Ust'-Labinsk

Ust'-Labinsk
Усть-Лабинск

Lidnanznam	Flag
Valdkund	Venäma
Eläjiden lugu (2023)	39,050 ristitud
Pind	37,15 km²
Pämez'	Stanislav Gainüčenko (sulaku 2020—)
Telefonkod	+7−86 135-xx-xxx
Avtokod	23, 93, 123
Aigvö	UTC+3 (MSK+0)

Ust'-Labinsk (ven.: Усть-Лаби́нск, suline mugažo Усть-Лаба i Услаба́, adig.: Лэбап) om Venäman lidn, lidnankund da avtotesol'm Krasnodaran randan keskuzpalas. Se om Ust'-Labinskan rajonan administrativine keskuz.

Eländpunktan aluz om pandud vl 1794 kuti Ust'-Labinskai-stanic (ven.: станица Усть-Лабинская) sirdanuzil Donan randaspäi kozakoil. Vl 1900 saudihe raudtestancijan «Jekaterinodar — Kavkazskai»-keskustal. Stanic sai lidnan statusad nügüdläiženke nimenke vl 1958. Stanican lidnusen varmitesed oma kaičenus hüvin.

Ust'-Labinsk šingotase sömtegimištol (efirvoiden ekstrakcijan kombinat, saharan tegim, lihakombinat), sauvondmaterialiden pästandan edheotandoil (gazbetontegesed, raudbetontegesed), kohenduzmehanižel tegimel^[1] (mašiništ sahar-, voi- i sauvondtegimištoiden täht, metallan ümbriradmine), propilenhavadoiden tegimel. Lidn om maižanduzrajonan keskuseks, kazvatadas villänkul'turoid, änikoid, semnid, i lindvodindan ferm radab. «Kuban'»-agroholdingan päfater om saudud lidnas.

Lidn sijadase 75 m korktusel valdmeren pindan päl, Kuban'-jogen oiktal korktal randal, sen ühthejoksmust vaste Labanjogenke.

Ust'-Labinsk seižub Adigejan Tazovaldkundan röunanno. Matkad Krasnodarhasai om 62 km päivlaskmha. Lähembaine lidn om Korenovsk koumekümne kilometrad lodeheze avtotedme.

Ust'-Labinsk om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeline Administracijan pämez' om Sergei Viskubov (reduku 2017 — semendku 2019). Lidnan Nevondkundan ezimez' om Svetlana Agibalova vn 2019 kül'mkuspäi.

Vn 2010 Venäman rahvahanlugemižen mödhe lidnan eläjiden lugu oli 43 270 ristitud, vn 2021 — 40 158 ristitud. Kaik 41 348 eläjad oli lidnas vl 2017. Kaikiš suremb lidnan ristitišt oli läz 44 tuhad eläjid vozil 1996−2003.

Rahvahad (enamba 1 % vl 2010): venälaižed — 91,9 %, armenijalaižed — 3,2 %, ukrainalaižed — 1,3 %, toižed rahvahad — 3,1 %, rahvahuden ozutandata — 0,5 %.

Hristanuskondan kuz' pühäpertid oma saudud: koume — ortodoksine^[2], kaks' — baptizman, üks' — seičemenden päivän adventistoiden.

Lapsiden opendusen aluzkundad oma severz'-se päivkodid, keskškolad. Saudud Oleg Deripaska-edheotajan fondal licei lahjoitud lapsiden täht^[3] om avaitud vl 2022. Ust'-Labinskan socialiž-pedagogine kolledž^[4] om lidnan professionaližen opendusen aluzkundaks.

• 
  Amptud nacistoil Suren sodan aigan sijaližiden eläjiden velleskaum (2020)
• 
  Ph. Sergii Radonežalaižen jumalanpert' (ortodoksine hristanuskond), vn 2010 nägu
• 
  Rajonan kodirandantedištandmuzei vl 2018
• 
  Vanh sauvuz Leninan i Demjan Bednijan irdoiden saumal (2013)
• 
  Vanh sild Kubaniš päliči i nägu lidnusespäi Hatukai-aulha (Adigei) vl 2012
• 
  Ust'-Labinskai-päraudtestancii vl 2023

1. ↑ Kohenduzmehanižen «Ust'-Labinskii»-tegimen sait (ulormz.ru). (ven.)
2. ↑ Ust'-Labinskan pühäpertid sobory.ru-saital. (ven.)
3. ↑ Ezmäižen universitetižen licein N.I. Lobačevskijan nimed sait (ul-lyceum.ru). (ven.)
4. ↑ Ust'-Labinskan socialiž-pedagogižen kolledžan sait (ulspk.ru). (ven.)

• Lidnankundan tobmuden oficialine sait (gorod-ust-labinsk.ru). (ven.)

Ust'-Labinsk Vikiaitas