Alamans

Os Alamans (en luenga chermanica "toz os ombres libres"), estioron una confederazión de pueblos chermans (suebos, cuados, semnons, teutons, eudusos, etz...) muitos d'ellos prozedents de l'aria de Brandemburgo que s'establioron enta l'año 213 entre l'Agri Decumates (l'Alto Danubio e lo Rhin Meyo), mugando con o Imperio Román e que dimpués fuoron sozmesos por os Francos, esdebenindo parte d’o Volk Deustche, que por corrimiento de nombres en franzés, oczitán, catalán e aragonés ye conoxito como "alemán".

A fins d'o sieglo II emigroron ta o sur forachitatos por os godos e arriboron en l’Agri Decumates en l’año 213. Dende l’año 260 feban incursions trescurzando os Alpes e plegando t’a redolata de Milán. Probo lis zerró o paso por os Alpes en l’año 277 ya de pa cutio. Dende ixe inte os alamans yeran una unidat politica que controlaba un territorio a la dreita d’o Rhin que mugaba a lo norte con o Maine e a lo Sur con o Laco Gostanza, on eban reduzito a la poblazión autotona a la serbitut.

En o sieglo IV preboron d'establir-se en a marguin ezquierda d’o Rhin. En l’año 409 aprobeitoron que en o limes renán no i eba tantas lechions e lo trescruzoron establindo-se en Alsazia e Palatinato. Dende ixas bases feban incursions enta o norueste en direzión Colonia, pero os francos los aturoron en a batalla de Tolbiacum.

Por no poder atacar a los Francos os alamans adrezoron as suyas incursions enta l’ueste e sur e creyoron nuebas comunidaz alamanas en Alsazia, Lorena, Franco Contato e Suiza Alemana. Teudorico o gran lis permitió d’establir-sen en as planas de Retia mientras os romans se retaculaban enta os Alpes. As corrients migratorias enta o sur se fazioron més grants en l’año 506 cuan Clododeu ocupó os territorios alamans d’o Palatinato, Hesse e Maine. L’abanze por Suiza fue aturato por os Burgueños pero continó en l’año 532 con a destruzión d’o Reino Burgüeño.

En l’año 536 fuoron sozmesos por os francos, encara que os francos no controlaban bien que Alsazia e o Palatinato. OS alamans continoron o abanze entra o sur e surueste derritando a contes francos a man de Friburgo (610), a lo tiempo que atros penetraban pos as fozes e congustros d’o Chura en Franco Contato e s’establiban en Besançon. A mayoría d’os alamans no trescurzoron ni o Chura ni os Vosgos.

A cristianizazión d’os Alamans estió tardana e no encomenzó dica fins d’o sieglo VI.

Os alamans encara yeran menzionatos como pueblo en o S IX, y o territorio d’os Alamans costituiba o Ducato de Suabia. Os alamans rematoron fusionando-sen con os atros pueblos chermanicos e fendo parte d’o Volk Deustsche como a suya Stämne Suaba, y en l’autualidat os deszendients d’esta Stämne son dibiditos politicament entre Franzia, Alemaña, y en menor mesura Austria.

En a Francia Ozidental a denominazión de “alaman” s’estendilló a toz os pueblos chermanicos de l’este por estar os alamans uno d’os pueblos chermanicos con que teneban més contacto cheografico os galorromans, (con os francos teneban més contacto sozial como clase dirichent que contacto cheografico en o cabo noreste). Dende o Franzés, Arpitán e Oczitán en catalán, aragonés e castellán tamién prenioron a denominazión d’alamán pa denominar a los pueblos chermanicos d’Europa Zentral, e Chermania pasó a dizir-se en totas estas luengas Alemaña.