Fraanke

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

De Fraanke waore e Germaons volk wat in d'n tied vaan de grote invasies aon de rand vaan 't Roemeins Riek 'ne belaangrieke rol speulde. In de viefden iew, wie 't Wes-Roemeins Riek begos in te zakke, veruiverde de Fraanke 'n deil vaan 't noorde vaan Roemeins Gallië en gónge dao hojze.

Vaanoet Gallië begosde de Fraanke hun confidderatie oet te breie nao 't zuie. Dees confidderatie, die in essentie neerkaom op 'n verzaomeling aon stamme die verklaorde geine krieg te veure mèt mekaar, zou 'ne groete rol gaon speule in Europa. Fraankriek heet zelf ziene naom te daanke aon de Fraanke - zoe-ouch 't historisch Fraankisch Riek. Mer 't heet ouch 'n groete invlooj gehad op de cultureel vörming vaan de Limbörge: de Limbörgse taol is 'n Nederfrankische taol en stamp daomèt aof vaan de taole die door de meiste Fraanke woorte gesproke. Daoneve höbbe de Fraanke 'n groete cultureel invlooj gehad op oonder aandere Nederland, Belsj, Luxembörg en Duitslaand. Duitse stei wie Frankfurt am Main en 't veurmaoleg geld vaan Belsj, Luxembörg en Fraankriek, de frang, höbbe allemaol hun naome te daanke aon de Fraanke.