik, onder meer deur die komediant Stephen Colbert in 2010 sowel as in 'n satiriese wetsontwerp van 2012 deur die Mississippi-wetgewer Steve Holland. Kort na sy tweede inhuldiging op 20 Januarie 2025 het die Amerikaanse president Donald Trump die uitvoerende bevel 14170 onderteken wat Amerikaanse federale agentskappe beveel het om 'n proses te begin om hierdie naam toe te pas op die gedeelte van die golf vanaf die Amerikaanse kus "wat strek tot by die seewaartse grens met Meksiko en Kuba", te midde van 'n reeks dreigemente wat hy teen Meksiko gemaak het.

• (en) Jennings, Ken (2011). Maphead: Charting the Wide, Weird World of Geography Wonks. New York City: Charles Scribner's Sons. bl. 72. ISBN 978-1-4391-6717-5 – via Internet Archive.
• (en) Amy, Jeff (10 Februarie 2012). "Lawmaker Says 'Gulf of America' Bill Was a Joke". Corpus Christi Caller-Times. Corpus Christi, TX. bl. 7. Besoek op 21 Januarie 2025 – via Newspapers.com.
• (en) Trump, Donald J. (20 Januarie 2025). "Restoring Names That Honor American Greatness". The White House. Washington, D.C. Besoek op 21 Januarie 2025.
• (en) "Trump to make good on Gulf of America promise with bonkers executive order". The Independent. 20 Januarie 2025. Besoek op 21 Januarie 2025.
• (en) Rogero, Tiago (20 Januarie 2025). "Can Trump really rename the Gulf of Mexico the Gulf of America?". The Guardian. Besoek op 21 Januarie 2025.
• (en) Frazin, Rachel (24 Januarie 2025). "Feds implement 'Gulf of America,' 'Mount McKinley' name changes". The Hill. Washington, D.C. Besoek op 24 Januarie 2025.

Wikimedia Commons bevat media in verband met Golf van Meksiko.

• (en) Toerisme-inligting oor Golf van Meksiko op Wikivoyage
• (en) "Gulf of Mexico". Encyclopædia Britannica. Besoek op 25 Januarie 2025.