電話亭

電話亭（英文：Telephone booth）係一個矗立喺街頭，裏面有一部公共電話嘅細屋仔，呢啲公共電話通常都需要收錢。電話亭通常設有透明或有細窗口嘅閘門，除咗保障使用者嘅私隱之外，又可以畀人知道電話亭裏面有冇人用緊。部分地區嘅電話亭裏面，會放置電話簿畀使用者查閱。

早期嘅室外電話亭採用木材或金屬製造，設有玻璃窗。之後新設計嘅，會採用塑膠或玻璃纖維，簡單耐用之餘亦可以減低成本。電話亭外面通常印有電話公司嘅標誌同名，以增強品牌形象。位於室內嘅電話亭，可能會設計得更加簡單。

電話亭喺1910年代當時嘅工業國家開始普及，到咗1980年代，收費公共電話開始較少放喺電話亭內，部分電話轉移放喺啲檔仔裏面。使用者講嘅嘢容易俾人聽到，間接令到使用者唔好長時間佔用電話。