Zutfent

Zutfent (hollandsch Zutphen, hoochdüütsch ook Zütphen) is ene Stadt mit minder denn 50 000 Inwahners in de Gemeen Zutfent in de Provinz Gelderlaand vun de Nedderlannen, 30 km noordossen vun Arnem. Dor is de Münn vun de Berkel in de Iessel. Se is nich wiet vun Apeldoorne, Deutekem un Dèventer. Circa 10 bet 15 % vun de Inwahners sünd Anthroposophen. In Zutfent gifft dat den Groenmarkt den Houtmarkt un den Zaadmarkt. De Stadt hett een Intercity-Bohnhoff. In de Stadt sünd twee Siekenhüüs, dovun een grotet psychiatrischet. To de Gemeen Zutfent höört sinds 2005 dat Dörp Warnsveld.

Üm 800 kehm Zutfent in't Frankenriek. Zutfent warr in't 9. Johrhunnert vun Wikinger angrepen. De Sint Walburgiskerk vun uns Tiet warr in't 11. Johrhunnert boot. Vun 1046 weer de Bischop vun Utrecht de Landsherr vun de Graafschop Zutfent. Twüschen 1191 un 1196 kreeg Zutfent de Stadtrechten. Later warr Zutfent de Hööftstadt vun de Graafschop. De Hansestadt nehm an den Oostseehannel Deel. 1572 weer dat Blootbaad vun Zutfent. Moritz vun Oranien hett de Stadt 1591 wedder för de Nedderlannen innehmen. So fung ene lange Tiet as Festenstadt an. Dat Johr 1874 weer dat End vun de Feste.

De Sint Walburgiskerk warr circa 1050 as ene romaansche Kapitelkark boot, man later utboot. In ehr Toorn befinn sick sess Klocken. Dat Angelusklokje is jeden Daag to höörn. To de Kark höört ene Böökerie vun 1561. vele Böker sünd ut dat 15. - 17. Johrhunnert. De Broederenkerk is ene ehemaalsche Dominikanerkark ut dat fröge 14. Johrhunnert. Disse Kark warr as Bökerie bruukt. Ehr Klock släägt jeden Daag, üm an de Gefallenen vun den Tweeten Weltkrieg to erinnern. De Nieuwstadskerk, ook Sint Johannes de Doper nöömt, is ene kathoolsche Kark, in't Medelöller as Onze Lieve Vrouwe op de Nieuwstad bekannt. De Kark warr in't 15. un 16. Johrhunnert utboot un warr ene Hallenkark.

• Luftbild vun Zutfent