龐統

龐統
蜀漢 官員、軍師
勢力	孫權→劉備
生	179年 荊州襄陽郡 （而家湖北襄陽）
死	214年 益州廣漢郡雒縣 （而家四川廣漢）
活躍時期	196年～214年
仔女	龐宏
遞啲名
字	士元
諡號	靖侯
其他名	鳳雛（號）
追賜爵位：關內侯

龐統（粵拼：pong4 tung2；179年—214年^{[註 1]}），字士元（si6 jyun4），號鳳雛（fung6 co4），東漢末年、三國時代嘅荊州襄陽人（而家湖北襄陽），原本係吳名將周瑜嘅南郡功曹，後尾變成咗劉備嘅謀士、重臣。後世人經常評龐統話佢嘅才能及得上同時間嘅諸葛孔明。

佢喺打劉璋時中箭而死。歷任耒陽令、治中從事，官至到軍師中郎將；死咗追賜關內侯。

龐統字士元，荊州南郡襄陽縣人（而家湖北襄陽）。

龐統同諸葛亮有姻親關係。當佢兩個細時，諸葛亮嘅細姐嫁咗畀龐山民，龐山民係龐統嘅堂兄弟^[1]。主婚人係名士龐德公，佢係龐山民嘅老豆、龐統嘅叔伯。

龐統大諸葛亮兩歲。佢兩個經常放埋一齊對比，當中諸葛亮講嘢慎重，而龐統坦率樸直，兩個人嘅性格啱好相反^[2]。由於龐統魯樸遲鈍，多數人望佢係尋常人，得龐德公曉佢係份料，好睇重佢。

聽聞名士司馬徽好識睇人，龐統就去搵着佢。兩個見面時，司馬���喺樹上摘緊桑葉，龐統於是坐喺樹下傾偈問答，結果兩個人自朝早談論到夜晚。司馬徽認出佢嘅才能，極力讚佢^[3]。自此龐統嘅名聲逐漸浮顯。龐德公睇好佢同諸葛亮，爲佢兩個起名號，龐統起嘅號係鳳雛，諸葛亮起嘅號係臥龍。

喺郡度聽到龐統嘅名聲，就任命佢做南郡功曹。

赤壁之戰後（208年），東吳將領周瑜帶軍打江陵，自曹仁手中佔得南郡（209年），得到孫權封佢做南郡太守。龐統繼續任職功曹，未得周瑜留意到。

210年，周瑜過世。龐統到吳郡弔喪。東吳人聽聞過佢嘅名，於是佢返荊州（南郡）時，幾多名士齊集喺昌門餞行。

劉備從孫權度借到江陵、南郡做根據地，稱爲「借荊州」。龐統畀劉備任命做從事，試下畀權佢做耒陽縣令。喺在任過程中，龐統唔注重處理公務，搞到被革職^[4]。

東吳呢邊繼任周瑜嘅將領係魯肅，佢寫信畀劉備薦舉龐統，話唔應該喺啲細職細務度用佢。諸葛亮亦噉同劉備護住佢。劉備於是召龐統來，共佢傾偈。談論完後，劉備好服佢，於是任命佢做治中從事，之後無幾耐升佢職位做軍師中郎將，同諸葛亮同級。

211年，劉璋喺益州畀喺漢中嘅張魯威脅，想請劉備入來幫手。劉璋手下張松、法正想因此秘密聯結劉備，幫佢喺西川做主人。劉備猶豫不決。龐統於是出力說服劉備聽法正條計^[5]。最後劉備聽咗佢嘅提議，嗌關羽、諸葛亮留喺荊州，帶龐統共將領黃忠、魏延入益州。

劉璋出來喺涪城接劉備。龐統勸佢捉咗劉璋來做威脅，然後去佔咗益州，噉樣��免用到武力，不過劉備唔聽，因爲佢喺本地人中未有威信。

喺供應糧草、軍備畀劉備後，劉璋返成都，交畀劉備去打張魯。劉備有超過三萬人軍隊喺手^[5]，車具充足，佢聽龐統條計唔去打張魯住，先留喺葭萌同民衆搞好關係。

過咗一年到212年尾，喺成都幫劉備做內應嘅張松露咗馬腳，畀劉璋捉住殺咗，自此劉璋同劉備正式反目成仇^[6]。劉璋停止供應糧草畀劉備。龐統睇到咗行動嘅時候，於是攞出三條計畀劉備揀^[7]：

私底下揀精兵，日夜行軍，襲擊入成都。劉璋唔曉軍事，又唔防備人，似噉樣可以喺一年內攞低益州，係上策。拋出假訊話荊州有事要返去，誘鎮守緊白水嘅西川二將楊懷、高沛出來，殺咗佢哋，佔咗佢哋嘅軍兵，然後去打成都，係中策。撤兵返白帝城再等時機行動係下策。

諗咗陣後，劉備揀中策，拋出假訊話荊州畀曹操威脅，要帶兵返去救。果然楊懷同高沛都開心於劉備要帶軍返荊州，唔再威脅益州，於是帶啲隨從去餞別劉備。劉備立即捉住楊懷同高沛殺咗，奪咗二將喺白水嘅軍馬，然後組織進攻，理由係劉璋背信唔再供應糧食。

荊州軍分做兩路去打，好快爭得勝利，佔得涪城。劉璋嘅主力軍撤退，固守喺綿竹城。

213年，劉備指揮張飛、趙雲同諸葛亮自荊州帶軍入來助戰，約咗到時兵臨成都城下時，共同會兵去打佔呢座城市。

214年夏天，荊州各支勁旅都得勝。劉備聽到消息話張飛同諸葛亮已經打到成都嘅東面同北面，而趙雲攻破到犍爲，於是共龐統分路進攻雒城。龐統引住支勁軍誘得守城將領張任出咗雒城。張任走出到南面，喺雁橋駐軍。劉備於是切斷張任嘅退路，而龐統引軍去雁橋去打張任。龐統中咗箭而戰死^[8]。嗰陣時佢先虛歲36歲。

劉備打敗張任，並且生擒佢。因爲張任唔投降，於是劉備嗌人拖去斬。

喺佔得益州後，劉備諗起龐統嘅功勞，經常提到佢時喊。劉備追贈佢做關內侯，起諡號做靖侯，任命佢老豆做議郎，然後升職做諫議大夫。

龐統畀羅貫中喺《三國演義》描寫成「濃眉、凸鼻、黑面、短鬚、型容好醜嘅人」。司馬徽考察過龐統後，講出如下認定佢嘅話：「臥龍（即孔明）或鳳雛（即龐統），如果得到兩個人中一個，就可以平定得天下。」

初頭，龐統喺江南跟孫權。喺赤壁之戰時，佢曾經受周瑜委託，去獻計畀曹操，嗌佢用鐵鏈將各隻船綁成一排，來防止士兵暈船浪，但實質係令啲船唔散開，方便去火攻。由於龐統嘅功勞，當周瑜使用火攻時，曹操嘅船集中成一嚿，令佢哋走唔甩，都燒曬。

喺周瑜死後，魯肅薦舉龐統畀孫權，但龐統唔得孫權重用，於是去荊州跟劉備。

龐同做耒陽縣令嗰陣飲酒唔做嘢，張飛監視嗰陣，佢按部處理咗百日嘅公務。呢度係參考咗蜀漢文官何衹嘅事蹟。

龐統作爲軍師共劉備引軍五萬入西川。龐統共法正出計謀畀劉備，要佢請劉璋入席，喺會上趁機殺咗劉璋，然後佔咗西川，不過劉備話噉嘅行動係不仁，於是無噉做。龐統嗌魏延喺席間出來舞劍，然後刺殺劉璋，但畀劉備撳住趕咗出去。

到劉備同劉璋正式反面對打時，龐統出計畀劉備殺咗劉璋嘅兩個將領高沛同楊懷，奪咗涪關，進攻雒城。

由於要提高諸葛亮嘅形象，羅貫中虛構咗雒城場仗。喺龐統進軍前，孔明已經寄信警報咪做，不過龐統覺得孔明係妒忌佢自己，於是唔聽孔明同劉備嘅話。到行軍時，龐統嘅馬眼花，企唔穩，撉（dan3）龐統佢落馬。劉備睇到噉，將佢自己騎緊嘅白馬換咗畀龐統。龐統由於主觀上輕敵，令佢入咗張任嘅埋伏，呢個西蜀將領令龐統連人帶馬死喺落鳳坡之下。

喺佢死後，諸葛亮先至揮軍入益州，用計捉張任爲龐統報仇。史實上超過龐統死之前半年，諸葛亮同張飛嘅勁旅就已經喺益州共劉備同龐統配合作戰。劉備同龐統領軍獨立作戰，喺雒城打敗兼捉到張任，龐統因此暴露喺陣前中箭而過世^[9]。

• 劉備
• 劉璋
• 諸葛亮
• 西川戰役

• 陳壽（著）；裴松之（注）。〈蜀書：龐統法正傳 - 龐統傳〉. 《《三國志》》。
• Trần Văn Đức（字未定，僅參攷：陳文德） (2008年)。《Khổng Minh Gia Cát Lượng đại truyện（孔明諸葛亮大傳）》 (越南文)。文學出版社（Nhà xuất bản Văn học；家出版文學）。 {{cite book}}: templatestyles stripmarker in |publisher= at position 85 (help)
• Trịnh Phúc Điền, Khả Vĩnh Quyết, Dương Hiệu Xuân（字未定，僅參攷：鄭福田、可永決、楊號春） (2006年)。〈卷一〉. 《Tướng soái cổ đại Trung Hoa（漢喃：將帥古代中華；中譯：中華古代將帥）》 (越南文)。青年出版社（Nhà xuất bản Thanh niên；家出版青年）。 {{cite book}}: templatestyles stripmarker in |publisher= at position 88 (help); templatestyles stripmarker in |title= at position 89 (help)CS1 maint: multiple names: 作者名單 (link)
• 黎東方 (2003年)。《《細說三國》》。上海人民出版社。
• 黎東方、王子今 (2002年)。《《細說秦漢》》。上海人民出版社。
• 易中天 (2006年)。《《品三國》》。上海文藝出版社。