Komandlinia interfaco

Komandlinia interfaco, mallonge KLI, estas speco de homa-komputila interfaco per pure teksta enigo en la komanda linio.

Komanda linio estas ordono de dialoga sistemo aŭ de laboradministra lingvo, enigita per klavaro (kaj eĥita sur la ekrano) aŭ legita el komanda dosiero; ĝi entenas la nomon de la plenumota programo kaj ties faktajn parametrojn.

Kutime la komandliniaj interfacoj disponigas ĉiujn eblojn de la programa produkto, kaj klavara enigo estas pli rapida kaj oportuna por la profesia uzanto. Male, GUI kutime disponigas nur kelkajn tipajn uzmanierojn, elekteblajn per menuoj kaj dialogujoj — tio oportunas por novulo kaj incitas la spertulon.

Por malnova komputila terminalo, kiu konsistis el klavaro kaj printilo, komandlinia interfaco estis la sola ebla. Nuntempe, kiam disponeblas ekranaj vidigiloj kaj inteligentaj terminaloj, KLI plu estas uzata, interalie pro la sekvaj kialoj:

• Komandlinian interfacon oni povas tre facile realigi kaj funkciteni. Tio precipe gravas dum projektado kaj evoluigo de programaro.
• Programo povas disponigi tre multe da komandoj, granda parto da kiuj estas malofte uzata. Tial ankaŭ por GUI-havaj sistemoj sperta uzanto povas pli rapide klavi komandon, ol navigi al bezonata menuero; ankaŭ la okulojn tio malpli lacigas.
• Oni povas verki tutajn programojn el tiaj komandoj, laŭ la bezonoj de la uzanto (la ŝel-skriptoj uniksaj, la .bat-dosieroj vindozaj).
• KLI estas tre memorŝpara kompare kun GUI.

• Komando (komputa)
• interpretilo
• bash
• Grafika uzantinterfaco

• Komandlinia interfaco en Komputada Leksikono