Aligátor do Mississippi

Aligátor do Mississippi
Aligátor americano no zoo de Columbus
Estado de conservación
Pouco preocupante
Clasificación científica
Reino: Animalia División: Chordata Clase: Sauropsida Orde: Crocodilia Familia: Alligatoridae Xénero: Alligator Especie: A. mississippiensis
Área de distribución da especie

O aligátor^[1] do Mississippi^[2] (Alligator mississippiensis) é unha especie de réptil crocodilio que se encontra exclusivamente na rexión sueste dos Estados Unidos, xunto aos regatos e pantanos. 

É a maior especie do xénero Alligator, e de feito é un dos crocodilios máis grandes de América, alcanzando un máximo de 6 metros de longo,^[3] aínda que debido á desaparición de grandes animais da zona por causas antrópicas, hoxe en día, os machos oscilan entre 4 e 4,5 m e as femias chegan aos 3 m.^[4][5] O seu peso oscila entre os 70 kg das femias e os máis de 450 kg dos machos.^[6]

Este crocodilio americano foi clasificado por primeira vez polo zoólogo francés François Marie Daudin como Crocodilus mississipiensis en 1801. En 1807 Georges Cuvier creou o xénero Alligator;^[7] que comparte co Alligator sinensis. Ambos agrúpanse na familia Alligatoridae, xunto cos caimáns. A superfamilia Alligatoroidea inclúe tódolos crocodilos (fósiles e existentes) que están máis estreitamente relacionados co crocodilo americano que co crocodilo do Nilo ou co gavial.^{[8][Cómpre clarificar]}

Os membros desta superfamilia xurdiron por primeira vez no Cretáceo tardío. O Leidyosuchus de Alberta é o xénero máis antigo coñecido. O crocodilo americano moderno está representado no rexistro fósil do Plistoceno.

Distribúese polos ríos, pantanos e marismas do sur dos Estados Unidos, desde Carolina do Norte ata o sur de Texas, lindando coa fronteira mexicana chegando ata o estado de Tamaulipas. A persecución humana de que foi obxecto noutro tempo fíxoo desaparecer de moitas zonas, e neste momento só abunda realmente no estado de Florida e en menor medida na desembocadura do río Mississippi. É unha especie protexida nos Estados Unidos, e moitos dos parques nacionais de Florida creáronse no seu momento co fin de preservar as súas zonas de caza e cría.

• 
  Detalle da cabeza dun (A. mississippiensis).
• 
  Crías saíndo do ovo.
• 
  Cría nadando.
• 
  Devorando un cangrexo azul.
• 
  Detalle das súas extremidades.
• 
  Unha sección da cola.

Wikimedia Commons ten máis contidos multimedia na categoría:  Aligátor do Mississippi

Wikispecies posúe unha páxina sobre:  Aligátor do Mississippi