Scott Skiles

Scott Skiles

Biografía
Nacemento	5 de marzo de 1964 (60 anos) La Porte, Estados Unidos de América (pt)
Residencia	La Porte (pt)
Educación	Universidade Estatal de Míchigan Plymouth High School (en)
Altura	185 cm
Peso	82 kg
Actividade
Ocupación	baloncestista, adestrador de baloncesto
Período de actividade	1986 - 1997
Nacionalidade deportiva	Estados Unidos de América
Deporte	baloncesto
Liga	Baloncesto masculino da División I da NCAA e National Basketball Association
Posición de xogo	Base
Convocado por	Milwaukee Bucks
Traxectoria   Equipo – Phoenix Suns – Philadelphia 76ers – Indiana Pacers – Washington Wizards – PAOK Tesalónica BC – Milwaukee Bucks – Chicago Bulls 1982–1986 Michigan State Spartans 1989–1994 Orlando Magic (Base)
Premios
(1991)  NBA Most Improved Player Award (pt)

Scott Allen Skiles, nado o 5 de marzo de 1964 en La Porte, Indiana, é un adestrador e ex xogador de baloncesto profesional estadounidense que xogou durante dez tempadas na National Basketball Association (NBA). Foi adestrador dos Phoenix Suns, Chicago Bulls, Milwaukee Bucks e Orlando Magic. Con 1,85 metros de estatura, xogaba na posición de base.

En 1982, Skiles levou ao Instituto Plymouth a gañar o campionato estatal de Indiana. Plymouth, sen ningún titular que medise máis de 1,88 metros e ningún reserva por encima de 1,99, estaba considerado como o instituto máis débil na Final Four do torneo estatal, a pesar de obter un balance de 26 vitorias e unha derrota na fase regular. Sorprendentemente gañaron o campionato 75-74 despois de 2 prórrogas sobre os favoritos Gary Roosevelt. Nese partido, Skiles anotou 39 puntos que foron decisivos para a vitoria final. Foi o instituto máis pequeno en gañar o título estatal dende que Milan o gañase en 1954, cuxa historia está inmortalizada na película Hoosiers. En 1982 Skiles liderou a competición estatal con 30,2 puntos por partido.^[1]

Xogou durante 4 tempadas cos Spartans da Universidade de Michigan State, onde promediou 18,2 puntos e 5,5 asistencias. No seu ano sénior foi nomeado MVP da Big East Conference. Deixou a universidade como o máximo anotador até entón (2.145 puntos), mantendo na actualidade o récord de máis puntos nunha tempada (850).

Foi elixido no posto 22 do Draft da NBA de 1986 por Milwaukee Bucks, onde só xogou unha tempada, sendo traspasado ao ano seguinte a Indiana Pacers. Dous anos máis tarde chegou a Orlando Magic, equipo que o elixiu no draft de expansión. Alí, o 30 de decembro de 1990, conseguiu dar trinta asistencias nun partido, récord da NBA até a data, anulando ao anterior, que o posuía Kevin Porter con 29.^[2] Ese ano fixo 17,2 puntos e 8,4 asistencias por partido, dobrando practicamente as súas cifras do ano anterior, polo que foi elixido Xogador Máis Mellorado da NBA. Pasou posteriormente por Washington Bullets e Philadelphia 76ers, para acabar a súa carreira profesional en A1 Ethniki de Grecia, no PAOK Salónica BC. Nos seus dez anos como profesional na NBA fixo 11,1 puntos e 6,5 asistencias por partido.

Comezou a súa carreira na NBA como adestrador como asistente dos Phoenix Suns na tempada 1998-99, sendo elixido ao ano seguinte como adestrador principal. En tres anos levou aos Suns aos playoffs da NBA en dúas ocasións. En 2003 asinou como adestrador dos Chicago Bulls, cargo que ostentou até decembro de 2007, cando foi despedido debido aos malos resultados.^[3]

O 21 de abril de 2008 fichou por Milwaukee Bucks. O 8 de xaneiro de 2013, Skiles e os Bucks acordaron a súa marcha, despois de 5 anos en Milwaukee.^[4]

O 29 de maio de 2015, Skiles converteuse no 12º adestrador da franquía dos Orlando Magic.^[5]

• PAOK (1996–1997)
• Phoenix Suns (1999–2002)
• Chicago Bulls (2003–2007)
• Milwaukee Bucks (2008–2013)
• Orlando Magic (2015–presente)

• Récord da NBA de máis asistencias nun partido (30).
• Xogador Máis Mellorado da NBA en 1991.

• Estatísticas de Scott Skiles como xogador Arquivado 09 de novembro de 2012 en Wayback Machine. (en inglés)
• Estatísticas de Scott Skiles como adestrador Arquivado 26 de xuño de 2008 en Wayback Machine. (en inglés)