Сарапул ёрос

Сарапул ёрос

Герб Флаг
Центр	Сигаево
Улӥсьёс
- ваньмыз	23 764
- плотность	12,7 адями/км²
Территория
- ваньмыз	1878 км²

Сарапул ёрос — Удмуртиысь ёрос. Центрез — Сигаево черкогурт.

Сарапул ёрос республикалэн лымшор-ӵукшор люкетаз интыяськемын. Солэн бускельёсыз луо Завьял, Пичи Пурга, Кияса, Камбарка, Каракулино ёросъёс но Сарапул кар (город ёрослэн составаз уг пыры). Со сяна, лымшор-ӝытшор палтӥз кошке Татарстанэн кунгожез, но уйпал-шундыӝужан палтӥз — Пермь шаерен кунгожез.

Кам шур ёросэз люке бур пал ярдурысь но паллян пал ярдурысь (камсьӧр) люкетъёслы. Соин валче ёрослэн бадӟымез люкетэз Камлэн бур пал ярдураз интыяське, Сарапул вырйылын. Ёрослэн шундыӝужан (камсьӧр) люкетэз Камско-Бельской улыг интыын кылле.

Сарапул ёрос кылдытэмын 4-тӥ январе 1924-тӥ арын, соку со Урал улосын вал. 20-тӥ январе 1934-тӥ арын Урал улосэз Свердловск улос шуыса нимазы. ВЦИК-лэн 7-тӥ декабре 1934-тӥ арын пуктэмезъя Свердловск улосысь Сарапул ёрос Киров шаере пыртэмын вал.

22-тӥ октябре 1937-тӥ арын СССР-ысь ВЦИК юнматӥз Удмурт АССР-ысь ЦИК-лэсь но Киров облисполкомлэсь ходатайствозэс Сарапул ёрослэн Киров улосысь потэмез но Удмурт АССР пушкы пыремез сярысь.

РСФСР-ысь Верховной Советлэн Президиумезлэн 7-тӥ мартэ 1939-тӥ арын указэзъя, Сарапул ёрослэсь висъяськыса, Камбарка ёрос кылдӥз.

УАССР-ысь Верховной Советлэн Президиумезлэн пуктэмезъя 8-тӥ декабре 1962-тӥ арын огшоры ёрос интые Сарапул гурт ёрос кылдытэмын вал. УАССР-ысь Верховной Советлэн Президиумезлэн 11-тӥ январе 1965-тӥ арын пуктэмезъя Сарапул гурт ёрос пӧрмытэмын Сарапул ёрослы. 1991-тӥ арын Сарапул ёрослэн центрез Сарапул карысь Сигаево черкогуртэ выжтэмын.

2002-тӥ арын калыкез лыдъян-чотанъя ёросын улӥсь калыклэн лыдыз 24 215 ад��ми вал. Со пӧлысь 10 %-эз удмуртъёс вал, 79,4 %-эз — ӟучъёс, 6,3 %-эз — бигеръёс.

Калыкез дышетон удысын Сарапул ёросын ужало 23 школа (10 шоръёзо школа но 6 школа-сад), крезьгуръя школа но 16 нылпи сад. Тазалыкез утён удысын тыршо ёрос больница но 19 фельдшер-акушер пункт. Со сяна ёросын ужало 31 культурая юртъёс но клубъёс но 18 библиотекаос.

Сарапул ёросысь промышленностьлэн инъетаз нефть поттон предприятиос. Гурт возёс удысын азинско йӧл поттон, сӥль дасян но ю-нянь будэтон.

Сарапул ёростӥ ортчись автомобиль сюресъёс пӧлын тужгес кулэлыкоесь луо Р322 «Ижкар — Сарапул» но «Костино — Камбарка» трассаос. Соос герӟало Иж карез Сарапулэн но Удмуртиез Камбарка ёросэныз но Башкортостанэн.

Со сяна, Сарапул ёрос пыр ортче бадӟым чугун сюрес Кузон — Екатеринбург. Ёросэ интыяськемын та чугун сюреслэн Бугрыш станциез.

• Ёрослэн сайтэз (ӟуч)
• Сарапул ёрос Кун Кенешлэн сайтаз (ӟуч)