Busal

An busal (<Espanyol, bozal) sarong gamit na sinusulot sa barungos nin hayop ngani dai ini makakagat o kun anoman dai makabuka an nguso sa pagtakab.

An busal pwedeng solido na may mga labot palaogan duros ngani an hayop makahangos o gibo sa bagay arog kan anit na pwedeng iharikos sa nguso na luag sana ngani ini makainom o kakan. Anit, alambre, plastik o nylon iyo an garamiton na busal. An porma kan busal depende sa katuyohan, kun ini ngani dai makakagat o dai makakakan.

An busal ginagamit sa ayam na minamanso o maski sa dai mansong ayam, sadit o dakula ngani ini dai basang mangagat, mamurot kakanon o mandila nin lugad. Inuusar man ini sa mga ayam na may pagkaagresibo, maski ini huli sa ini dai napapauntok, natatakot, o gustong manlapag. Ini ginagamit pa man sa mga ayam tanarig dai magbasang kakan kan mga hilong paon sa kino o mga peste.

An mga busal ginagamit man sa mga ayam na nagtatrabaho kunektado sa militar o pulis, siring man bilang mga alag na itinataya' sa mga urumbasan.

An mga busal gibo sa matibay na materyal arog kan anit asin may hebilya asin ano pa man na panggakot na dai basta ini maghulpos sa barungos. An mas bagay na busal idtong may kahang alambre na igdi libre-libre an ayam magkakan, mag'inom asin maghalhal urog na kun sobrang maharasahas an panahon.

Pigtitirinda an mga busal sa ayam sa mga tindahan nin mga hayop na alagon.

May mga busal man na inuusar sa mga kabayo asin mga hayop na siring kaini, ngarig dai magkagat-kagat o mag'ibib na ikakalugad kan nguso. An ibang busal pwedeng may saradit sanang labot na dikit lang makalaog na doot na sabsabon urog na kun an hayop sobrang taba na.

Sarong tamboan an artikulong ini. Makakatabang ka sa Wikipedia sa pagpoon kaining pahina.