West

West of it westen is in wynstreek en ien fan 'e fjouwer haadwynstreken, njonken noard, east en súd. De namme komt fuort út it Proto-Germaanske *wes-t- ("jûn"), fan it Proto-Yndo-Jeropeeske *uestos, in ferbûging fan 'e woartel *ues-: "út 'en [readens] skine", dat sels wer in foarm fan *aues- wie, dêr't it wurd 'east' út fuortkomt.

It westen is it tsjinstelde fan it easten. It is de rjochting dêr't de sinne liket ûnder te gean. Yn 'e astronomy is it westen definiëarre as de rjochting dêr't in himellichem yn syn omrin nei ta draait. Op in lânkaart wurdt it westen tradisjoneel as de lofterkant beskôge, sadat men it noarden boppe hat en it suden ûnder. Sadwaande sprekt men by it lêzen fan in wrâldkaart fan it westen as men it oer it westlik healrûn hat.

West is ek de pleatslike Skylgerske namme fan it doarp West-Skylge. Yn 'e koloniale tiid spriek men fierders ek wol fan 'de West' as men West-Ynje bedoelde. Yn ynternasjonaal ferbân wurdt mei 'it Westen' de Westerske wrâld bedoeld; binnen Nederlân ferwiist 'it Westen' lykwols nei de Rânestêd. It Wylde Westen is in oantsjutting foar rûchwei de westlike helte fan 'e Feriene Steaten yn it tiidrek tusken 1850 en 1900.