車路士足球會

雖然車路士成立咗超過一百年，但成績要到近十幾年至大有躍進，其中喺1997年取得足總盃冠軍，1998年取得歐洲盃賽冠軍盃，歐洲超級盃同埋聯賽盃。喺2004-05年度球季攞到英格蘭超級足球聯賽冠軍，2009-10球季再次奪得英超聯賽冠軍同足總盃冠軍，成為英超雙冠王。歐洲賽事方面，車路士喺2011-12年度球季更首次奪得歐洲聯賽冠軍盃冠軍。喺2012-13球季，車路士攞到歐霸盃冠軍，之後喺2020-21年度球季再次攞到歐洲聯賽冠軍盃冠軍，完成歐洲三大盃大滿貫。

車路士喺1905年3月14號成立，主場位於今日倫敦嘅市中心區。冇幾耐車路士1905年5月29號被選為英格蘭乙組聯賽球隊，並喺1905年9月1號正式展開球會成立以嚟首場聯賽比賽，對手係史托港。

隨後車路士從其他球隊請咗多名聯賽球員，並正式升上最高級別聯賽比賽。車路士曾經喺1915年打入足總盃決賽，但攞唔到冠軍。此後車路士戰績一直都只係麻麻，得唔到任何主要榮譽，直到1954-55年贏得英格蘭甲組聯賽冠軍──球隊史上首個重要冠軍獎盃。

車路士隨後喺聯賽一直都攞唔到任何榮譽，但喺盃賽仍然有一定成績，先喺1965年取得球會史上首個聯賽盃冠軍，並喺1967年獲得足總盃亞軍。1970年車路士喺足總盃決賽以2-1擊敗列斯聯，並喺一年後贏到歐洲盃賽冠軍盃──球隊史上首個歐洲比賽冠軍。

但此後車路士一直得唔到更多榮譽，主要係由於球隊紀律退化，以及重建主場引起嘅球隊財政問題，導致大量球星被賣走、球隊降班，連主場都賣埋畀地產發展商。七八十年代嘅車路士一直只係喺甲乙組浮浮沉沉，並曾經降過兩次班。

1989-90年車路士正式重返甲組，並喺同年以黑馬身分取得聯賽第四名。幾年後車路士請咗當時35歲嘅前英格蘭中場球星格連荷杜做領隊。荷杜領軍第一年就帶領車路士贏得足總盃亞軍，取得歐洲聯賽冠軍盃嘅參賽資格，重返歐洲賽場。九十年代中期班主卑斯（Ken Bates）正式入主車路士，喺佢支持下使咗平均幾百萬鎊收購名將，其中最出名嘅係喺1995年收購荷蘭名將古列治同埋前曼聯射手馬克曉士。荷杜1995-96年球季帶領車路士取得聯賽第11名嘅差劣成績之後就辭職，轉教英格蘭國家隊。

古列治喺1996-97年球季成為球會領隊，第一個球季就帶領球隊打入聯賽頭六名；而足總盃決賽以2-0擊敗米杜士堡更為車路士取得26年來首個大賽錦標。1998年2月古列治宣佈辭去車路士領隊職務，由球隊嘅意大利籍射手維埃里（Gianluca Vialli）接手。維埃里一上任就為車路士取得1998年歐洲盃賽冠軍盃同埋聯賽盃，1998-99年亦帶領車路士取得聯賽第三名，並首次進軍歐聯；1999-2000年球季打入歐聯8強；2000年衞冕冠軍曼聯宣佈唔參加足總盃，喺天時地利配合下車路士取得足總盃冠軍。當時嘅車路士引入咗好多外來球員，範圍包括意大利、荷蘭、法國、德國以至西班牙，例如意大利射手蘇拿、荷蘭守門員迪高爾（Ed de Goey）、法國中場拿保夫（Frank Leboeuf），以至西班牙右後衞費利亞（Albert Ferrer），因隊中擁有多國球員而俾人稱為「聯合國部隊」。

2000-01年球季車路士遭逢一系列敗績，全季勝出賽事只喺主場攞到，成為「作客蟲」。結果維埃里喺2000年9月俾車路士炒咗，由意大利籍教練雲尼亞里（Claudio Ranieri）做領隊，雖然換入一啲新面孔充實球隊，但雲尼亞里偏柔嘅個性並未為車路士取得任何錦標，反而因為使咗太多資金喺球員買賣，結果令車路士負債7千7百萬英鎊。資金缺乏令車路士無法進一步增強實力，加上戰績一直麻麻，球隊大有重蹈七十年代覆轍嘅可能。

卑斯喺2003年6月以6千萬磅將球會賣畀俄羅斯億萬富翁阿巴莫域治。佢幫球會還晒7千7百萬英鎊債項，車路士財政匱乏嘅局面至得以扭轉。阿巴莫域治投入大量資本，用咗成億嘅資金羅致馬基利尼、基斯普、祖高爾同埋杜夫等多名球星。一個球季之後，車路士喺英超聯賽攞到亞軍，兼打入歐聯四強。隨後，球隊炒咗冇乜建樹嘅雲尼亞里，重金請咗啱啱帶領波圖贏得歐聯嘅葡萄牙主教練摩連奴，又從英超球隊曼聯請到簡朗做行政總裁；而喺球員方面，車路士繼續引入高質素球員，包括科特迪瓦射手杜奧巴、荷蘭新秀翼鋒洛賓、捷克門將施治等等。

摩連奴入主標誌著車路士正式起飛嘅輝煌時代。喺佢入主嘅第一個球季，就帶領一眾主力奪得2004-05英超聯賽冠軍，唔單止打破咗當時曼聯喺英超嘅壟斷地位，重為球隊取得自1954-55年球季以嚟首個英格蘭頂級聯賽冠軍。車路士亦喺嗰季創下一系列紀錄：英超聯賽有史以嚟嬴最多場（29場）、最少失球（15球）同埋最高分嘅球隊（95分）。佢哋重攞到聯賽盃冠軍，並喺歐聯打入四強，但輸咗畀利物浦。

2005-06年車路士前段喺英超聯積分榜已經遠遠拋離其他對手，即使得分差距最小嘅曼聯仍少車路士十三分，其他嘅至少差成廿幾分。2006年4月29號車路士主場以3:0大破曼聯，成功衞冕聯賽冠軍。但喺歐聯，車路士兩回合以2-3輸畀巴塞隆拿，16強止步。

2006-2007年球季，車路士雖然只能夠取得聯賽亞軍而未能再次衛冕聯賽冠軍，但就喺三年內第二次贏得聯賽盃冠軍，並喺足總盃決賽以1-0擊敗曼聯贏得足總盃冠軍，係新溫布萊球場落成後第一個喺嗰個球場捧走足總盃嘅球隊，咁啱車路士亦係舊溫布萊球場重建前最後一支奪得足總盃嘅球隊。

2007-08賽季首場賽事，車路士喺主場以3-2擊敗伯明翰以連續64場主場不敗戰績成為英格蘭足球史上最長主場不敗球隊，正式打破利物浦喺1978-1980年創下嘅63場「最長主場不敗紀錄」，呢個紀錄到咗2008年10月26號先至俾利物浦破咗，嗰場波利物浦贏一比零。2007年9月20號領隊摩連奴突然離開球會，宣佈同球會解約，相信都係因為攞唔到歐聯俾球會要求辭職，摩連奴又係串王就佢炒人唔俾人炒佢，跟住以色列人格蘭（Avraham Grant）就上任做新領隊^[1]。不過車路士喺2007-08年球季一個錦標都攞唔到，英格蘭足總盃八強出局、英格蘭聯賽盃決賽輸咗畀熱刺、聯賽以兩分之差屈居曼聯之後得第二、歐聯首次打入決賽，但喺互射十二碼階段輸畀曼聯，做咗「三料亞軍」。而格蘭就喺2008年5月24號，球季完咗幾日之後俾人炒魷。

2008年7月，車路士揾咗史高拉利（Luiz Felipe Scolari）做新領隊，不過佢只係做咗7個月，喺2009年2月因為球隊成績差而俾人炒魷，由俄羅斯國家足球隊領隊希丁克兼任看守領隊到季尾。而希丁克亦帶領球隊贏得英格蘭足總盃冠軍，好多人都話佢教得好。

2009年中，車路士揾咗安察洛堤做新領隊。佢帶領車路士攞到2009-10英超聯賽冠軍及衛冕英格蘭足總盃冠軍，令球隊首次贏得雙料冠軍，攞返聯賽冠軍同時創下英超聯一季射入103球紀錄。不過車路士喺2010-11年球季一個錦標都攞唔到，安察洛堤喺賽季完之後走人。

跟住車路士就請咗啱啱帶領波圖贏得葡超聯賽冠軍、歐霸冠軍同葡萄牙盃嘅葡萄牙主教練安德烈·韋拿斯-保亞斯做領隊，2011年7月喺香港攞咗巴克萊亞洲錦標賽冠軍。不過車路士喺2011-12年球季戰績唔好，2012年3月初車路士喺歐聯十六強首回合落後1-3，聯賽跌出前四，韋拿斯-保亞斯喺聯賽輸畀西布朗之後俾人炒魷，由羅拔圖·迪馬堤奧（Roberto di Matteo）做看守領隊到季尾。迪馬堤奧上任之後，車路士漸入佳境，聯賽雖然得第6，但攞到英格蘭足總盃之餘，重喺歐聯淘汰衞冤嘅巴塞隆拿再一次入到決賽，然後互射十二碼贏拜仁慕尼黑，第一次攞走歐聯冠軍。賽季完咗之後，車路士畀迪馬堤奧坐正個領隊位。

2012年11月，車路士喺歐聯分組賽瀕臨出局，而炒咗迪馬堤奧魷魚，並宣布委任賓尼迪斯，出任暫代領隊到季尾。2012年12月，車路士喺最後一場分組賽大炒對手，但對賽成績唔及排第二嘅薩克達而出局，轉戰歐霸盃，成為歐聯改制後首支分組賽出局嘅衞冕冠軍。雖然歐聯出局，但車路士最後喺歐霸盃攞到冠軍。

2021年，因為成績差，車路士炒咗名宿林伯特，請左杜曹黎教車路士。杜曹上任之後，車路士成績明顯好轉，更加喺冇人睇好嘅情況之下，喺決賽以一比零贏左曼城，攞到隊史第二個歐聯冠軍。

因為俄羅斯入侵鳥克蘭，英國政府決定夾埋其他國家一齊經濟制裁俄羅斯，凍結俄羅斯喺英國嘅錢。由於車路士老闆阿巴莫域治係俄羅斯人，所以無可避免俾英國政府嘅制裁影響到，連車路士都受到牽連，喺2022年3月10號開始，車路士唔可以再賣波飛，商品店亦都唔做得生意，連喺轉會市場買賣球員都唔得，不過已經買咗飛嘅人仍然可以入場睇波。^[2]

雖然車路士嘅主場係按照倫敦嘅車路士區命名，但事實上呢個球場並唔喺倫敦嘅車路士區入面，而係喺富林區入面。現時史丹福橋球場可容納42,449人，喺倫敦僅次於2006年啟用嘅阿仙奴嘅阿聯酋航空球場（可容納60,000人），同時亦係全英國第九大嘅足球場。

球場喺1877年啟用，初時係倫敦田徑會嘅運動場。1904年米爾斯兄弟（H.A.(Gus) Mears 及 J.T. Mears）收購球場以及周邊土地（加埋有12.5英畝）。佢哋原本諗住將新球場租畀當地球隊富咸，但因為條件不合而被拒，米爾斯兄弟決定成立自己嘅球隊用新球場，由於已經有富咸存在，新球隊採用街區車路士命名，喺1905年同史丹福橋不可分割嘅車路士成立。

最後更新：2021年9月28號

• 車路士足球會官方網站（英文）
  • 車路士足球會中文官方網站（中文）
• 車路士球迷社區（中國）（中文）
• 車路士中文論壇（中文）
• 車路士新聞網（中文）
• 香港車路士官方球迷會（中文）
• 車路士夾網站視頻（英文）
• 轉會市場(英文)