香港島

22°15′52″N 114°11′14″E / 22.26444°N 114.18722°E / 22.26444; 114.18722

  呢篇文講一個叫「香港島」嘅島。想搵香港嘅所有島嘅話，請睇香港嘅島。

  「港島」跳轉到��度。想搵日本嘅人工島，請睇「港灣人工島」。

香港島，簡稱港島，係香港境內主要嘅島，亦係香港第二大島，面積78平方千米，係現時香港嘅政治經濟中心。

島南嘅赤柱係香港開埠前嘅政治中心，後尾因為啲鬼佬唔習慣定居起又潮濕又大風嘅海岸，同埋嗰時赤柱一帶啱啱有場疫病，食水有少少污糟唔夠太多人用，土地又少，當地唔鍾意鬼佬風俗嘅華人又多。後尾改設島北域多利城（又叫做女皇城或維多利亞城，英文名Victoria City）為英國殖民香港最早發展嘅地方，一直係香港嘅商業同政治中心。嚟香港嘅英國人同移居香港嘅華人，最初就係住響呢個城。香港島同九龍半島之間隔住個維多利亞港，個港係以前進出香港嘅貿易船隻停泊嘅港口。

島上面最高嘅山係太平山，海拔554米。

香港島嘅行政分區有：

• 中西區
• 東區
• 南區（包括鴨脷洲）
• 灣仔區

註：香港島唔屬於離島區。

香港島嘅舂坎角發現過五、六千年前嘅陶器呀咁，鋼線灣同埋黃竹坑都出土過唐朝嘅文物。海底隧道入口（以前嘅奇力島，又叫做燈籠洲）出土過裝有隋朝去到元朝嘅銅錢。

秦征百越之後，香港島同埋香港其他部份開始成為中國領土。

第一次鴉片戰爭期間嘅1841年1月20號，英國嘅中國商務代表（未獲清廷承認）兼皇家海軍軍官查理義律（Charles Elliot）最先佔領香港島。清朝打輸咗之後，1842年簽訂《南京條約》割讓香港島畀英國。

香港島係香港第二大島，排喺大嶼山之後。香港島面積約佔全香港面積嘅7%，同九龍半島隔維多利亞港相望。

2000年，香港島嘅人口有1,367,900人，約佔全香港人口嘅19%。人口密度每平方公里18,000，高過整體密度（7,000/km²）；加上九龍嘅人口共佔全港人口嘅47%。

維基同享有多媒體嘅嘢：
Hong Kong Island

山頂纜車係香港最長歷史嘅公共鐵路，來往爐峯峽、半山區同中環。

香港電車行港島北岸，來往堅尼地城至筲箕灣，以及服務跑馬地。

連接香港島同鴨脷洲嘅鴨脷洲大橋喺1980年落成。

香港島西端同南部未有鐵路服務嘅範圍主要係靠巴士同小巴服務。

港鐵港島綫行港島北岸，來往堅尼地城至柴灣，1985年起分段通車。南港島綫東段來往金鐘至海怡半島，2016年底通車。南港島綫西段同北港島綫就重建議緊。

家陣有3條海底隧道（東區海底隧道、紅磡海底隧道同西區海底隧道）、3條港鐵路線（東涌綫、荃灣綫同將軍澳綫）同機場快綫連接香港島同九龍半島同新界。第4條過海鐵路沙田至中環綫而家仲起緊。

島內亦設有渡輪碼頭，有定時嘅航班來往九龍（包括尖沙咀、紅磡、九龍城、觀塘等等）同離島（包括馬灣、愉景灣、梅窩、坪洲、長洲同南丫島）。