Akademisk Boldklub

Akademisk Boldklub
Fullt nafn	Akademisk Boldklub
Gælunafn/nöfn	Akademikerne, AB
Stofnað	1889
Leikvöllur	Gladsaxe Stadion
Stærð	13.507
Heimabúningur Útibúningur

Akademisk Boldklub eða AB er danskt knattspyrnufélag í Gladsaxe, úthverfi Kaupmannahafnar.

Akademisk Boldklub, er í dag betur þekkt undir skammstöfuninni AB. Það var stofnað árið 1889 við sameiningu tveggja knattspyrnu- og krikketfélaga námsmanna í Kaupmannahöfn. Nýja félagið gerði þá einu kröfu til liðsmanna sinna að þeir væru nemendur við Kaupmannahafnarháskóla eða væru útskrifaðir þaðan.

AB hefur sjö sinnum orðið Danmerkurmeistari í knattspyrnu frá því að byrjað var að keppa um þann titil árið 1913. Fyrsti meistaratitillinn vannst árið 1919 en sá síðasti árið 1967. Í seinni tíð hefur félagið átt erfiðara uppdráttar og lengst af verið í næstefstu deild. Það átti þó skammvinnt blómaskeið í kringum síðustu aldamót, þar sem það hafnaði tvívegis í þriðja sæti úrvalsdeildarinnar og varð bikarmeistari árið 1999.

Árið 1962 flutti AB frá Kaupmannahöfn til núverandi heimkynna sinn í nágrannabænum Gladsaxe.

Frægasti leikmaður í sögu AB er vafalítið eðlisfræðingurinn og Nóbelsverðlaunahafinn Niels Bohr, sem lék um tíma í marki liðsins. Bróðir hans, Harald Bohr var prófessor í stærðfræði við Kaupmannahafnarháskóla og einn helsti markahrókur AB um árabil. Harald var í danska liðinu sem vann silfurverðlaun á Ólympíuleikunum 1908 í Lundúnum.

Íslendingurinn Samúel Thorsteinsson lék lengi með Akademisk Boldklub og var í fyrsta Danmerkurmeistaraliði félagsins árið 1919.

Knud Lundberg (1920 – 2002) varð fimm sinnum Danmerkurmeistari með AB á fimmta og sjötta áratugnum. Hann er einn kunnasti íþróttamaður Dana, ekki hvað síst fyrir það afrek að leika landsleiki í þremur í íþróttagreinum: knattspyrnu, handknattleik og körfubolta.

Íslenskir knattspyrnumenn áttu snemma þann draum að fá erlendan knattspyrnuflokk í heimsókn, en vegna fyrri heimsstyrjaldarinnar voru slíkar ferðir ómögulegar. Strax að stríðinu loknu var farið að svipast um eftir vænlegum gestum og má telja líklegt að AB hafi orðið fyrir valinu vegna milligöngu Samúels Thorsteinssonar leikmanns þess. Eftir að samið hafði verið um heimsóknina varð AB danskur meistari í fyrsta sinn og jók það enn á eftirvæntingu Íslendinga að taka á móti meistaraliðinu.

Hópurinn sem hingað kom í ágústbyrjun var blandaður af leikmönnum úr aðal- og varaliðinu. Olli það íslenskum knattspyrnuáhugamönnum nokkrum vonbrigðum að Harald Bohr var ekki með í för. Engu að síður var mikið um dýrðir og bæjarlífið í Reykjavík snerist um heimsókn dönsku gestanna, ekki hvað síst vegna þess að með sama skipi kom hópur kvikmyndagerðarmanna sem hugðist taka upp Sögu Borgarættarinnar með Guðmund „Mugg“ Thorsteinsson í aðalhlutverki.

Ákveðið hafði verið að AB léki fjóra kappleiki í ferðinni. Fyrst mættu Danirnir sameinuðu liði Vals og Víkings og sigruðu 7:0. Því næst voru KR-ingar lagðir að velli 11:2 og Framarar urðu fórnarlömbin í þriðju viðureigninni, 5:0. Til tals kom að Samúel Thorsteinsson léki með Framliðinu í þessum leik, þar sem hann var skráður meðlimur í báðum félögum. Úr því varð þó ekki.

Mest eftirvæntingin var þó fyrir leiknum gegn íslenska úrvalsliðinu, sem í raun má telja fyrsta íslenska landsliðið. Það skipuðu Framararnir Pétur Sigurðsson, Gísli Pálsson, Tryggvi Magnússon og Friðþjófur Thorsteinsson , KR-ingarnir Kristján L. Gestsson, Gunnar Schram og Róbert Hansen, Valsararnir Stefán Ólafsson og Magnús Guðbrandsson & Víkingarnir Páll Andrésson og Óskar Norðmann.

Úrvalsliðið kom mjög á óvart með því að sigra AB með fjórum mörkum gegn einu. Leikið var í úrhellisrigningu við mjög erfiðar aðstæður. Danirnir afsökuðu tapið með því að leikmennirnir hefðu þjáðst af harðsperrum eftir útreiðartúr til Hafnarfjarðar daginn áður, en auk hestamennskunnar höfðu gestirnir slett ærlega úr klaufunum um kvöldið.

Ákveðið var að bæta við nýjum lokaleik við úrvalsliðið og sigruðu gestirnir þá 7:2.

Skáldsagan Höfuðlausn eftir rithöfundinn Ólaf Gunnarsson gerist meðan á heimsókn AB og danska kvikmyndatökuliðsins til Reykjavíkur stendur.

• Víðir Sigurðsson & Sigurður Á Friðþjófsson (1997). Knattspyrna í heila öld. Knattspyrnusamband Íslands. ISBN 9979-60-299-6.
• Grønkjær, Allan & Olsen, David Holt (2007). Fodbold, fair play og forretning - Dansk klubfodbolds historie. Turbine forlaget. ISBN 978-87-91415-97-5.