Li Soverdea (gazete)

Lë Sauvèrdia

Pol discramiaedje des årtikes avou l' mot « Soverdea », loukîz cial.

Li Soverdea (ki si scrît Lë Sauvèrdia), c' est ene rivuwe del soce di scrijheus «Les Soverdeas d' après Djodogne», k' eplaide des belès letes e walon. Li no provént do lomaedje do moxhon d' toet dins l' payis d' Djodogne.

Elle a rexhou 397 limeros, di 1983 a 2022.

Gn a 10 limeros tos ls ans. I n' vude nén tins des grandès vacances (moes d' djulete et d' awousse)

C' esteut des foyous tapés al machine, enimådjîs di des ptits desséns å croyon.

Ci n' est k' dispu 2011 ki l' tapaedje passa do sistinme del viye machine a scrire, a on aspougnaedje di tecses.

Divant 2012, gn av pont d' tåve avou l' contnou.

Ene sifwaite gazete avou l' minme tite, «Li Soverdea», aveut ddja stî enondêye e 1892 pa Edmond Etienne. Mins s' n' aveut ele duré k' èn an.

Li rvuwe a riskepyî e 1983, dabôrd ki li «Noer Boton» vineut di stater.

Dispu li cmince, li mwaisse-eplaideu a stî Henri Lerutte, eyet li penleuse, Germaine Massart. Dispu les anêyes 2000, c' est bråmint Jean-Jacques Gaziaux ki s' ocupe do secretariat.

Dispu 2007, c' est lu k' est ossu mwaisse sicrijheu. Jean-Jacques Gaziaux divna mwaisse sicrijheu a cmincî do l° 242 (moes d' fevrî 2007).

E 2013, Jean-Jacques Gaziaux, malåde, diva leyî ouve. C' est Joseph Decossaux ki dvénrè mwaisse sicrijheu. Mins c' est bråmint Andrée Flesch ki fwait tourner l' gazete.

Cwand cisse-ciale dihote e 2021, c' est Jules Sabaux ki rprinda l' coirdea. Mins après s' moirt, co djonne, e 2022, li gazete si djoca.

Les scrijhaedjes do Soverdea ont siervou d' soûmint a deus antolodjeyes a tinmes, ramexhnêyes pa Jean-Jacques Gaziaux :

• Nos campagnes, sol tinme do vicaedje dins les cinses (1998).
• Vey voltî, sol tinme des hantaedjes et do mariaedje (2002).

• Joseph Boucher
• André Coutisse
• Joseph Decossaux
• Jacques Desmet
• André Dewelle
• Françoise Evrard (dins les dierins limeros)
• Jules Flabat
• Andrée Flesch
• Jean Flesch
• Marguerite Frevelshausen
• Gérard Havelange
• Jean Hamblenne (dins les dierins limeros)
• Paul Janson
• Henri Lerutte
• Jules Sabaux
• Jean-Pierre Surkol
• Germaine Tilmant
• Joseph Tollet
• Odile Uyttebrouck
• Guillaume Warnier

A l' ocåzion, i rprindént ossu des tecses di pus vîs scrijheus:

• Paul Moureau
• Jean Volant

Moirt d' on Soverdea (avou ene lete da Joëlle Spierkel, Li Rantoele l° 105, bontins 2023.