Tauris-paleis

Die Tauris-paleis (Russies: Таврический дворец; Tawritsjeski dworets) is een van die grootste en histories belangrikste paleise in Sint Petersburg, Rusland.

Prins Grigori Potjomkin van Tauris het sy gunsteling-argitek, Iwan Starof, gevra om die paleis te ontwerp in ’n Palladiaanse styl. Starof het ook ’n groot park en hawe voor die paleis ingesluit wat deur ’n kanaal met die Newarivier verbind was. Bouwerk het in 1783 begin en ses jaar geduur. Die ontwerp van dié vername edelman se woning is regdeur die Russiese Ryk nageboots.

Ná sy dood het Katharina die Grote, wat sy minnares was, die paleis gekoop en die argitek Fjodor Wolkof aangestel om dit in ’n somerpaleis vir haar te omskep.

In die 19de eeu het die argitekte Carlo Rossi en Wasili Stasof dit in ’n woning vir minder belangrike adellikes verander. Danspartye en uitstallings is daar gehou tot in 1906, toe dit die setel van die eerste Russiese parlement geword het. Ná die Russiese Rewolusie het dit die Voorlopige Regering gehuisves.

Sedert die 1990's is die Tauris-paleis die setel van die Interparlementêre Vergadering van Lidlande van die Gemenebes van Onafhanklike State (GOS).

Hierdie artikel is merendeels vertaal vanaf die Engelse Wikipedia-artikel en:Tauride Palace

• Djatsjenko, L.I. en Krotof, M.I. Tawritsjeski dworets: prosjloje i nastojasjeje. Sint Petersburg, 2002.
• Sjoeiski, W.K. Tawritsjeski dworets. Sint Petersburg, 2003.

Wikimedia Commons bevat media in verband met Tauride Palace.

• Tauris-paleis in die Ensiklopedie van Sint Petersburg

59°56′52″N 30°22′33″O / 59.94778°N 30.37583°O / 59.94778; 30.37583