Dark Souls

Dark Souls (ダークソウル Dāku Souru?) est unu videojocu de rolu (action RPG) chi From Software at isvilupau e prubicau in Giappone in su 22 de Capidanne de su 2011 solu pro PlayStation 3, mentras a libellu internassionale in su 4 de Santu Gabine de su 2011 pro PlayStation 3 e Xbox 360 e, in su 24 de agustu de su 2012, fintzas pro Microsoft Windows, intregande sa cumpartida a Namco Bandai Games pro su chi pertocat su Ponente. A primu connottu chin su lumen de Project Dark, est su sichidore ispirituale de Demon's Souls.

Su jocu chi lu at sichìu est Dark Souls II.

In su tempus de sos Anticos, su mundu fit a s'iscuru: una fressada de nèula e àrtana lu imbolicabat e sos dracones lu dominaban a punzu de ferru. Su focu at permittiu sa distintzione de sos elementos de s'universu, fachende naschire su caente e su frittu, sa vida e sa morte, sa luche e su buju. Cando arribèin sos Segnores (Nito, su primu de sos mortos, Sa Maghiarja de Izalith e sas fizas de Caos, Su Segnore de su Sole Gwin paris chin sos caballeris suos e su nanu mustrencu) cumintzèit sa gherra tra omines e dracones chi acabèit chin s'iscunfitta de custos e su traichimentu de su dracone Seath su Chene-iscattas. Dae cughe cumintzèit su Tempus de su Focu, ma no istentèit meda chi sas frammas s'istudèin e su mundu torrèit a esser imbolicau in s'iscuru. Medas omines sun mortos, e sos chi bi l'an fatta juchen unu sinzu chi inditat sos non-mortos. Su protagonista est unu de custos, postu a presone ind unu casteddu isperdiu: compitu suo est a fughire dae su casteddu e accudire a Lordran, sa terra de sos Segnores.