Xosé Manuel Pazos

Xosé Manuel Pazos

Biografía
Nacemento	19 de marzo de 1957 Coiro, España
Morte	25 de xaneiro de 2021 (63 anos) Vigo, España
Causa da morte	cancro de pulmón
Alcalde de Cangas
2015 – 2021 (finado no cargo) ← José Enrique Sotelo – Victoria Portas →
Actividade
Ocupación	político, escritor

Xosé Manuel Pazos Varela, nado en Coiro (Cangas) o 19 de marzo de 1957 e finado en Vigo o 25 de xaneiro de 2021^[1], foi un escritor, dramaturgo e político galego.

Participou como actor, autor e director, na creación dos grupos de teatro afeccionado de Cangas Matamoura e Múa, da sección de Vigo-Cangas da Escola Dramática Galega, e da Compañía profesional Teatro de Ningures. Participou na Mostra Internacional de Teatro Cómico e Festivo de Cangas, da que foi responsable nas nove primeiras e na 11ª edición. Traballaba habitualmente para Teatro de Ningures e a Revista Galega de Teatro. Colaborou en varios espectáculos de Teatro do Atlántico e con outras compañías como o Centro Dramático Galego.

Foi concelleiro de Cultura de Cangas en dúas etapas: 1995-97, por Esquerda Unida-Esquerda Galega e 2007-09 pola Alternativa Canguesa de Esquerdas. Entre 1997 e 2001 foi deputado no Parlamento de Galicia por Esquerda de Galicia. Dende 2011 foi concelleiro na oposición no Concello de Cangas.

Nas eleccións municipais de 2015, encabezou a candidatura de ACE e foi elixido alcalde de Cangas grazas ao apoio de BNG e ASxUN. En 2019 recuncou na alcaldía á fronte de ACE co apoio do PSOE, BNG e Avante, aínda que conformou un bipartito só cos primeiros.

Faleceu no Hospital Álvaro Cunqueiro de Vigo mentres continuaba á fronte do concello a causa dunha insuficiencia cardíaca derivada do cancro pulmonar que arrastraba dende había anos.

Dende o 13 de maio de 2022 o auditorio de Cangas leva o nome de Xosé Manuel Pazos Valera para homenaxear a súa traxectoria e impulso da cultura da comarca.^[2]

• Ida e volta (Taxi), premio Max ao mellor autor teatral en galego.
• Desembarco dos turcos.
• María Soliña.
• Act-Tress.
• Crónica da peste.
• María Soliña ou O profeta ou o derradeiro berro de Randulfo.

A súa versión teatral da novela de Suso de Toro Círculo recibiu o Premio Max ao mellor texto Teatral en galego en 2003.

Foi o autor da letra do tema "María Soliña" do grupo de rock Astarot.

Traduciu a José Luis Alonso de Santos, Juan Mayorga, Luigi Pirandello, Ernesto Caballero de las Heras, Itziar Pascual e José Sanchis Sinisterra.

• Cartas de amor a Stalin. Himmelweg. A paz perpetua, de Juan Mayorga, 2009, Galaxia.

• Estilo de exercicios, para exercicios de estilo, con Henrique Harguindey, 1995, Xerais.
• Banqueiros, 2012, Laiovento.

• "Xosé Manuel Pazos: “A Xunta actual non está á altura do país e, moito menos, da Historia”". Galicia Hoxe. 20/12/2010. Arquivado dende o orixinal o 27/12/2010. Consultado o 26/09/2011. 

Predecesor: José Enrique Sotelo

Alcalde de Cangas  2015 - 2021

Sucesor: Victoria Portas